ලූක් 22:1-71
22 පාස්කු උත්සවය+ එනම්, මුහුන් නොදැමූ රොටි උත්සවය පැවැත්වීමේ කාලය ළඟා විය.
2 මේ අතර ජනතාවට බියෙන් සිටි+ නායක පූජකයෝ සහ නීතිය පිටපත් කරන්නෝ යේසුස්ව මරා දැමීමට උපක්‍රමයක් සොයමින් සිටියෝය.+
3 ඒ අවස්ථාවේදී දොළොස්දෙනාගෙන් කෙනෙක් වූ+ යූදස් ඉස්කාරියොත් සාතන්ගේ බලපෑමට හසු විය.
4 එහෙයින් ඔහු නායක පූජකයන්ව සහ දේවමාලිගාවේ ප්‍රධානීන්ව හමු වී යේසුස්ව ඔවුන්ට පාවා දීමට උපක්‍රමයක් ගැන සාකච්ඡා කළේය.+
5 ඒ ගැන මහත් සේ සතුටු වූ ඔවුහු, ඔහුට රිදී මුදල් දීමට එකඟ වූහ.+
6 ඔහු තමාට ලබා දෙන මුදලට එකඟ වී සෙනඟ නැති වේලාවක යේසුස්ව ඔවුන් අතට පාවා දීමට සුදුසු අවස්ථාවක් පැමිණෙන තෙක් බලා සිටියේය.+
7 පාස්කු යාගය පූජා කරන මුහුන් නොදැමූ රොටි උත්සවය පවත්වන දිනය උදා විය.+
8 යේසුස්ද, “ගොස් අප සඳහා පාස්කු භෝජනය සූදානම් කරන්න”+ කියා පේතෘස්ට සහ යොහන්ට පැවසුවේය.
9 එවිට ඔවුහු, “ඒ සඳහා අප සූදානම් කළ යුත්තේ කොයි වගේ තැනක්ද” කියා ඔහුගෙන් ඇසූහ.
10 යේසුස් ඔවුන්ට මෙසේ කීවේය.+ “ඔබ නුවරට ඇතුල් වූ විට වතුර පිරුණු මැටි භාජනයක් උසුලාගෙන යන මිනිසෙක් ඔබට හමු වෙයි. ඔහු සමඟ ගොස් ඔහු යන නිවසට ඇතුල් වෙන්න.+
11 එම නිවසේ අයිතිකරුට මෙහෙම කියන්න. ‘“මගේ ගෝලයන් සමඟ පාස්කු භෝජනය ගැනීමට මට වෙන් කළ කාමරය කොතැනද” කියා අපේ ගුරුතුමා ඔබෙන් අසන්න කිව්වා.’+
12 එවිට ඒ මිනිසා අවශ්‍ය දේවල් සහිතව පිළියෙල කර ඇති විශාල උඩුමහල් කාමරයක් ඔබට පෙන්වයි. ඔබ භෝජනය සූදානම් කළ යුත්තේ එතැනයි.”+
13 ඔවුන් පිටත්ව ගිය විට යේසුස් ඔවුන්ට පැවසූ ලෙසම සෑම දෙයක්ම සිදු විය. ඔවුහු පාස්කුව සඳහා අවශ්‍ය සෑම දෙයක්ම සූදානම් කළෝය.+
14 නියමිත වේලාව පැමිණි විට යේසුස්ද තම නියෝජිතයෝද* මේසය වටා ඉඳගත්තෝය.+
15 එවිට ඔහු ඔවුන්ට මෙසේ පැවසුවේය. “වධ විඳින්න කලින් ඔබ සමඟ මේ පාස්කු භෝජනයට සහභාගි වෙන්න මා තුළ තිබුණේ මහත් ආශාවක්.
16 මන්ද දෙවිගේ රාජ්‍යයේදී පාස්කුවේ නියම අර්ථය ඉටු වන තුරු මම පාස්කු භෝජනයට නැවත සහභාගි වෙන්නේ නැහැ.”+
17 ඊළඟට ඔහු කුසලානයක් ගෙන+ දෙවිට ස්තුති කර මෙසේ කීවේය. “මෙය එකිනෙකා අත යවන්න.
