“ʻOku lava ke hā ngali taʻeoli ʻa e Tohi Tapú,” ko e lau ia ʻa ha toʻutupu ko Will, “kapau ʻoku ʻikai ke ke ʻiloʻi ʻa e founga totonu ke lau ai iá.”

 Te ke saiʻia ke ʻiloʻi ʻa e fakapulipuli ki he founga ke ʻai ai hoʻo lau Tohi Tapú ke fakafiefiá? Ko e kupu ko ení te ne tokoniʻi koe.

•  ʻAi ʻa e Tohi Tapú ke moʻui

•  Fekumi!

•  Meʻa ʻoku leaʻaki ʻe ho toʻumeʻá

 Fakakau koe ʻi he meʻa ʻokú ke laú. ʻE lava ke ke ngāueʻaki eni:

1.   Fili ha fakamatala ʻi he Tohi Tapú ʻa ia te ke saiʻia ke akó. ʻE lava ke ke fili ha meʻa naʻe hoko ʻi he Tohi Tapú pe ko ha konga mei he Kōsipelí, pe te ke fili ha fakamatala mei he ngaahi tulama hiki-leʻo ʻo e lau Tohi Tapú ʻoku ala maʻu ʻi he jw.org.

2.   Lau ʻa e fakamatalá. ʻE lava ke ke lau toko taha pē ia ʻe koe, pe te ke lau leʻo-lahi ia mo e ngaahi kaumeʻá pe ngaahi mēmipa ʻo e fāmilí. Vaheʻi ha tokotaha ke ne lau ʻa e fakamatalá pea ko e niʻihi ke nau lau ʻa e faʻahinga ʻi he vahé.

3.   ʻAhiʻahiʻi ha taha pe lahi ange ʻi he ngaahi fokotuʻu ko ení:

   •   Tā ha ngaahi fakatātā ke fakatātaaʻi ʻa e fakamatalá. Pe tā ha fanga kiʻi fakatātā faingofua ʻa ia te ne fakatātaaʻi ʻa e hokohoko ʻo e ngaahi meʻá. ʻAi ha kiʻi fakamatala ʻo e fakatātaá ke fakamatalaʻi ʻa e meʻa ʻoku hoko ʻi he konga taki taha.

   •   ʻI hoʻo lau fekauʻaki mo ha tokotaha faitōnunga, tohiʻi hifo ʻa e ngaahi ʻulungaanga mo e ngāue ʻa e tokotaha ko iá pea mo e ngaahi tāpuaki naʻá ne maʻú.

   •   Liliu ʻa e fakamatalá ki ha ongoongo. Līpooti ʻa e meʻa naʻe hokó mei he tafaʻaki kehekehe, pea fakakau ai ʻa e “ngaahi fakaʻekeʻeke” ʻo e faʻahinga tefitó mo e faʻahinga naʻe sio tonu aí.

   •   Kapau ko e tokotaha ʻi he fakamatalá naʻá ne fai ha fili taʻefakapotopoto, sioloto atu ki ha ikuʻanga kehe. Ko e fakatātaá, fakakaukau atu ki hono fakafisingaʻi ʻe Pita ʻa Sīsuú. (Maʻake 14:66-​72) Naʻe mei lava fēfē ke fai ʻe Pita ha tali lelei ange ki he tenge ko iá?

   •   Kapau ʻokú ke ongoʻi te ke lava ʻo fakahaaʻi ha ngaahi fakakaukau foʻou, faʻu haʻo tulama pē ʻaʻau ʻo makatuʻunga ʻi ha fakamatala Fakatohitapu. Fakakau ai ha ngaahi lēsoni ʻe lava ke ako mei he fakamatalá.​—Loma 15:4.

 Kapau te ke ʻanalaiso ʻa e ngaahi fakaikiikí, ʻe lava ke ke ʻilo ai ʻa e ngaahi koloa fufū ʻi he fakamatalá. Ko hono moʻoní, ʻi he taimi ʻe niʻihi ko ha foʻi lea ʻe taha pe ua ʻi ha fakamatala ʻi he Tohi Tapú ʻoku mahuʻinga.

 Ko e fakatātaá, fakafehoanaki ʻa e Mātiu 28:7 mo e Maʻake 16:7.

•    Ko e hā naʻe fakakau ai ʻe Maʻake ʻa e fakaikiiki ʻe vave ke hā ʻa Sīsū ki he kau ākongá “mo Pita”?

•  Tokoni: Naʻe ʻikai ke sio tonu ʻa Maʻake ia ʻi he ngaahi meʻá ni; ka naʻá ne maʻu ʻene fakamatalá meia Pita.

•  Ko e makakoloa fufū: Ko e hā naʻe ongoʻi fiemālie ai ʻa Pita ke fanongo naʻe loto ʻa Sīsū ke toe sio ange ki aí? (Maʻake 14:66-​72) Naʻe anga-fēfē hono fakamoʻoniʻi ʻe Sīsū tonu ko ha kaumeʻa moʻoni ia kia Pita? ʻE lava fēfē ke ke faʻifaʻitaki kia Sīsū pea hoko ko ha kaumeʻa moʻoni ki he niʻihi kehé?

 ʻI hoʻo ʻai ʻa e Tohi Tapú ke moʻuí pea fekumi ki hono ngaahi fakaikiikí, ʻoku hoko ai ʻa e lau Tohi Tapú ʻo fakafiefia ange!