Yihowa Farciˈraasine ikkinoommo daafira, baalante ammaˈno giddo noo manni ledo ammanate daafira hasaawa banxeemmo; ikkollana, wole ammana harunsanno manni ledo Magano magansiˈrate dikarsammeemmo. Qullaawu Maxaafi addu Kiristaani mimmitu ledo “sufame xaadino” woy mitto ikkino yaanno; addu Kiristaana mitto assannori giddo mittu qaru coyi, ammanansa mittu garita ikkaseeti. (Efesooni Sokka 4:16; 1 Qorontoosi 1:10; Filiphisiyusi Sokka 2:2) Konni garinni mitto ikkate, baxillu, mararro, gatona yaanna woleno kuri labbanno akatta hasiissannota ammana calla diˈˈikkitanno. Ammaˈnonke Qullaawu Maxaafite gara ikkitino egenno aana xintantinote; hatto ikka hoogiro, ammananke haafa ikkitanno.—Roomu Sokka 10:2, 3.

 Qullaawu Maxaafi, wolu gari ammana noonsari ledo karsame magansiˈra lame taaltannokki saada hawuurshaho waaxate gede ikkinota kulanno; togoo waaxama Kiristaanu ammana huntanno. (2 Qorontoosi 6:14-17) Konni daafira Yesuusi, rosaanosi wolootu ledo karsante magansidhara diworino. (Maatewoosi 12:30; Yohaannisi 14:6) Qoleno, Maganu Israeelete uyinohu Muse Seeri Israeele Magano magansiˈrate qooxeessinsara noo daga ledo karsama hasiissannonsakkita kulanno. (Fulo 34:11-14) Yannate gedensaanni, ammanantino Israeele wole ammaˈno harunsitannori ledo ammanatenni quraanyama hasidhinokki daafira kuri uyitannonsa kaaˈlo adha gibbino.—Izira 4:1-3.

 Ee, hasaambeemmo. Soqqamaasinchu Phaawuloosi gede, ninkeno soqqammeemmo woyite ‘dandiinummo deerrinni lowo manni’ hedonna ammanansa huwatate woˈnaalleemmo. (1 Qorontoosi 9:19-22) Hasaawu yannara, Qullaawu Maxaafi yaannonte gede hasaawinseemmo mancho ‘shaqqillunninna owaantetenni’ hasaawisate woˈnaalleemmo.—1 Pheexiroosi 3:15, 16.