‘Iha minutu neʼebé buat hotu hahú, haʼu hanoin: “Nia mak ida neʼebé haʼu hakarak. Haʼu sei moris hamutuk ho nia ba nafatin.” Maibé ami halaʼo domin ba fulan rua deʼit, no haʼu tenke fó para nia. Haʼu la bele fiar katak ami-nia domin hanesan lalatak neʼebé lakon lalais deʼit!’—Ana. *

“Foufoun haʼu sente nia mak haʼu-nia fuan-sorin no loron ida ami sei kaben tanba ami iha buat barak neʼebé hanesan. Maibé nuʼudar tempu liu, haʼu bele haree katak ami rua la hanesan duni. Ikusmai, ami tenke hakotu domin neʼe.”—Elena.

Ó mós hasoru daudauk situasaun hanesan neʼe ka lae? Se nuneʼe, informasaun tuirmai sei ajuda ó.

Se domin kotu iha dalan klaran, neʼe bele hakanek rua-rua nia laran. Feto ida naran Sara, neʼebé ikusmai fó para nia namoradu bainhira sira tuir malu ba fulan neen ona, dehan: “Haʼu sente laran-kanek tebes! Horisehik nia mak haʼu-nia doben, haʼu-nia moris no futuru, maibé agora nia la iha ona. Bainhira haʼu rona fali múzika neʼebé ami naʼin-rua gosta no bá fali fatin neʼebé uluk ami koʼalia domin ba malu, neʼe halo haʼu hanoin fali ba tempu neʼebé ami sei hamutuk. Haʼu sente laran-dodok maski haʼu mak fó para nia!”

Dala ruma hakotu domin mak diʼak liu. Elena hatete: ‘Ita hotu lakohi halo ema nia laran moras. Maibé Ita mós tenke hatene katak se Ita obriga an hamutuk nafatin ho ema neʼebé la hanesan ho Ita-nia hakarak, neʼe hanesan bosok Ita-nia an no ikusmai sei hakanek nia no Ita-nia laran.’ Sara mós hatete: “Se agora Ita la kontente ho Ita-nia namoradu, klaru katak depois kaben mós Ita sei la kontente duni ho nia. Se nuneʼe, diʼak liu hakotu kedas agora bainhira seidauk tarde.”

Fó para laʼós katak Ita mak ema laran-aat. Tempu namora la dehan katak Ita tenke kaben ho ema neʼe, maibé neʼe mak tempu atu koñese malu no hanoin didiʼak Ita hakarak duni moris hamutuk ho nia ka lae. Atu mane ka feto, se Ita sente laran-rua hela ho domin neʼebé Ita halaʼo ka iha hahalok ruma neʼebé hatudu katak Ita sei la kontente bainhira moris hamutuk ho nia, diʼak liu mak hakotu kedas. Loos, maski neʼe hakanek laran, maibé Ita bele laʼo ba oin!

Hatene bá katak laran sei moras duni. Elena neʼebé foin temi iha pájina sorin, dehan: “Haʼu lakon haʼu-nia doben, haʼu-nia belun neʼebé diʼak liu.” Loos, se domin neʼebé Ita halaʼo tenke kotu iha dalan klaran, neʼe han tempu kleur atu sente diʼak fali. Mane ida naran Adão mós dehan: “Neʼe halo haʼu-nia fuan rahun loos maski haʼu hatene neʼe mak desizaun diʼak.” Karik Ita sente hanesan Liurai David iha tempu uluk, bainhira nia laran-triste, nia dehan: “Kalan tomak haʼu habokon haʼu-nia toba-fatin ho matan-been.” (Salmo [Mazmur] 6:6) Tan neʼe, hatene bá katak ita sei laran-moras duni. Hodi simu realidade neʼe bele halo ita sente diʼak fali.—Bíblia nia matadalan: Salmo (Mazmur) 4:4.

Ransu ho ema neʼebé hanoin Ita. Ana, neʼebé mós foin temi iha pájina sorin, dehan: “Foufoun neʼe halo haʼu hakarak mesamesak deʼit no lakohi hasoru ema ida. Tanba haʼu hanoin haʼu presiza tempu atu komprende didiʼak fali buat neʼebé akontese ona.” Maibé ikusmai, Ana hatene katak neʼe la ajuda nia atu sente diʼak fali, nia presiza duni ransu hamutuk ho belun sira neʼebé bele halo kontente nia. Nia hatutan tan: “Agora, haʼu la sente triste tan hanesan uluk.”—Bíblia nia matadalan: Provérbios (Amsal) 17:17.

Aprende husi buat neʼebé akontese ona. Husu ba Ita-nia an: ‘Neʼe halo haʼu aprende katak haʼu tenke hadiʼa haʼu-nia hahalok ruma ka lae? Se haʼu namora fali ho ema seluk, diʼak liu haʼu tenke hatudu hahalok hanesan saida?’ Feto ida naran Marcia mós hatete: “Maski ba tempu kleur haʼu sente laran-kanek, maibé ikusmai haʼu bele iha hanoin neʼebé loos kona-ba buat neʼebé akontese ona.” Adão neʼebé foin temi mós dehan: “Haʼu presiza tinan ida atu bele sente diʼak fali. Maibé haʼu presiza tempu kleur tebes atubele aprende husi esperiénsia neʼe kona-ba haʼu-nia an, haʼu mak ema oinsá, kona-ba feto nia hanoin no sentimentu, no mós oinsá haʼu bele hatudu hahalok diʼak bainhira namora. Agora haʼu la sente laran-moras tan.”

Halo orasaun ba Maromak. Bíblia hatete Maromak sei “kura ema neʼebé laran-kanek”. (Salmo [Mazmur] 147:3) Maromak nunka fó destinu ba ema ida atu kaben ho ema ruma (jodoh), nuneʼe bainhira imi hakotu domin, labele duun fali katak Maromak mak lakohi imi moris hamutuk. Maibé Maromak sempre hanoin kona-ba imi-nia diʼak. Tan neʼe, fakar sai imi-nia sentimentu tomak ba Nia liuhusi orasaun.—Bíblia nia matadalan: 1 Pedro 5:7.