Bibele e ile ya bolela esale pele hore ho tla ba le mafu a sewa nakong ya matsatsi a ho qetela. (Luka 21:11) Mafu ana a sewa ha se kotlo e tswang ho Modimo. Ha e le hantle, ha Mmuso wa Modimo o busa lefatsheng, o tlo fedisa ho kula le mafu a sewa.

•  Na Bibele e ile ya bua esale pele ka mafu a sewa?

•  Na Modimo o kile a otla batho ka ho kula?

•  Na kajeno mafu a sewa ke kotlo e tswang ho Modimo?

•  Na mafu a sewa a tla ke a fele?

•  Ditemana tsa Bibele tse buang ka ho kula

Bibele ha e bue ka ho toba ka mafu a sewa, a kang COVID-19, AIDS, TB, malaria kapa Spanish flu. Empa e ile ya bua ka “mafu a sewa” le “lefu la sewa le bolayang.” (Luka 21:11; Tšenolo 6:8) Dintho tsena ke pontsho ya hore re phela “matsatsing a ho qetela,” a boetseng a bitswang “qetello ya tsamaiso ya dintho.”​—2 Timothea 3:1; Matheu 24:3.

Bibele e bua ka diketsahalo tse mmalwa tseo ho tsona Modimo a ileng a sebedisa ho kula ho otla batho. Ka mohlala, o ile a etsa hore batho ba bang ba be le lepera. (Numere 12:1-16; 2 Marena 5:20-27; 2 Likronike 26:16-21) Empa mafu ao a ne a sa tshwaetse batho ba se nang molato. Ho ena le hoo, a ne a tshwara batho bao ka ho kgetheha ba neng ba fetohetse Modimo.

Tjhe. Kajeno batho ba bang ba re Modimo o otla batho a sebedisa mafu a sewa le mafu a mang. Le ha ho le jwalo, Bibele ha e dumellane le seo. Hobaneng?

Ha e le hantle, ba bang ba bahlanka ba Modimo ba ile ba angwa ke mafu ana a sewa nakong e fetileng le hona jwale. Ka mohlala, mohlanka wa Modimo ya tshepahalang Timothea, o ile a ba le “maemo a . . . ho kula kgafetsa.” (1 Timothea 5:23) Empa ha hona moo Bibele e reng e ne e le hobane Modimo o ne a mo otla. Ka tsela e tshwanang, kajeno bahlanka ba Modimo ba tshepahalang ba tshwaetswa ke malwetse. Hangata ke ka lebaka la hore ba ne ba le sebakeng se fosahetseng ka nako e fosahetseng.​—Moeklesia 9:11.

Ho feta moo, Bibele e re nako ya hore Modimo a otle batho ba kgopo ha e so fihle. Ho ena le hoo, re phela nakong ya “letsatsi la poloko” eo ka yona Modimo a memang batho bohle hore ba tle ho yena e le hore ba bolokehe. (2 Bakorinthe 6:2) O boetse o mema batho ka hore ba bolellwe molaetsa o thabisang, e leng ‘ditaba tse molemo tsa mmuso.’​—Matheu 24:14.

Ho jwalo. Bibele e bua ka nako eo ka yona ho ke keng ha hlola ho e ba le motho ya kulang. Ha Mmuso wa hae o se o busa lefatsheng, Modimo o tla fedisa mafu ohle. (Esaia 33:24; 35:5, 6) O tla boela a fedise dintho tse bohloko ha mmoho le lefu. (Tšenolo 21:4) Hape o tla tsosa bafu e le hore ba thabele ho phela lefatsheng le se nang ho kula le le phethahetseng.​—Pesaleme 37:29; Liketso 24:15.

Tšenolo 6:8: “Bonang! pere e botala bo bosehla; mme lebitso la ya e palameng e ne e le Lefu. Hadese e ne e mo latela haufiufi. Tsa fuwa matla . . . hore di bolaye ka . . . lefu la sewa le bolayang.”

Seo se bolelang?: Boprofeta bo buang ka banna ba bane ba dipere bo bontsha hore mafu a sewa a tla ba teng matsatsing a na.