18 මන්ද දෙවිගේ රාජ්‍යය පැමිණෙන තුරු+ මම නැවත වයින් බොන්නේ නැහැ.”
19 ඉන්පසුව යේසුස් රොටියක් ගෙන+ දෙවිට ස්තුති කර, එය කඩා ඔවුන්ට දෙමින් මෙසේ කීවේය. “මෙයින් නියෝජනය වන්නේ ඔබ වෙනුවෙන් මා පූජා කරන්න යන+ මගේ ශරීරයයි.+ මාව සිහි කිරීමට මේ දේ නොකඩවා කරන්න.”+
20 ඊළඟට භෝජනය* ගත් අවස්ථාවේදී කළ ආකාරයටම ඔහු කුසලානයක්+ ගෙන ඔවුන් අතට දෙමින් මෙසේ කීවේය. “මේ කුසලානයෙන් නියෝජනය වන්නේ ඔබ උදෙසා වගුරුවනු ලබන මගේ රුධිරයයි.+ අලුත් ගිවිසුම+ ස්ථිර වන්නේ මගේ රුධිරය මාර්ගයෙනුයි.+
21 “නමුත් බලන්න, මේ මේසයේ+ මාව පාවා දෙන තැනැත්තාත් සිටිනවා.+
22 මන්ද තමාට නියම කර තිබෙන ගමන යන්න මනුෂ්‍ය පුත්‍රයාට සිදු වෙයි.+ නමුත් ඔහුව පාවා දෙන තැනැත්තාට දරුණු විපතකට මුහුණ දෙන්න සිදු වෙයි.”+
23 එවිට ඔවුහු මේ කවුරුන් ගැනද පවසන්නේ කියා තම තමන් අතරේ සාකච්ඡා කළෝය.+
24 මේ අතරතුරේදී ඔවුන් අතර ඉතා උණුසුම් විවාදයක් ඇති විය. ඔවුන් වාද කරමින් සිටියේ ඔවුන් අතරේ උතුම් තැනැත්තා කවුද යන්න පිළිබඳවයි.+
25 එවිට යේසුස් ඔවුන්ට මෙසේ කීවේය. “සාමාන්‍යයෙන් රජවරුන් මිනිසුන්ව පාලනය කරන්නේ දරුණු විදිහටයි. එමෙන්ම මිනිසුන් බලධාරීන්ට ගරු නම්බු නාම පවා ලබා දෙනවා.+
26 නමුත් ඔබ එවැනි අයට වඩා වෙනස් අය විය යුතුයි.+ ඔබ අතරේ සිටින උතුම්ම තැනැත්තා සුළු සේවකයෙක් මෙන්ද+ ප්‍රධානියා ලෙස ක්‍රියා කරන තැනැත්තා අනුන් වෙනුවෙන් සේවය කරන කෙනෙක් මෙන්ද විය යුතුයි.+
27 ඇත්තටම වඩාත් උතුම් වන්නේ කවුද? කෑමට ඉඳගෙන සිටින පුද්ගලයාද? නැත්නම් සේවය කරමින් සිටින පුද්ගලයාද? අනිවාර්යයෙන්ම උතුම් වන්නේ කෑමට ඉඳගෙන සිටින පුද්ගලයායි. නමුත් ඔබ වෙනුවෙන් සේවය කරන්න ඉදිරිපත් වුණේ මමයි.+
28 “ඒත් විවිධ දුෂ්කරතාවලට මා මුහුණ දුන් විට මාව අත්හරින්නේ නැතුව+ මා සමඟම සිටියේ ඔබයි.+
29 ඒ නිසා මගේ පියාණන් මා සමඟ රාජ්‍යයක් සඳහා+ ගිවිසුමක් ඇති කළා සේම+ මම ඔබ සමඟ ගිවිසුමක් ඇති කරනවා.
30 එයින් මගේ රාජ්‍යයට හවුල් වී+ මගේම මේසයේ එකට කා+ බී සිංහාසනවල ඉඳ+ ඊශ්‍රායෙල් දේශයෙහි ගෝත්‍ර දොළහ විනිශ්චය කිරීමට ඔබට අවස්ථාව ලැබෙයි.
