Miguel —vai sar uni religionuria phenen “san Miguel”— si o anau kai del e Biblia ka o Jesus mai anglal ai polme te avel pe Phuv. a E Biblia phenel ke polme te merel o Moises, o Miguel ai o Satanas jalepe. Vi del duma pa kana azhutisardias ka iek angel te del ka o Daniel iek suato le Devlesko (Daniel 10:13, 21; Juda 9). O Miguel thol partia ka o Jehova ai marelpe karing le dushmaia. Pala godo si malado te avel les godo anau, ke kamel te phenel “Kon si sar o Del?” (Daniel 12:1; Sicharimos [Apokalipsis] 12:7).

 Aida dikhas sostar shai phenas ke o Jesus si o arkangel Miguel.

•   Miguel si o arkangel (Judas 9, La Biblia. Traducción del Nuevo Mundo [NWT]). E vorba arkangel kamel te phenel “kon ningerel ka le angeluria” ai numa ande dui verseturia la Bibliake sikavelpe godo suato. Ande le dui texturia, kana phenen arkangel den duma numa pa iek angel kai shai phenen leske gadia. Iek anda le dui verseturia del duma pa o Jesus kana gata sas zhuvindo ai phenel ke “hulela anda rhaio ek tsipimasa, le glasosa le baro angelosko [arkangel]” (1 Thesaloniana 4:16). Pa so phenel o verseto, o Jesus si les iek glaso sar arkangel. Pala godo, sikavel ke o Jesus si o Miguel, o arkangel.

•   O Miguel si kon ningerel kal angeluria ando cheri. E Biblia phenel ke o “[Miguel] ai leske angelon marenaspe le baro sapesa”, kai si o Beng (Sicharimos [Apokalipsis] 12:7). O Miguel ando cheri ningerel ai si les but prame tela lesko vast. Pala godo, e Biblia phenel leske iek anda le bare principuria ai o baro principe (Daniel 10:13, 21; 12:1). Pala godo si prinzhardo sar “o baro kai ningerel kal angeluria ando cheri”. Gadia phenel pa o Miguel o David Aune, iek manush sikado pa o Nevo Testamento.

   Ande Biblia mai si aver anau kana del duma pa varekon kai ningerel kal angeluria ando cheri. Mothol ke “o Rai o Jesus sikadiola anda o cheri le [angelontsa] peska zorasa, mashkar jekh parha jagaki” (2 Tesalonikianuri 1:7, 8, E Nevi Viasta ai o Psalmo [ENV]; Mate 16:27). Ai vi, 1 Petri 3:21, 22 phenel ke o Jesus “gelo ando rhaio ai kai si akana pe chachi rig le Devleski ai poronchil pel angeluria ai pel aver putiari kai si ando rhaio”. Chi maladiol te gindis ke o Del thol ka o Jesus ai ka o Miguel te ningeren le dui kal angeluria. Pala godo shai phenas ke o Jesus ai o Miguel si numa iek.

•   O Miguel si ande punrhende ande iek vriama phari kai chi dikhili (Daniel 12:1). Ando libro katar o Daniel, kana iek amperato kerel iek buki defial bari phenelpe ke si ande punrhende (Daniel 11:2-4, 21). O Jesukristo, kai vi akharen les “E Vorba le Devleski”, kerela buki sar o “Amperato le amperatonge”, mundarela ka le dushmaia le Devleske ai arakhela peske manushen (Sicharimos [Apokalipsis] 19:11-16). Kerela buki kana avela “chino ai nekazo, sar e lumia shoxar chi dikhlias, zhi akana ai shoxar chi mai dikhela” (Mate 24:21, 42).