“Addinta Magano afa hasiˈrattoha ikkiro, Yihowa Farciˈraasine agudhitooti.” Tenne yaatto macciishshe dhagge assiˈrummo. Hakkawoyite Yihowa Farciˈraasine ledo Qullaawa Maxaafa xiinxalla hanafummonku, shiima yannalla ikkino. Kayinni dhagge assiˈroommohu mayiraatiro leellannoˈne gede, albi heeshshoˈya hiittootero kuleemmoˈne.

 Ilamoommohu Elsalvadoori gobbara Kesaaltipiki yinanni katamiraati. Anniˈyanna amaˈya iltinote 15 ooso giddo ani 6kiho. Anniˈyanna amaˈya ammanamoommohanna higge ayirriseemmoha ikkeemmo gede asse lossinoe. Qoleno Liyonaardonna wole Yihowa Farciˈraasine saˈe saˈe dagge Qullaawa Maxaafa rosiissannonke. Ani kayinni rosiinsoonniere facci asse agure busha heeshsho heeˈra hanafummo. Tonaa shoole diro ikkieta, rosu mini jaallaˈya ledo ago aganna jingilli assitanno xagga adha hanafummo. Kuri jaallaˈya roso agurte mitte durriiyyete gaamo eˈu; anino insa faale haˈrummo. Honseemmohu dooggateeti; manna woxe huucciˈneemmo; qoleno araadonkera woxe afiˈrate yine moorreemmo.

 Hatti durriiyyete gaamo maateˈya ikkitu. Insara ammanamoommoha ikka hasiissannoe yee hedummo. Lawishshaho, mitto barra mittu gaamonke beetti jingilli assitanno xagga adhe heeˈre mitto olliinke beetto gani. Hakkiinni ganantanna olliinke beetti jaalaˈya qeelihu gedensaanni polise woshshi. Tennera giiramoommohu, olliinke beetti jaalaˈya aguranno gede makeenasi dullunni gana hanafummo. Olliinke beetti makeenisi hincilaalluwa gane hiiqqanna hattono makeenasi woxe ikkannokki gede assanna laiti aguri yee huuccie; ani kayinni macciishsha giwummo.

 Tonaa sette diro ikkieta, gaamonke polisete ledo giwantu. Giwanshote yannara bomba tugammora kae heeˈreenna, bombu angaˈya balaxe dhoohi; hiitto ikke dhoohiro diafoommo. Baasa gawajjantino angaˈya laoommoti calla qulli yitannoe; hakkiinni dammummo. Hakkiinni baqqi yoommohu hospitaaleteeti; baqqi yee laeemmo woyite qiniiticho angaˈya murre hoolle kaˈnoonni, qiniiticho maccaˈyano danqitino; qoleno qiniiticho illeˈya ballitinohu gede ikkitino.

 Lowo geeshsha gawajjamoommoha ikkirono, hospitaaletenni fulanni heeˈrenni durriiyyete gaamonkewa haˈrummo. Ikkollana, gari geeshshano keeshshummokki, polise amaddue; hakkiinni usuru minira eessinie. Usuru mine gaamonke ledo albinni roore jaalooˈmummo. Soode hashsha geeshsha, yaano soodo mitteenni maariwaana angeemmo saatenni kayinse hashsha gonxammo geeshsha mitteenni honseemmo.

 Usuru mine heeˈreenna, Liyonaardo laˈˈaera dayi. Hasaambanni heeˈneenna, isi angaˈyara naqqasiˈroommo malaatta laˈˈanni “Tini angakkira naqqasiˈroottoti sase malaatta mayyaatero afootto?” yee xaˈmie. Ani qole, “Eewana. Siimu xaadooshshe, jingilli assitanno xagganna rookinna rooli yinanni muuziiqa yaate” yuummo. Liyonaardo kayinni togo yiie: “Anera kayinni hospitaale, usuru minenna reyo yaa labbannoe. Alba hospitaale eˈe fulootto, xa kayinni usuru mine nootto. Tenne mayi gatinohero afootto.”

 Liyonaardo yiinori lowo geeshsha masisinoe. Yiinori garankolla. Heeˈreemmo heeshshonni, aneneetira waamma uˈmanni noommohu gedeeti. Liyonaardo ledosi Qullaawa Maxaafa xiinxalleemmo gede koyisie; anino maahoyye yuummo. Qullaawu Maxaafinni rosoommori heeshshoˈya biddi assiˈrate kaeemmo gede assinoe. Lawishshaho, Qullaawu Maxaafi “Bushu jaaloomi dancha amanyoote hunanno” yaanno. (1 Qorontoosi 15:33) Konni daafira, umo assa hasiissinoe coyi giddo mittu wole jaalla hasiˈrate. Konnira yee, gaamonke gambooshshe agure, Yihowa Farciˈraasine usuru mine qixxeessitino gambooshshe haˈra hanafummo. Hakko gambooshshiwa, usuru mine heeˈrenni cuuame Yihowa Farciˈraasincho ikkinohu Aandiresi yinanni usuranyi ledo egennamummo. Isi ledosi afoo seekkiˈreemmo gede koyisie. Hakko barrinni hanafe, soodo soodo maariwaana aga agurummo. Hatteentenni, Aandiresi ledo mitto Qullaawu Maxaafi qummeeshsha hasaambeemmo.

