“Hashshihunni 7:00 saate geeshsha keeshshine mini looso loosa baasa daafursitanno. Hatte saatera leellannoehu goxicho callaho.”—Deevidi.

 “Mito woyite xiinxallanni hashshihunni 10:30 geeshsha keeshsheemma; hakkiinni, rosu minira haˈrate 12:00 saatenni kaeemma. Horo goxichu nookki heeshshooti!”—Tereesa.

 Aterano mini loosi kokke iillinoheha lawannohe? Hatto ikkiro, kuni birxichi kaaˈlahera dandaanno.

•  Rosiisaano mini looso uyitannohu mayiraati?

•  Xiinxallote kaaˈlitanno amaale

•  Darawokki yitinore

 Mini loosi kaaˈlannohe doogga giddo gama:

•   Egennokki lexxitanno gede assanno

•   Ammaˈninanniha ikkatto gara rosatto

•   Yannakki danchu garinni horoonsiˈratto gara rosatto

•   Kifilete rosoottore hawattokki gede kaaˈlannohe a

 “Rosiisaano mini looso uyitannohu rosaano rossinore mitte maccanni macciishshite mittetenni duna agurte rossinore loosu aana hosiissanno gede kaaˈlateeti.”—Maari.

 Roorenkanni shallagotenna sayinsete rosi qarra tirate dandookki lexxitanno gede assanno. Egennaammu yitanno garinni, surrekki konni garinni qajeelsiˈrakki surrekki giddo haaro doogga kalaqantanno gede assitanno. Hakko daafira mini loosi surrekkira ispoortete gedeeti.

 Mini loosi kaaˈlannoheti leeltuherono leella hoogguherono gataakkireeti. Danchummasi kayinni, uyinanniheha mini loosi geeshsha ajisha dandaattokkiha ikkirono, loosse gudatto yanna haransa dandaatto. Hanni tenne assa dandaatto gara laˈno.

 Mini looso loose guda qarra ikkitannoheha ikkiro, hayyotenni loosa kaaˈlitahera dandiitanno. Aane noore assate woˈnaali.

•   Kaaˈlitanno Amaale 1: Balaxxe qixxaawi. Qullaawu Maxaafi, “Jawaatu manchi hedo jirotenni xaadissanno” yaanno. (Lawishsha 21:5) Mini looso loosattora albaanni, hasiisannohe uduunne baala qixxeessidhe mulekki wodhi; tini ofolloottowiinni kaittokkinni mini loosokki loosiˈratto gede kaaˈlitannohe.

   Qoleno, hedokki billaallitanno gede assannori nookki bayicho doodhi. Mitootu cancu nookkitenna caabbichu dancha gede xawanno kifilera loosa baxxanno. Wolootu kayinni wole bayicho lawishshaho maxaaffate minira hadhe loosa baxxanno.

   “Maa loosattoro daftaraho woy kalaanderete borreessite amaxxakki, yannakki hayyotenni horoonsiˈrate kaaˈlitannohe. Noohehu mini loosi hiikkoyetironna loosse gudattohu mamooteetiro afittoro yaaddokki ajisha dandaatto.”—Richaardi.

•   Kaaˈlitanno Amaale 2: Qinaawoottoha ikki. Qullaawu Maxaafi, “Baalunku coyi garunninna amanyootunni ikko” yaanno. (1 Qorontoosi 14:40) Hakko daafira, mini looso loosatto woyite balaxxe hiikkoye loosattoronna hakkiinni aanchite hiikkoye loosittoro woyyannoro doodhi.

   Mitootu balaxxe kaajjannoha loossanno. Wolootu kayinni aante loossannohura jawaante afidhanno gede shotannonsaha balaxxe loossanno. Lamente giddo atera hiitti woyyitannoro doodha dandaatto.

   “Loosattore borreessite amaxxakki maa loosattoronna hiikkonne balaxxe loosattoro afate kaaˈlitannohe. Hatto assittoro mini loosokki hedootto garinni loosatto daafira loosu batiˈrinoe yite diyaadatto.”—Hayidi.

