Yohaannisi Ajuuja 13:1te kulloonnihu lamala umo afiˈrino moyichi, alamennihu poletiku gashshootira lawishshaho.

•   Kuni moyichi silxaane, wolqanna zuufaane afiˈrinoho; hakko daafira poletiku uurrinshaati yaate.—Yohaannisi Ajuuja 13:2.

•   “Gosate, gaˈretenna addi addi afiinni coyiˈranno manni baalu aana roorre” uyinoonnisi; konni daafira, mitte gobba gashshoote calla diˈˈikkino.—Yohaannisi Ajuuja 13:7.

•   Kuni moyichi Daanieeli 7:2-8 aana kulloonnihu shoolu moyichi dana afiˈrinoho; yaano daguncho lawanno, lekkasi dibi yinanni moyichita labbanno, afoo doobbiicho lawanno, hattono tonne buuda afiˈrino. Daanieeli masaalo giddo kulloonni moyichuwa aante aantete mookkanno mootoollara woy jajjabbu poletiku gashshootira lawishsha ikkitinota xawinsoonni. (Daanieeli 7:17, 23) Konni daafira, Ajuuja fooliishsho 13te kulloonni moyichi addi addi gashshoote giddoseenni amaddinota poletiku dirijjite riqiwanno.

•   Kuni moyichi “baaru giddonni” fulino; hatto yaa mannu gashshooti fulinohu Maganoho hajajantannokkinna hembeelantannote mannu ooso giddonniiti.—Yohaannisi Ajuuja 13:1; Isayaasi 17:12, 13.

•   Qullaawu Maxaafi konni moyichi kiiro woy suˈmi 666 ikkinotanna tini kiiro ‘mannu kiiro’ ikkitinota kulanno. (Yohaannisi Ajuuja 13:17, 18) Tini yaatto, Ajuuja fooliishsho 13te kulli moyichi ayyaana woy agaaninte ikkikkinni mannu dirijjite ikkinota leellishshanno.

 Addi addi gobba mangistubba mimmitu ledo hakkeeshshi geeshsha sumuu yitannokkiha ikkirono, mitto assannonsa coyi no: baalanti Maganu Gashshootira maahoyye yite galantenni gashshootensa cuˈmidhe heeˈra hasidhanno. (Faarso 2:2) Qoleno mangistubba albillitte Armagedooni oli yannara Yesuusi Kiristoosi massagannote Maganu olanto ledo olamate mittimma kalaqidhanno; ikkollana hakkonni oli yannara mannu gashshooti baˈˈanno.—Yohaannisi Ajuuja 16:14, 16; 19:19, 20.

“Tonnu buudinna lamalu umi”

 Qullaawu Maxaafi giddo mite kiiro lawishshu tiro afidhino. Lawishshaho, tonnenna lamala kiiro woˈmilleho (woˈmu coyira) lawishshaho. Ajuujate maxaafira wole bayicho kulloonnihu duumu moyichi misile, Ajuuja fooliishsho 13te kulloonni moyichihu “tonnu buudinna lamalu umi” mayi tiro afiˈrinoro huwatate kaaˈlitannonke; kuni duumu moyichi lamala umonna tonne buuda afiˈrinota kulloonni. (Yohaannisi Ajuuja 13:1, 14, 15; 17:3) Qullaawu Maxaafi konni duumu moyichihu lamalu umi “lamala mootoolla” woy gashshooti lawishsha ikkinota kulanno.—Yohaannisi Ajuuja 17:9, 10.

 Hatteente gede, Ajuuja fooliishsho 13te kulloonni moyichihu lamalu umi lamala gashshoote riqiwanno. Kuri mannu ooso xagge giddo addi addi yannara mookkinoreetinna Maganu manna gadadisate albisa ikkitinore jajjabba poletiku mangistubbaati; insano: Gibitse, Asooru, Baabiloone, Medo-Faarsi, Giriike, Roomahonna Angilo-Ameerikaho. Tonnu buudi (buudu duucha woyite gashshoote riqiwanno) shiimmaaddano ikkito jajjabba umonsa dandiite galtino mangistubbara lawishsha ikkiro, mittu mittunku buudira noo worraaqqi kayinni mitte mittenti mangiste qara poletiku mangiste ledo mitte woggara gashshitannota leellishanno.