31 “සීමොන්, මට සවන් දෙන්න සීමොන්! තිරිඟු පොළනවා වගේ සාතන්+ ඔබ සියලුදෙනාවත් පොළන්න ඉල්ලා තිබෙනවා.+
32 නමුත් ඔබේ විශ්වාසය දුර්වල නොවීමට මම ඔබ වෙනුවෙන් දෙවිට කන්නලව් කර තිබෙනවා.+ ඔබ නැවත ශක්තිමත් වූ පසු ඇවිත් ඔබේ සහෝදරයන් තුළ තිබෙන විශ්වාසය ශක්තිමත් කරන්න.”+
33 එවිට පේතෘස්, “ස්වාමීනි, ඔබ වෙනුවෙන් ඕනෑම දෙයකට මුහුණ දෙන්න මම සූදානම්. හිරගෙට යන්න විතරක් නෙමෙයි මැරෙන්න වුණත් මම ලෑස්තියි” කියා ඔහුට කීවේය.+
34 නමුත් යේසුස් මෙසේ පිළිතුරු දුන්නේය. “පේතෘස්, මම දැන් කියන දේට හොඳින් ඇහුම්කන් දෙන්න. කුකුළෙකු හඬලන්න කලින් ඔබ මාව හඳුනන්නේ නැහැ කියා අද තුන් වතාවක්ම කියනවා.”+
35 ඉන්පසු ඔහු ඔවුන්ට මෙසේ පැවසුවේය. “පසුම්බියක්වත් කෑම මල්ලක්වත් පාවහන්වත් නැතුව මම ඔබව යැව්වත්+ ඔබට කිසිම දෙයකින් හිඟයක් තිබුණාද?” ඔවුහු, “නැහැ” කියා පිළිතුරු දුන්නෝය.
36 එවිට ඔහු ඔවුන්ට මෙසේ කීවේය. “නමුත් මෙතැන් පටන් තත්වය ඊට වඩා වෙනස්. යම් කෙනෙකුට පසුම්බියක් හා කෑම මල්ලක් ඇත්නම් ඔහු ඒවා රැගෙන යා යුතුයි. කඩුවක් නැත්නම් තමාගේ පිට වස්ත්‍රය විකුණා කඩුවක් මිල දී ගත යුතුයි.
37 මන්ද ‘ඔහුව නීතිය නොතකන පව්කාරයෙකු මෙන් ගණන් ගනු ලැබුවේය’+ කියා මා සම්බන්ධයෙන් ලියා තිබෙන දේ ඉටු විය යුතුයි. ඇත්තෙන්ම ඒ දේවල් දැන් ඉටු වෙනවා.”+
38 එවිට ඔවුහු, “ස්වාමීනි, මෙන්න අපිට කඩු දෙකක්ම තිබෙනවා” කියා කීවෝය. ඔහුද, “එය ප්‍රමාණවත්” කියා ඔවුන්ට පිළිතුරු දුන්නේය.
39 යේසුස් පිටත් වී පුරුදු පරිදි ඔලීව කන්දට ගියේය. ඔහු පසුපස ගෝලයෝද ගියෝය.+
40 ඔහු එතැනට ගොස්, “ඔබ යම් වරදකට හසු නොවී සිටින්න නම් නොකඩවාම යාච්ඤා කරන්න”+ කියා ඔවුන්ට කීවේය.
41 ඉන්පසු ඔහු එතැනින් ටික දුරක් තනිව ඇවිද ගොස්* දණින් වැටී යාච්ඤා කරන්න පටන්ගත්තේය.
42 ඔහු පැවසුවේ මෙයයි. “පියාණෙනි, ඔබ කැමති නම් මේ කුසලානය* මගෙන් ඉවත් කරන්න. ඒ වුණත් සිදු විය යුත්තේ මා කැමති දේ නොව+ ඔබේ කැමැත්තයි.”+
43 එවිට ස්වර්ගයෙන් දේවදූතයෙක් පැමිණ ඔහුව ශක්තිමත් කළේය.+
44 ඔහුගේ සිතට දැනුණු මහත් වේදනාව නිසා ඔහු වඩාත් ඕනෑකමින් යාච්ඤා කළේය.+ ඔහුගේ දහඩිය ලේ බිංදු මෙන් වී පොළොවට වැටිණ.+
45 ඔහු යාච්ඤා කළ පසු නැඟිට තම ගෝලයන් ළඟට ගියේය. මහත් ශෝකයකින් සිටි ඔවුන්, විඩාබර වී නිදා සිටිනවා දුටු විට,+
46 “ඔබ නිදා සිටින්නේ ඇයි? යම් වරදක් කිරීමට පෙලඹීමක් ඇති නොවීම සඳහා නැඟිට නොකඩවාම යාච්ඤා කරන්න”+ කියා ඔහු ඔවුන්ට කීවේය.