 Gaamote miilla bayichonko, albi gede ikka aguranni noommota huwattu. Konni daafira, gaamote roorrooti giddo mittu hasiˈroommohe yiie. Hatto yiieta lowo geeshsha waajjoommo. Durriiyyete gaamo giddonni fula qarra ikkitinota afoommo daafira, hedoommore afiro hiissaekka yee yaadoommo. Isi togo yiie: “Ninke gambooshshe agurte Yihowa Farciˈraasine gambooshshe haˈrattota anfoommo. Ma heddeeti?” Ani qole, Qullaawa Maxaafa xiinxallanna heeshshoˈya biddi assiˈra hasiˈroommo yuummo. Hakkiinni roorrichu, Yihowa Farciˈraasincho ikka addinta hasiˈreemmota leellisheemmoha ikkiro, gaamo tenne digibbanno yiie; hatto yaannoe yee hedoommokki daafira dhagge ikkie. Hakkiinni togo yiie: “Addinta Magano afa hasiˈrattoha ikkiro, Yihowa Farciˈraasine agudhitooti. Bushare assa agurattora hasiˈneemmo. Hawalle hagiidhootto. Dancha doogo haˈra hanafootto. Yihowa Farciˈraasine seekkite kaaˈlitannohe. Alba Yunayitidi Isteetisete noommo waro insa ledo xiinxalloommo; maateˈya miilla giddo gamu Yihowa Farciˈraasineeti. Waajjitooti. Jawaati.” Hatte saatera waajja woˈmunni woˈma aguroommokkiha ikkirono, giddoˈya lowo geeshsha hagiidhitino. Wodaniˈyanni Yihowa galaxxummo. Lowo duhi aaniˈyanni hoˈlinoehu gede uffa yuummo; qoleno Yesuusi “Halaale affinanni; halaaluno borojjimmatenni fushshannoˈne” yaasi mayyaatero leellie.—Yohaannisi 8:32.

 Ikkollana, albi jaallaˈya giddo mitootu jingilli assitanno xagga adheemmo gede xixxiibbue. Hige qeelamoommo woyiti noota dikaadeemmo. Ikkirono gale hosanni, duucha hige eeggifate huuccatto assiˈrummo gedensaanni, araadoˈya qeeˈla dandoommo.—Faarso 51:10, 11.

 Usuru mininni fulummota, duuchu mannira galagale albi heeshshoˈyawa higeemmoha lawinonsa; ani kayinni dihigoommo. Qullaawu Maxaafinni rosoommore wolu usuranyira kulammora duucha hige usuru minira mareemmo. Jeefoteno, albi jaallaˈya albi heeshshoˈya aguroommota ammantu. Albi baarigaarraˈya kayinni tenne diammantino.

 Mitto barra mittu rodii ledo sabbankammora fulle heeˈneenna, alba ani noommo gaamora baarigaara ikkitino gaamo shitaera hasidhe massaara qodhite doyissitunke. Soqqanshote miiliˈya hatte farora, ani xaate durriiyyete gaamo wido ikkoommokkita shaqqillunni kulinsa. Ani kayinni wodanaaˈmate woˈnaalummo. Insa gantuehunna layinkita hakka hige mareemmokki gede kultuehu gedensaanni, massaaransa dirrisse hadhe yitunke. Addanko Qullaawu Maxaafi heeshshoˈya biddi assinoe. Bashshootiro rabbisiˈrate woˈnaaleemmo. Xa kayinni 1 Teselonqe 5:15 noo amaale harunseemmo; qummeeshshu togo yaanno: “Bunshe assinohura ayino bado qoloonke. Hatteentenni woˈmanka woyite mimmitiˈneranna wolu manni baalaho dancha coye assate jawaatte.”

 Yihowa Farciˈraasincho ikkummo barrinni kayise, ammanamoommo mancho ikkate sharramoommo. Hige tini shota diˈˈikkitino. Ikkirono, Maganu Yihowa kaaˈlonni, Qullaawu Maxaafi amaalenninna haaruuddu jaallaˈya irkonni qinaawinoe. Albi heeshshoˈyawa horonta higa dihasiˈreemmo.—2 Pheexiroosi 2:22.

 Ani alba shittahonna hanqaaleessa manchooti. Hattee shittimmaˈya agura hoogoommoro, techo lubbotenni diheeˈreemmo. Qullaawu Maxaafinni rosoommo rosi heeshshoˈya biddi assinoe. Albi rosichoˈya baala aguroommo. Albi baarigaarraˈya ledo keerunni heeˈreemmo gara rosoommo. (Luqaasi 6:27) Qoleno dancha akatta heedhannoe gede kaaˈlitannoeti dancha jaalla nooe. (Lawishsha 13:20) Assoommo bunshe baala gatona yiinoe Maganira soqqamanni, hagiirru noo heeshsho heeˈranni noommo.—Isayaasi 1:18.

 Gedensoonni 2006nni, adhaminokki Kiristaanira qixxeessinoonnita wongeelu korse adhummo. Boodu diri gedensaanni, muxxe galteˈya adhummo; xa mitteenni qaaqqonke lossiˈnanni heeˈnoommo. Xa roore yannaˈya, ane kaaˈlinoeha Qullaawu Maxaafi biddishsha wolootaho rosiisanni sayiseemmo. Qoleno noommo songora cimeessa ikke soqqamanni noommo; hattono wedellootu ani insa geeshshihu heeˈre loosoommo soˈro loossannokki gede kaaˈlate woˈnaaleemmo. Xa aneneetira waamma uˈma agure, Maganu Qullaawu Maxaafi giddo kulinota hegere heeshsho afiˈrate qixxaawanni noommo.