Ke Joang Theknoloji e ka Amang Setsoalle sa Hao le Batho ba Bang?
Batho ba babeli ba lulang libakeng tse peli tse sa tšoaneng ba ka khona ho buisana, haholo-holo ka ho romellana melaetsa, li email, ba sebelisa video le marang-rang. Ba sebelisa theknoloji ka tsela e ba tsoelang molemo.
Leha ho le joalo, batho ba sebelisang theknoloji haholo ho bua le metsoalle ea bona ba ka ba le bothata ba . . .
-
ho se utloele metsoalle ea bona bohloko.
-
ho jeoa ke bolutu le ho ikutloa ba se na thuso.
-
ho inahana bo bona ho feta ho nahana ka metsoalle ea bona.
SEO U LOKELANG HO SE TSEBA
KUTLOELO-BOHLOKO
Ha re utloela motho bohloko re nka nako re nahana ka eena le ka tsela eo a ikutloang ka eona, e leng ntho eo re sa khoneng ho e etsa haeba re lula re bala le ho romela melaetsa re sebelisa marang-rang.
Haeba theknoloji e u laola, ha nako e ntse e-ea u tla utloa eka ho araba melaetsa ea metsoalle ea hao ke mosebetsi. U ka batla ho bona feela u arabile melaetsa eohle eo u e fumaneng, ho akarelletsa le molaetsa oa motsoalle oa hao ea hlokang thuso.
SEO U KA NAHANANG KA SONA: U ka bontša hore u ‘utloela metsoalle ea hao bohloko’ joang ha u buisana le eona ka marang-rang?—1 PETROSE 3:8.
HO IKUTLOA U SE NA THUSO
Bafuputsi ba bang ba fumane hore batho ba bangata ba ikutloa ba tetebetse le ho feta ka mor’a hore ba shebe marang-rang. Bafuputsi bao ba entse qeto ea hore ho sheba lifoto tsa batho ba bang le lintho tseo ba ntseng ba li etsa, ho ka siea motho “a ikutloa eka ha ho na ntho ea bohlokoa eo a e entseng ka nako ea hae.”
Hape ho sheba lifoto tsa batho ba bang moo ba thabileng, ho ka etsa hore batho ba bang ba ipapise le bona ho sa hlokahale. Ho ka etsa hore ho bonahale eka motho e mong le e mong oa ithabisa, ha uena bophelong ba hao ho se na letho le monate le etsahalang.
SEO U KA NAHANANG KA SONA: Ha u sebelisa marang-rang, ke joang u ka qobang ho ipapisa le batho ba bang ho sa hlokahale? —BAGALATA 6:4.
HO INAHANA HO TLOLA
Tichere e ’ngoe e ile ea re baithuti ba bang ba hae e ne e le baithati ’me ba batla ho etsa setsoalle feela le batho ba neng ba tla ba etsetsa lintho. * Motho ea etsang setsoalle se joalo o amehile feela ka hore na eena o tla fumana’ng ho sona. Motho ea joalo a ka nahana hore metsoalle ea hae e tšoana le lifono kapa lik’homphieutha tseo a tla ithabisa ka tsona ha a batla e be o li behella ka thoko ha a sa li hloke.
SEO U KA NAHANANG KA SONA: Na lintho tseo u li behang Inthaneteng li bontša hore u rata ho hlolisa batho ba bang kapa u inahana ho tlola?—BAGALATA 5:26.
SEO U KA SE ETSANG
ITLHAHLOBE HORE NA U SEBELISA THEKNOLOJI JOANG
Ha u laola theknoloji ho e-na le hore eona e u laole, e tla u thusa hore u buisane le metsoalle ea hao le hore le matlafatse setsoalle sa lona.
KELETSO EA BIBELE: “Lerato . . . ha le batle lithahasello tsa lona.”—1 BAKORINTHE 13:4, 5.
Khetha litlhahiso tseo u batlang ho li sebelisa kapa u ingolle lintho tseo u batlang ho li etsa.
-
Buisana le batho ka ho toba (ho e-na le hore u ba ngolle melaetsa ka fono kapa email)
-
Behella fono ka thoko (kapa u e time) ha u qoqa le batho ba bang
-
Fokotsa nako eo u e qetang u ntse u sheba marang-rang
-
Mamela batho ba bang ka hloko
-
Bua le motsoalle oa hao ea nang le mathata
^ ser. 17 Mantsoe ana a tsoa bukeng e bitsoang Reclaiming Conversation.
Mohlomong u ka Rata le
TSOHA!
Motsoalle oa Sebele ke ea Joang?
Batho ba bangata ba nka hore ke habohlokoa ho ba le metsoalle ea sebele. U ka ba motsoalle oa sebele joang ho ba bang? Sehlooho sena se tšohla melao-motheo e mene e fumanehang ka Bibeleng.
TSOHA!
U ka Etsa Melaetsa ea Selefouno ka Bohlale Joang?
Na ke phoso ho khaotsa moqoqo e le hore feela u bale molaetsa oa selefouno? Kapa na ke phoso ho iphapanyetsa molaetsa oa selefouno e le hore feela u tsoele pele ka moqoqo?