47 ඔහු ඔවුන් සමඟ කතා කරමින් සිටියදීම පිරිසක් ඔවුන් ළඟට ආවෝය. ඔවුන් ඉදිරියෙන්ම පැමිණියේ දොළොස්දෙනාගෙන් එක් කෙනෙක් වූ යූදස්ය.+ ඔහු යේසුස් ළඟට ඇවිත් යේසුස්ව සිඹගත්තේය.+
48 එවිට යේසුස්, “යූදස්, ඔබ මනුෂ්‍ය පුත්‍රයාව පාවා දෙන්නේ මෙලෙසද”+ කියා ඔහුගෙන් ඇසුවේය.
49 යේසුස් වටා සිටි ඔහුගේ ගෝලයෝ සිදු වන දේ දුටු විට, “ස්වාමීනි, අපි කඩුවෙන් පහර දෙන්නද”+ කියා ඇසූහ.
50 ඒ සමඟම ඔවුන් අතරේ සිටි කෙනෙක් උත්තම පූජකයාගේ දාසයාට කඩුවෙන් පහර දුන්නේය. එවිට ඒ දාසයාගේ දකුණු කන කැපී ගියේය.+
51 නමුත් යේසුස් මැදිහත් වෙමින්, “දැන් ඇති. නතර කරන්න” කියා ඔවුන්ට අණ කළේය. ඉන්පසු ඔහු ඒ දාසයාගේ තුවාල වූ කන ස්පර්ශ කර සුව කළේය.+
52 යේසුස් තමාව රැගෙන යෑමට පැමිණි නායක පූජකයන්ටද දේවමාලිගාවේ ප්‍රධානීන්ටද වැඩිමහල්ලන්ටද මෙසේ කීවේය. “ඔබ කඩු මුගුරු රැගෙන මාව අත්අඩංගුවට ගන්න ආවේ මා සොරෙක් කියා හිතාගෙනද?+
53 මම හැමදාම දේවමාලිගාවේ+ උගන්වමින් සිටියා. නමුත් ඔබ මාව අත්අඩංගුවට ගත්තේ නැහැ.+ කොහොමවුණත් දැන් තමයි ඔබට අවස්ථාවක් ලැබී තිබෙන්නේ.+ මේ තමයි අන්ධකාරය+ රජ කරන වේලාව.”+
54 එවිට ඔවුහු යේසුස්ව අත්අඩංගුවට ගෙන උත්තම පූජකයාගේ+ නිවසට ගෙන ආවෝය.+ මේ අතර පේතෘස් මදක් දුරින් ඔවුන් පසුපස ගියේය.+
55 ඔහු උත්තම පූජකයාගේ නිවසෙහි මළුවට පැමිණි විට පිරිසක් එහි ගිනිමැලයක් දල්වා ඒ අසල ඉඳගෙන සිටිනවා දුටුවේය. ඔහුද ඔවුන් අතරේ ඉඳගත්තේය.+
56 පේතෘස් ගිනිමැලය අසල ඉඳගෙන සිටිනවා දුටු එක්තරා සේවිකාවක් ගිනිමැලයෙන් විහිදුණු එළිය ආධාරයෙන් ඔහු දෙස හොඳින් බලා, “මේ මිනිසාත් යේසුස් සමඟ සිටියා”+ කියා පැවසුවාය.
57 නමුත් ඔහු එය ප්‍රතික්ෂේප කරමින්,+ “මම ඔහුව හඳුනන්නේ නැහැ”+ කියා පිළිතුරු දුන්නේය.
