Mootichu Hurbaate ayirrinseemmohu Qullaawu Maxaafi giddo kulloonni garinniiti; konne ayyaana, “Mootichu Hurbaate,” Jeefote Hurbaate, hattono Yesuusi Reyo Qaagooshsheno yinanni. (1 Qorontoosi 11:20) Wole batinye ammaˈno kayinni, konne ayyaana lainohunni ammantanno coyinna ayirrissanno gari Qullaawu Maxaafi aana xintaminoha diˈˈikkino.

 Mootichu Hurbaate ayirrinseemmohu, Yesuusi ninke daafira yee reyinota qaange galanteemmota leellishateeti. (Maatewoosi 20:28; 1 Qorontoosi 11:24) Kuni ayyaani Maganu elto woy cubbinkera maaro afiˈrate yine wonshinanniha ammaˈnote bude diˈˈikkino. Qullaawu Maxaafi cubbinkera maaro afiˈneemmohu, ammaˈnote bude wonshine ikkikkinni, Yesuusa ammanne ikkinota kulanno.—Roomu Sokka 3:25; 1 Yohaannisi 2:1, 2.

 Yesuusi rosaanosi Mootichu Hurbaate ayirrissanno gede hajajinoha ikkirono, dirunni meˈˈe higge ayirrisa hasiissannonsaro bade dikulinonsa. (Luqaasi 22:19) Mitu manni konne ayyaana aganu kiiro ayirrisa hasiissanno yee hedanno; wolu manni kayinni lamalate kiiro, barru baala, woy barru giddo duucha hige ayirrisanno; mittu manchi baxisisi yanna baalantera ayirrisa dandaanno yee hedanno mannino no. Ikkollana, hanni heda hasiissannonkeha mito coye laˈno.

 Yesuusi Mootichu Hurbaati ayyaana xintinohu Ayihudete manni Faasiku Ayyaana ayirrisanno barraati; isi reyinohuno hakko barraati. (Maatewoosi 26:1, 2) Kuni hedeweelcho ikkinore diˈˈikkino. Qullaawa Borro Yesuusi kakkalo Faasiku geˈrechi ledo heewisiissanno. (1 Qorontoosi 5:7, 8) Faasiku Ayyaana ayirrinsannihu dirunni mitte hingeeti. (Fulo 12:1-6; Leewaawoota 23:5) Hatteente gede, umi xibbi diri Kiristaani Yesuusi reyo Qaagooshshe ayirrisannohu dirunni mitte higeeti; a Yihowa Farciˈraasineno tenne Qullaawu Maxaafi aana xintantino wodho harunsitanno.

 Yesuusi assinori, Mootichu Hurbaate dirunni meˈˈe hinge ayirrisa hasiissannonkero calla ikkikkinni ayirrinseemmo barranna saateno afate kaaˈlannonke. Yesuusi konne ayyaana xintinohu Qullaawu Maxaafite diru kiiro garinni, Niisaani 14, 33 M.D. arrishsho eˈuhu gedensaanniiti. (Maatewoosi 26:18-20, 26) Ninkeno hundi Kiristaani lawishsha harunsine, Mootichu Hurbaati Ayyaana ayirrinseemmohu diru dirunku Niisaani 14nni arrishsho eˈuhu gedensaanniiti. b

 Niisaani 14, 33 M.D. Arbete barra ikkirono, Niisaani 14nni konne ayyaana ayirrinsanni barri diru kiiro babbaxxara dandaanno. Niisaani 14 mamoote ikkannoro anfeemmohu, xaa yannara noo Ayihude horoonsidhannota diru kiiro harunsine ikkikkinni Yesuusi waro horoonsiˈnannita diru kiiro horoonsiˈneeti. c

 Yesuusi konne haaro ayyaana xinti woyite, Faasiku Ayyaaninni gatinoha shiishinokki timanna woyine horoonsiˈrino. (Maatewoosi 26:26-28) Ninkeno Yesuusi lawishsha harunsine, konni ayyaanira irsho woy wolere worroonnikki tima horoonsiˈneemmo; qoleno woyinete huuncamme, woy coommishate yine mitore karsiinsoonni woyine ikkikkinni mittoreno karsinoonnikkita duume woyine horoonsiˈneemmo.

 Mite ammaˈno shiishino tima woy irsho nooha horoonsidhanno; ikkollana Qullaawu Maxaafi duucha woyite irsho cubbohonna battaawino coyira lawishsha asse kulanno. (Luqaasi 12:1; 1 Qorontoosi 5:6-8; Galatiyu Sokka 5:7-9) Hakko daafira, Kiristoosihu cubbu nookki bisira lawishsha ikka dandaannohu irshonna wolere karsinoonnikki timaati. (1 Pheexiroosi 2:22) Qoleno, Qullaawu Maxaafi woyinete bayicho fultinokki woyine (huuncamme) horoonsiˈra hasiissannota dikulanno. Mite ammaˈno hatto assitannohu ago aga dihasiissanno yite ammantanno daafiraati; Qullaawu Maxaafi kayinni hatto diyaanno.—1 Ximootewoosi 5:23.

