Сар о бэято арақаделяпэ пэ люма, важ лэстэ и лэстири дэй фартэ куч кадэва пэрво часо. Васо? Андэ кадэя время ла да цырдэл каринг о бэято, ай лэ бэятос каринг латэ. Када дэл зор лэ бэятости, кай во тэ барёл май драго *.

Васо и дэй камэл тэ жалуий и тэ диқэл пала бэято, саво кати арақаделяпэ? Ек учёно Жаннето Креншоу андо «Журнал перинатального образования» росԥэнэн, кай ваздэлпэ о ӷормоно, пэ саво ԥэнэнпэ окситоцино. Во «поможый кай и дэй тэ цырдэлпэ каринг о бэято, кала лэл лэс пэ вас, диқэл пэр лэстэ и праварэл лэ колинэса» (The Journal of Perinatal Education). Андэ кадэя время андо орӷанизмо кай и дэй ваздэлпэ и авэр ӷормоно. Во дэл лати инке май фартэ тэ диқэл пала пэско цынёнё. Васо амэ пала када задям дума?

Ла да цырдэл каринг о бэято, ай лэ бэятос каринг латэ. Кадя загиндосардя амаро любящё создателё, о Дэл Иегова *. О царё о Давидо ԥэнэнас наис лэ Дэвлэсти важ кода, кай во «виля» лэс анда йло ла датар и кай латэ пэ вас во полэлас, кай и дэй лэс драго фэрий. О Давидо мангэласпэ: «Пэр тутэ сымас ашадо сар арақаделэмпэ, жы анда ла дако йло ту санас мэрно Дэл» (Псалом 22:9, 10).

ПОГИНДОСАР. О Дэл стердя фартэ годявэрнэс, кай ла да тэ цырдэл каринг о бэято и кай лати май фартэ тэ камэлпэ тэ диқэл, со лэсти трэбуй. Хэба на авэла годявэрнэс тэ ԥэнэс, кай кажно мануш важ о Дэл куч?

О Иисус Христос, саво ӷанэн амарэ создателёс май драго чем авэр, ԥэндя: «Хэба на битинэн дуе чириклян важ ек монетка, савятэ най бари цэмин? И всаек ни ек андар лэндэ на пэрэла пэ ԥув, кай тэ на ӷанэн тумаро дад. Во ӷанэн, скати бал тумэндэ по шэро. Важ када на даран, тумэ май куч, чем бут чирикля» (Матфея 10:29 жы кай 31).

Най всаворэ андар мэндэ шона сама пэ кажно цынёни чириклёры, ай инке тэ шон сама, кала варисави андар лэндэ «пэрэла пэ ԥув». Но амаро дад, саво по нэбо, шол сама пэ кажно андар лэндэ! Ай важ о Дэл ек мануш пэ бутэстэ май куч, чем бут чирикля. Вижал, кай амэнди на трэбуй тэ гиндосарас, кай о Дэл на шол сама пар мэндэ. Трэбуй тэ патяс, кай амэ лэ Дэвлэсти фартэ трэбуй, и лэсти най всаек, со амэнца терэлпэ!

 Кода, со пистромэ андэ Библия, дэл тэ патяс,

• кай «Лэ Иеговастирэ яқа диқэн пала вся. Вонэ диқэн пала лашэ и найлашэ» (ПРИТЧИ 15:3).

• кай «Лэ Иеговастирэ яқа диқэн пэ кодэла, ко лэс кандэл, и лэстирэ кан ашунэн кодэлэн, ко ясвэнца мангэл тэ дэл зор» (ПСАЛОМ 34:15).

• кай «Мэ авава фартэ тэ лошавав, кай ту ман на ашавэс, важ кода кай любис. Кода, кай ту додиқлян мэрнэ биды, и полэс, сар манди дэ ԥарэс по ди» (ПСАЛОМ 31:7).

Амэ ӷанас, кай амэ лэ Дэвлэсти най всаек, важ кода кай во амэн любий и диқэл пала амэндэ. Парувэла варисар када амари жызня чи най? Да, када дицол, со сас ла Ханнаса *, сави жувэл андэ Англия. Акэ со вой росԥэнэн.

«Най еқвар манди здэласпэ, кай о Иегова ман на любий и на ашунэл мэрнэ молитвы. Мэ гиндосаравас, када, кай мэ найфартэ патявас лэсти. Манди здэласпэ, кай во ман просытярэл и мэ на ашав, кай о создателё пэр мандэ тэ шол сама. Мандэ андо ди сас кацаво, кай мэ лэ Дэвлэсти на трэбуй».

Но акана и Ханна патял, кай о Иегова ла любий и вой куч важ лэстэ. Васо вся кадя паруделя? Вой росԥэнэн: «Пэ када трэбуй сас время. Сэрав бут бэрша палпалэ мэ ашундэм ек библейско речь, кай о Иисусо отдя пала амэндэ пэстири жызня. Кадэя речь фартэ парудя мэрнэ гиндоря важ о Иегова и поможысардя манди тэ патяв, кай во ман любий. Мэ лэм тэ шав сама, кай о Дэл ля тэ ашунэл мэрнэ молитвы и най еқвар нащи зритяравас и ясва. Васо? Мэ полэм, кай о Иегова всаек ман любий. И кай мэ сытювавас па Библия и ԥиравас пэ собрания, мэ май бут уӷанглэм пала Иегова. Инке уӷанглэм, саво во исин и со лэстэ андо ди и сар во гиндой пала мануша. Акана мэ инке май фартэ патяв, кай о Иегова дэл зор, любий и фартэ камэл тэ диқэл пала кажно андар мэндэ».

Ла Ханнатирэ алава поможын тэ патяс. Но катар амэ ӷанас, кай о Дэл полэл, со амэндэ по ди и сэрэл пала со амэ фартэ загиндосавас? Пала када амэ уӷанаса, кала проадиносараса авэр статья.