I LUZIJA DŽALA LANGALA KI LEVO ČANG. Kotar tiknipe oj isila čhavorikani paraliza, odova tano but zarazno nabormipe kova peravi o nervno sistemi. Ked i Luzija hinela 16 berš, jekh manušni ki koja čerdža buti vačerdža olače: „O Devel kaznijatu te ove paralizovano sose na šujan te daja hem na hijanlje šukar premalo olate.“ But berša palo odova, oj na bisterdža akala lafija kola but dukhadžela.

KED I DAMARIS ŠUJA SO ISILA RAK ANI GODI, olako dad pučlja ola: „So čerdžan te oveltu odova? Sigurno čerdžan disavo baro lošnipe. Odoljese, o Devel kaznini tut.“ Akala lafija but dukhadže olako vilo.

O manuša beršenca verujie so o nabormipe tano kazna kotar Devel. Jekh knjiga vačeri so but džene ko Isuseso vakti verujie so „o nabormipe avela sebepi so o nabormo manuš ja džiko andi oljesi familjija čerdža disavo greh hem so oljeso nabormipe alo sar kazna sebepi odova greh“ (Manners and Customs of Bible Lands). Ki jekh aver knjiga vačeripe so ko srednji vek „disave manuša verujie so o Devel muklja zarazno nabormipe te kazniniljen sebepi oljenge grehija“ (Medieval Medicine and the Plague). Ked ko 14. veko milionja manuša ki Evropa mulje kotar odova zarazno nabormipe, da lji o Devel adžahar kaznija e lošno manušen? Ja odova zarazno nabormipe alo sebepi so hine jekh bakterijsko infekcija, sar so i medicina vačeri? Disave šaj pučenape, da lji o Devel čače mukela o nabormipe te kazniniljen sebepi oljenge grehija? *

RAZMISLIN AKALJESTAR: Sose bi o Isus sačari e nabormen manušen, ako o nabormipe hem o muke avena sar zaslužimi kazna ando Devel? Da lji bi odoljeja peravi e Devljesi pravda? (Matej 4:23, 24) O Isus niked ne bi čerela diso so o Devel na mangela. Ov vačerdža: „Me uvek čerava odova so ov mangela“ hem „me čerava adžahar sar so pheja maje mo Dad“ (Jovan 8:29; 14:31).

I Biblija phenela so o Jehova niked nane nepravedno (5. Mojsieso 32:4). Na primer, o Devel niked na ka čerel te perel disavo avioni kuri ka meren but manuša kola nane kriva, odoljese so mangela te kaznini džikas kova tano ko avioni! Sebepi soj tano o Devel pravedno, o Avraham, oljeso verno sluga, vačerdža so o Devel niked na te mudari „e pravedniko ki kupa e lošnonea“. Isto adžahar, vačerdža e Devljese: „Tu niked ne bi čereja odova“ (1. Mojsieso 18:23, 25). I Biblija isto adžahar phenela „dur tano kotar čačutno Devel te čerel lošnipe“ ja „te na ovel pravedno“ (Jov 34:10-12).

Ked amen isimen muke odova nane sose o Devel kaznini amen sebepi disavo greh. O Isus kokri vačerdža akaljestar ked ov hem oljese učenikija dikhlje e manuše kova hine koro sar bijandilo. „Oljese učenikija pučljelje: ’Učitelju, ko grešija, akava manuš ja oljeso dad hem i daj, pa odoljese bijandilo koro?‘ O Isus vačerdža: ’Na grešija ni akava manuš, a ni oljeso dad ja i daj, nego tano odova te šaj upro oljeste te mothovipe so o Devel čerela‘“ (Jovan 9:1-3).

Sebepi so ko odova vakti but manuša pogrešno verujie, e Isusese učenikondže hine nevo odova so o Isus vačerdža so o manuš na hine koro odoljese so ov ja oljeso dad hem i daj grešije. O Isus na samo so sačardža e kore manuše, nego hem mothodža so o Devel na kaznini e manušen nabormipa sar so  pogrešno verujijape (Jovan 9:6, 7). Sa okoljendže so avdije isiljen phare nabormipa, šaj te ovel but polokho ked džanena so o Devel na čerela sa odola muke.

So sikljova ando Devljeso Lafi

• „Sose lošna bučenca našti te iskušine e Devlje, a ni ov nikas na iskušini lošnipa“ (JAKOVESO 1:13). Čače, o lošna buča sar soj tane o nabormipe, o muke hem o meribe vekonca e manušendže čerena pharipa, ama pana hari na te oven više.

• O Isus Hrist „sačardža sa e nabormen“ (MATEJ 8:16). Ked sačardža sa okoljen so alje koro oljeste, e Devljeso čhavo adžahar mothodža so ka čerel e Devljeso Kraljevstvo ki celo Phuv.

• „Ov [o Devel] ka kosel svako asvi kotar oljenge jačha, na te ovel više meribe, ni muke, ni rojbe ni dukha. Na te ovel okova so hine angljeder“ (PUČARIBE 21:3-5).

Sose tegani o manuša isiljen odoborkha muke hem dukha? O manuša vekonca pučenape akava pučibe. Ako o Devel nane krivo, koj tano krivo? Akaljestar ka vačera ko aver članko.