•   Kaaˈlitanno Amaale 3: Looso rakke hanafi. Qullaawu Maxaafi, “Jawaattine loosse ikkinnina, ceeˈmaleeyye ikkitinoonte” yaanno. (Roomu Sokka 12:11) Mini looso loosatto yanna woluri gudahera wodhitooti.

   Teyo gaˈa yaanno manni duucha woyite loosonsa yannatenni guda didandaanno; qoleno kabbaaname loosanno daafira loosinsa isilancho diˈˈikkanno. Uyinoonniheha mini looso dandaamihe deerrinni bayichonko loosittoro yaaddotenni gatatto.

   “Mini looso rosu mininni daanni heeˈrenni loosummaro woy wole looso bayichonko loosummaro gedensoonni diyaadeemma; wolere asseemma yannano dihoogeemma.”—Seriina.

   KAAˈLITANNO HEDO: Barru baala mini looso loosatto yanna mitte ikkito. Tini ateneeto qeeˈlatto gedenna pirogiraamekki mittu garita ikkitanno gede kaaˈlitannohe.

•   Kaaˈlitanno Amaale 4: Hedokki bebbeehannore hooˈli. Qullaawu Maxaafi, “Illekki dhaabbe laˈo” yaanno. (Lawishsha 4:25) Konne biddishsha harunsatto gede, hedokki billaallitanno gede assanno coye hakko iso elektiroonikisete uduunne hooˈla hasiissannohe.

   Mini looso loossanni heedhe webisayite horoonsiˈrattoha woy silketenni sokka soyattoha ikkiro, mini looso loosse gudatto yanna ero lexxitara dandiitanno. Hedokki bebbeehannore hooˈlittoro kayinni, yaaddokki ajjanno, wolere assateno yanna afiˈratto.

   “Mobayile, kompiyutere, televizhiinenna viidiyote godoˈle hedo billaallitanno gede assitanno. Mobayileˈya hattono hedoˈya bebbeehannoha wole elektiroonikisete uduunne cufaˈya kaaˈlitinoe.”—Joeeli.

•   Kaaˈlitanno Amaale 5: Quwa saˈooti. Qullaawu Maxaafi, “Quwa saˈinannikkire ikkitinoonniti manna baalaho leeltona” yaanno. (Filiphisiyusi Sokka 4:5, Haaro Alame Tiro) Hasiisanno woyite mereeroho fooliishshiˈrakki, mini loosi duha ikkannohekki gede kaaˈlitannohe. Lawishshaho gobbaagge fulte milli yaa, biskilliite kada woy doda dandaatto.

   Tenne amaale harunsitanni heedheennanni mini loosi lowo geeshsha batiˈrinoheha lawihero rosiisaanokkira kuli. Insa mini looso loosate dandiittore baala assitanni noottota affuro, mitore biddi assitara dandiitanno.

   “Mini looso loosate yaaddanni hagiirrikki baˈˈara wodhitooti. Dandiittore baala assi. Mini loosi woy woluri togoori heeshshokki xaxxawe amadara wodhitooti.”—Juuliya.

 Ateneeto togo yite xaˈmi:

•   Mini looso loosate hasiisannoe uduunni maa maati?

•   Mini looso loosate roore injiitannoe yanna hiittenneeti?

•   Hedoˈya billaallitukki xiinxalla dandeemmohu hiikkooti?

•   Teyo gaˈa yaate rosicho agura dandeemmohu hiittoonniiti?

•   Mini looso rahe gudeemmokki gede hedoˈya billaallisannori maati?

•   Hedoˈya bebbeehantanno gede assannoha elektiroonikisete uduunne woy wolere hooˈla dandeemmohu hiittoonniiti?

•   Mini looso looseemmo woyite quwa saeemmokki gede maa assa dandeemmo?

 QAAGIISHSHA: Uyinoonniheha mini looso loosatto gari leellihekki sammi yite saˈooti. Xaˈmo heedhuhero, kifiletenni fulattora albaanni rosiisaanchokki xaˈmi.