58 කෙටි වේලාවකින් පසු තව කෙනෙක් ඔහුව දැක, “ඔබත් ඔවුන්ගෙන් එක් කෙනෙක් නේද” කියා ඇසුවේය. නමුත් පේතෘස්, “නැහැ, ඔබට වැරදිලා”+ කියා කීවේය.
59 පැයක් පමණ ගත වූ පසු තවත් මිනිසෙක් ඇවිත්, “මේ මිනිසාත් යේසුස් සමඟ සිටියා. ඒ ගැන නම් කිසි සැකයක් නැහැ. ඒ විතරක් නොවෙයි ඔහු ගලීලයේ වැසියෙක්”+ කියා තරයේම කියා සිටියේය.
60 නමුත් පේතෘස්, “ඔබ මොනවා කියනවාද කියලා මට නම් තේරෙන්නේ නැහැ” කියා කීවේය. ඔහු කතා කරමින් සිටියදීම කුකුළෙක් හැඬලුවේය.+
61 එවිට යේසුස් හැරී පේතෘස් දෙස බැලුවේය. “කුකුළා හඬලන්න කලින් ඔබ අද මාව හඳුනන්නේ නැහැ කියා තුන් වතාවක් කියනවා” කියා යේසුස් පැවසූ වචන පේතෘස්ට මතක් වුණේ එවිටයි.+
62 ඔහු පිටතට ගොස් මහත් ශෝකයකින් හැඬුවේය.+
63 මේ අතර යේසුස්ව අත්අඩංගුවට ගත් අය ඔහුට පහර දෙන්නත්+ ඔහුට කවටකම් කරන්නත්+ පටන්ගත්තෝය.+
64 ඔවුහු ඔහුගේ මුහුණ වසා ඔහුට මෙසේ කීවෝය. “ඔබ අනාගතවක්තෘවරයෙක් නම් ඔබට පහර දුන්නේ කවුද කියා කියන්න.”+
65 එමෙන්ම ඔවුහු ඔහුට විරුද්ධව අපහාසාත්මක දේවල්+ බොහොමයක් කීවෝය.
66 උදෑසන වූ විට නායක පූජකයන් සහ නීතිය පිටපත් කරන්නන් ඇතුළු වැඩිමහල්ලන්ගෙන් සමන්විත මුළු මන්ත්‍රණ සභාව එකට රැස් වූහ.+ ඔවුහු යේසුස්ව ඔවුන් රැස් වන ශාලාවට ඇදගෙන ගොස් ඔහුට මෙසේ කීවෝය.+
67 “ඔබ ක්‍රිස්තුස් නම්+ අප ඉදිරියේ ඒ බව කියන්න.” යේසුස් ඔවුන්ට මෙසේ පිළිතුරු දුන්නේය. “මම ඒ දේ ඔබට කිව්වත් ඔබ එය කොහොමටවත් විශ්වාස කරන්නේ නැහැ.+
68 මම ඔබෙන් ප්‍රශ්න ඇසුවත් ඔබ ඒවාට පිළිතුරු දෙන්නෙත් නැහැ.+
69 කොහොමවුණත් මෙතැන් පටන් මනුෂ්‍ය පුත්‍රයා+ බලවත් දෙවිගේ දකුණු පැත්තේ+ ඉඳගෙන සිටියි.”+
70 එය අසා සියලුදෙනාම, “එසේනම් ඔබ දෙවිගේ පුත්‍රයාද” කියා ඇසුවෝය. යේසුස් ඔවුන්ට මෙසේ කීවේය. “ඒ මමයි කියා ඔබ අසන ප්‍රශ්නයෙන්ම පැහැදිලියි.”+
71 එවිට ඔවුහු, “ඔහු පැවසූ දේවල් සියලුදෙනාටම දැන් ඇහුණා නේද?+ අපට තවත් සාක්ෂි අවශ්‍ය නැහැ”+ කියා පැවසූහ.
පාදසටහන්
^ හෝ, “යවනු ලැබූ අයද.”
^ හෝ, “ ‘සන්ධ්‍යා භෝජනය’ නැත්නම් පාස්කුව.”
^ මූ.අ., “ගලක් ගැසිය හැකි තරම් දුරකට ගොස්.”