 Qaagooshshu Ayyaanira shiqannohu shiishinokki timinna duume woyine Kiristoosi maalinna mundeera lawishshaho. Mitu manni hedanno garinni kuni timinna woyine maalaletenni soorrante Yesuusi maalanna mundee diˈˈikkitanno. Hanni hatto yineemmohu mayiraatiro leellishshannota Qullaawu Maxaafi taje laˈno.

•   Yesuusi rosaanosi mundeesi agganno gede hajajanni nooha ikkoommero, mundee agginoonte yaannoha Maganu seera diigganno gede kulanni noonsa yaate. (Kalaqama 9:4; Soqqamaasinete Looso 15:28, 29) Yesuusi kayinni, mundee qullaawa assine laˈnanni gede Maganu uyino seera diiganno gede manna horonta dihajajanno.—Yohaannisi 8:28, 29.

•   Hakka woyite soqqamaasine Yesuusita addu mundee agganni nooha ikkoommero, isi mundeesi albillitte ‘duˈnantannohu’ gede asse dicoyiˈranno; coyiˈrino gari kayinni hakkawoyite kakkalo ikke reyinokkita leellishannoho.—Maatewoosi 26:28.

•   Yesuusi kakkalo ikkinohu “layinkita lendannikki” garinniiti. (Ibiraawoota 9:25, 26) Mootichu Hurbaati Ayyaana ayirrinsi kiiro timunna woyine soorrante Yesuusi maalanna mundee ikkitannoha ikkiro kayinni, Yesuusi kakkalo wirro wirro higge shiqqanni no yaate.

•   Yesuusi, “Kunninni ane qaagge” yiino ikkinnina “Tenne kakkaloˈya shiqishshe” diyiino.—1 Qorontoosi 11:24.

 Timunna woyine soorrante Yesuusi maalanna mundee ikkitanno yee ammananno manni, hatto yee ammananno gede assinonsahu mite Qullaawu Maxaafi qummeeshshuwa tirroonni garaati. Lawishshaho, batinye Qullaawu Maxaafi tiro Yesuusi woyinete daafira coyiˈrinore, “Tini . . . mundeeˈyaati” yite tirtino. (Maatewoosi 26:28) Ikkollana, Yesuusi coyiˈrino qaale: “Tini mundeeˈyaati yaate,” “Tini mundeeˈyara lawishshaho” woy “Tini mundeeˈya riqibbanno” yineno tira dandiinanni. d Hakko daafira Yesuusi duucha woyite assannonte gede, tenne yannarano misilshunni woy lawishshunni rosiisanni no.—Maatewoosi 13:34, 35.

 Yihowa Farciˈraasine Mootichu Hurbaate ayirrissanno woyite timanna woyine qamasanno manni kiiro shiimate. Mayira?

 Duˈnantinoti Yesuusi mundee Maganu Yihowa hundi Israeele ledo eino gondoori bayicho “haaru gondoori” xintamanno gede assitino. (Ibiraawoota 8:10-13) Hakko daafira, Mootichu Hurbaatira shiqino timanna woyine qamassannori konni haaru gondoori wido ikkitinoreeti. Haaru gondoori wido ikkinohu baalanka Kiristaana ikkikkinni Maganu baxxino garinni ‘woshshino’ manna callaho. (Ibiraawoota 9:15; Luqaasi 22:20) Insa iima Kiristoosi ledo mookkanno; Qullaawu Maxaafi konni manni kiiro 144,000 ikkitinota kulanno.—Luqaasi 22:28-30; Yohaannisi Ajuuja 5:9, 10; 14:1, 3.

 Kiristoosi ledo mookkara woshshantinota “shiima hoshsha” agurranna, ninke giddo rooriidi ‘lowo daga’ wido ikkine uullate aana hegerera heeˈrate hexxo noonkereeti. (Luqaasi 12:32; Yohaannisi Ajuuja 7:9, 10, Haaro Alame Tiro) Uullate aana hegerera heeˈrate hexxo noonkeri Mootichu Hurbaatira shiqanno timanna woyine qamanseemmokkiha ikkirono, Yesuusi ninkera yee kakkalo ikke reyinonketera galaxxate ninkeno mitteenni konne ayyaana ayirrinseemmo.—1 Yohaannisi 2:2.