O Mihailo, ja sar so disave religije vićinena le, sveti Mihailo, tano anav kova o Isus akharđa angleder so alo ki phuv hem palo odova so irinđa pe ko nebo. a E Devleso Lafi phenela so palo Mojsijeso meribe o Mihailo hine le problemi e Bengeja. Isto ađahar, i Biblija mothovi so o Mihailo pomožinđa jekhe anđelese te phenel e Danilose e Devlesi poruka (Danilo 10:13, 21; Judina 9). Oleso anav značini „Koj tano sar o Devel?“ hem odova anav šukar opisujini le sose ov branini e Devlesi vlast hem borini pe protiv e Devlese dušmanija (Danilo 12:1; Otkrivenje 12:7).

 Hajde te dikha sose šaj te ova sigurna so o Isus tano o arhanđeo Mihailo.

•   O Mihailo tano o „arhanđeo“ (Judina 9). I tutula „arhanđeo“ značini „vrhovno anđeo“ ja anđeo upro anđelija hem pojavini pe samo ko duj stihija ki Biblija. Ko solduj stihija, odova lafi tano ki jednina so mothovi so samo jekh anđeo akhari odija titula. Ko jekh ando odola stihija pisini so o Gospod o Isus kova uskrsninđa „ka huljel ando nebo hem ka šunđol o zapovedničko poziv hem o glaso ando arhanđeo“ (1. Solunjanima 4:16). O Isus isi le „o glaso ando arhanđeo“ odolese so ov tano o arhanđeo Mihailo.

•   O Mihailo vodini i vojska ando anđelija. „O Mihailo hem olese anđelija marđe pe protiv o zmaj“, o Satana (Otkrivenje 12:7). Ko nebo, o Mihailo isi le but baro autoritet hem olese phenela pe soj tano „jekh ando najbare knezija“, hem „o baro knez“ (Danilo 10:13, 21; 12:1). Sar so phenđa o izučavalac ando Nevo zavet, o Dejvid Aune, odola titule mothovena so o Mihailo tano „glavno zapovednik upro vojske ando anđelija“.

   Ked vaćeri ko pana isi le autoritet upro vojske andi anđelija, i Biblija pomini samo pana jekh anav. Oj phenela so kotar nebo ka pojavini pe o Gospod, o Isus, pe moćno anđelencar ki jag koja thabljola hem ka irini okolenđe kola na penđarena e Devle (2. Solunjanima 1:7, 8; Matej 16:27). O Isus „đelo ko nebo hem podložna tane olese o anđelija, o vlastija hem o sile“ (1. Petrova 3:21, 22). O Devel niked na bi ćhivela duj komandantija upri vojska ando anđelija. Logično tano so o solduj anava, hem o Mihailo hem o Isus, odnosinena pe ki jekh isto osoba.

•   O Mihailo „ka uštel“ ko „vreme ando pharipe“ (Danilo 12:1). Ko Danilo o lafija „ka uštel“ but putija odnosinena pe ko kralj kova spremini pe asi disavi posebno akcija (Danilo 11:2-4, 21). O Isus Hrist kova vićini pe hem „e Devleso Lafi“ sar „Kralj upro kraljija“ ka uništini e Devlese dušmanen hem ka zaštitini e Devlese narodo (Otkrivenje 19:11-16). Odova ka ćerel ki „bari nevolja savi na hine kotar početak ando sveto pa sa đi akana“ (Matej 24:21, 42).