Po o se Agasala le Taalo i Taaloga Faitupe?

PLAY

Tali a le Tusi Paia

E ui e lē o faamatalaina auʻiliʻili mai e le Tusi Paia le taaalo i taaloga faitupe, ae ua mafai ona tatou iloa mai i mataupu silisili a le Tusi Paia e faapea, e silasila le Atua i le taalo i taaloga faitupe o se agasala.—Efeso 5:17. a

E faagaee e taaloga faitupe le matapeʻapeʻa, o se mea lea e ʻinoʻino i ai le Atua. (1 Korinito 6:9, 10; Efeso 5:3, 5) E manatu ē e taaalo i taaloga faitupe e latou te maua tupe e ala i le faiaʻina o isi, peitaʻi e taʻusalaina e le Tusi Paia le manaʻonaʻo fua i mea a isi tagata.—Esoto 20:17; Roma 7:7; 13:9, 10.
O le taalo i taaloga faitupe e tusa lava pe itiiti se tupe e alu ai, e mafai ona faagaee ai le manaʻo tele i tupe.—1 Timoteo 6:9, 10.
O tagata taalo i taaloga faitupe e masani ona faamoemoe i faiga faanuupō po o le laki. Peitaʻi o le silafaga a le Atua i na talitonuga o se faiga ifo i tupua, e lē talafeagai ma lana tapuaʻiga.—Isaia 65:11.
Nai lo o le faagaee o se faanaunauga ina ia maua fua mai se mea, ua faalaeiauina e le Tusi Paia le galulue mamafa. (Failauga 2:24; Efeso 4:28) O i latou e mulimuli i le fautuaga a le Tusi Paia, e “aai i meaʻai na alu ai lo latou afu.”—2 Tesalonia 3:10, 12.
O le taalo i taaloga faitupe e faagaee ai le agaga tauvā, lea e lē lagolagoina e le Tusi Paia.—Kalatia 5:26

a E pau le mea o loo taʻua ai i le Tusi Paia taaloga faitupe e fesootaʻi atu i fitafita Roma, o ē sa iai le uiga matapeʻapeʻa ia sa faia le vili po o “taaloga faitupe” i ofu o Iesu.—Mataio 27:35; Ioane 19:23, 24; Contemporary English Version; Good News Translation.