„O Svedokija na hine šukar samo premalo manuša već hem premalo me đućela. Jekh dive, i Elejn, koja terdilji uzi kolica, dinđa me đućelenđe duj keksićija. Palo odova, ked god bi nakhaja uzi kolica, o đućela bi vucinena man te đav uduri te dobinen pe keksićija.

„Nekobor masekija nakhlje. O đućela uživinđe ko keksićija, a me ko odova te vaćerav e Svedokonencar. Ama, na mangljum hor te khuvav. Hine man prekalo 70 berš hem na đanđum ko so verujinena e Jehovase svedokija. Sebepi so hijum le razočarimo ko but crkve, mislinđum soj tano najšukar kokri te proučinav i Biblija.

„Dikhljum hem avere Svedokonen sar ko avera thana ki diz terđona uzi kolica. Hem on uvek hine ljubazna. On uvek hine spremna te koristinen i Biblija te odgovorinen ko me pućiba hem sebepi odova mo poverenje upro lende barilo.

„Jekh dive i Elejn pućlja man: ’Da li verujineja so o životinje tane poklon ando Devel?‘ Me odgovorinđum: ’Naravno so verujinava!‘ Tegani i Elejn čitinđa maje o lafija ando Isaija 11:6-9. Odola lafija pogodinđe man ko vilo. Iako mangljum te đanav pobuter, pana na mangljum te lav olendar diso te čitinav.

„Sar đelo o vreme, uživinđum te vaćerav e Elejnaja hem e Brenteja. On phenđe maje te čitinav e Devleso Lafi kotar Matej đi o Dela apostolska te šaj te haljovav so značini te ove hrišćanin. Me ćerđum ađahar hem sigate palo odova on počminđe te proučinen mancar. Odova hine ko nilaj ko 2016. berš.

„Svako puti, jedva ađićerđum te proučina hem te đav ko sastankija. Hijum le bahtalo so šaj hine te sikljovav so i Biblija ćaće sikavi. Palo jekh berš, krstinđum man. Akana isi man 79. berš hem đanava so hijum ko pravo drumo. O Jehova but blagoslovinđa man sose dozvolinđa maje te ovav deo kotar olesi porodica.“