Re dira sentle fa re boifa loso jaaka mmaba re bo re dira se re ka se kgonang go itshireletsa. (1 Bakorintha 15:26) Le fa go ntse jalo, go boifa loso mo go theilweng mo maakeng kgotsa mo tumelobotlhoding go dira gore batho ba nne mo “botlhankeng botshelo jotlhe jwa bone.” (Bahebera 2:15) Go itse boammaaruri go tla dira gore o se ka wa boifa loso ka tsela e e feteletseng, e leng poifo e e ka dirang gore o se ka wa itumelela botshelo.—Johane 8:32.

Boammaaruri ka loso

• Baswi ga ba itse sepe. (Pesalema 146:4) Ga o a tshwanela go boifa gore o tla utlwa botlhoko kgotsa gore o tla utlwisiwa botlhoko fa o sena go swa ka gonne Baebele e tshwantsha loso le boroko.—Pesalema 13:3; Johane 11:11-14.

• Baswi ba ka se re utlwise botlhoko. Tota le baba ba ba neng ba le kotsi ga ba na “maatla mo losong.” (Diane 21:16) Baebele ya re “letlhoo la bone le lefufa la bone di setse di nyeletse.”—Moreri 9:6.

• Fa re swa, seo ga se reye gore go fedile gotlhelele ka rona. Modimo o tla tsosa batho ba ba suleng.—Johane 5:28, 29; Ditiro 24:15.

• Modimo o re solofetsa gore go tla nna le nako e ka yone ‘loso lo tla bong lo seyo.’ (Tshenolo 21:4) Fa Baebele e bua ka nako eo ya re: “Basiami ba tla rua lefatshe, mme ba tla aga mo go lone ka bosakhutleng,” ba sa boife gore ba tla swa.—Pesalema 37:29.