Qullaawu Maxaafi xaggate daafira kulanno maxaafa ikka hoogirono, kaaˈlitannota kaajja amaale kulanno. Tini amaale surrete xisso waaddannosi mancho kaaˈlitara dandiitanno. Hanni mito lawishsha laˈno.

“Dhiwantinorira ikkinnina fayyaaleeyyete xagisaanchu dihasiisannonsa.”—MAATEWOOSI 9:12.

Qullaawu Maxaafi xagisiˈra hasiissannonke woyiti noota kulanno. Batinyu manni amadinonsahu surrete dhibbi daafira gara ikkitino mashalaqqe afiˈransanna akime amaaˈlansa wodaninsa harshammi yaanno gede assitinonsa.

‘Manninate kaajjishiˈrate rosi kaaˈlanno.’—1 XIMOOTEWOOSI 4:8.

Yanna gaaˈmite fayyimmate kaaˈlanno coye assakki amadinohehu surrete dhibbinni beedho afiˈratto gede kaaˈlitahera dandiitanno. Lawishshaho, ganyite ispoorte loosa, fayyimmate kaaˈlitanno sagale ita hattono dancha goxicho afiˈra lowore kaaˈlitannohe.

“Hagiirraamu wodani mannimmate fayyimma aanno; dadillaamu wodani kayinni mannimma maniissanno.”—LAWISHSHA 17:22.

Jawaachishshannota Qullaawu Maxaafi qummeeshshuwa nabbawa hattono wonshiˈra dandaatto mixo fushshiˈra hagiirraamo ikkatto gede kaaˈlitannohe.  Dancha danchare hedattohanna albillitte coyi woyyaawannota ammanattoha ikkiro amadinohe qarra dandiite saˈˈa dandaatto.

“Umo heeshshi assa [woy, dhukanke afa] egennote.”—LAWISHSHA 11:2.

Assa hasiˈroottore baalankare umikki assa wolqakkira aleenni ikkitahera dandiitanno; hakko daafira wolootu kaaˈlo gibbooti. Jaallakkinna maatekki kaaˈlitahera hasidhannoha ikkara dandaanno; kayinni insa ma garinni kaaˈlitannohero afa hooggara dandiitanno. Hakko daafira, roorenkanni ma assine kaaˈlinihero woyyannoro kulinsa. Wolqansara aleenni ikkinore assitahera agadhitooti; qoleno insa kaaˈlitinohe daafira woˈmanka woyite galatinsa.

“Dasso giwinoe daafira akimete minira haˈrumma. Akimitteno amadinoe dhibba affu. Tini xissoˈya maatiro bade afeemma gedenna fayyimmaˈya towaaxxate maa maa assa dandeemmaro afeemma gede kaaˈlitinoe.”—Bayipoolaari diisorderi yinannihu surrete dhibbi waadannoseti Nikooli. a

“Minaamaˈya ledo ganye soodo soodo Qullaawa Maxaafa nabbawa, mitto mittonka barra dancha dancharenna jawaachishannore hedeemmo gede kaaˈlitinoe. Qoleno yaaddo quwa saˈannoe barra jawaachishannoe qummeeshsha dihoogeemmo.”—Quwa saˈino yaaddo waaddannosihu Piter.

“Lowo geeshsha saaloomma daafira wolootaho dhibbiˈya daafira kuˈla qarra ikkitinoe. Ikkollana mitte muli jaalaˈya hasaaphanna seekkite macciishshitinoe; hattono ise shaqqillunni qarraˈya huwatate woˈnaaltino. Ise beedho afiˈreemma gedenna callicho ikkoommakkita huwateemma gede kaaˈlitinoe.”—Sagale jilbunni ita qarra ikkitinoseti Jeyu.

“Qullaawu Maxaafi loosoho quwa saeemmokki gedenna dancha gede fooliishshiˈreemmo gede kaaˈlinoe. Qoleno aanno amaale waaddannoe xisso dandee heeˈreemmo gede kaaˈlitinoe.”—Obseesiivi compalsiivi diisorder yinannihu surrete dhibbi waadannosihu Timooti.