Johane 14:1-31
14 “Myoyo yanu itapengi.+ Amusyome Leza;+ amundisyome andime.
2 Muŋanda ya Taata muli makkalilo* manji. Nikwatali boobo, nindamwaambila nkaambo nduunka kuyoomubambila busena.+
3 Alimwi ikuti nduunke kuyoomubambila busena, ndiyooboola alimwi eelyo ndiyoomutolelezya kuŋanda yangu, kutegwa ooko nkondinoobede andinywe mukabe nkuko.+
4 Eelyo ooko nkonduunka muliizyi nzila.”
5 Tomasi+ wakati kulinguwe: “O Mwami, tatukuzyi pe nkoya. Ino inga twaizyiba buti nzila?”
6 Jesu wakati kulinguwe: “Ndime nzila,+ kasimpe+ alimwi abuumi.+ Kunyina uuboola kuli Taata ccita kuti wainda mulindime.+
7 Ikuti nobaalumi nywebo nomwalindizyi kabotu, nomwalimuzyi awalo Taata; kuzwa lino mulimuzyi alimwi mwamubona.”+
8 Filipo wakati kulinguwe: “O Mwami, kotutondezya Bauso, eelyo tulasalalilwa.”
9 Jesu wakati kulinguwe: “Nobaalumi nywebo, ikulampa ciindi ncondakkala andinywe, pele Filipo sena tonandizyiba? Kufwumbwa ooyo wandibona wamubona awalo Taata.+ Ino nkaambo nzi ncoamba kuti, ‘Kotutondezya Bauso’?
10 Sena tosyomi kuti mebo a Taata tulikamantene?+ Zintu nzyendimwaambila nywebo nobaalumi tandizyaambi mukuyanda kwangu ndemwini pe,+ pele Taata ngotukamantene limwi lyoonse nguucita milimo yakwe.
11 Amundisyome ikuti mebo a Taata tulikamantene; kwataba boobo, amusyome akaambo kamilimo iini.+
12 Ncobeni ndimwaambila masimpe kuti, kufwumbwa uundisyoma awalo uyoocita milimo njondicita; alimwi uyoocita milimo mipati kwiinda yeeyi,+ nkaambo mebo nduunka kuli Taata.+
13 Alimwi kufwumbwa ncomulomba muzina lyangu, ndiyoocicita cintu eeco, ikutegwa Taata akalemekwe kwiinda mu Mwana.+
14 Ikuti mwalomba cili coonse muzina lyangu, ndiyoocicita.
15 “Ikuti kamundiyanda ncobeni, munootobela milawo yangu.+
16 Alimwi ndiyoomulomba Taata, eelyo uyoomupa mugwasyi* uumbi ngomunooli limwi kukabe kutamani,+
17 nkokuti muuya wakasimpe,+ ooyo ngoitakonzyi kutambula nyika, nkaambo tayuubwene alimwi tayuuzyi pe.+ Nywebo muluuzyi, nkaambo ulaandinywe lyoonse alimwi uli mulindinywe.
18 Tandikamusiyi mubuumba.* Ndilaboola kulindinywe.+
19 Muciindi cisyoonto inyika tiikandiboni limbi pe, pele nywebo muyoondibona+ nkaambo ndilapona anywebo muyoopona.
20 Ibuzuba oobo muyoozyiba kuti ndilikamantene a Taata alimwi akuti nywebo andime tulikamantene.+
21 Kufwumbwa ooyo uutambula milawo yangu akwiitobela nguundiyanda. Alimwi kufwumbwa ooyo uundiyanda uyooyandwa a Taata, eelyo ambebo ndiyoomuyanda akulitondezya caantangalala kulinguwe.”
22 Judasi,+ ikutali Isikariote, wakati kulinguwe: “O Mwami, nkaambo nzi ncoyanda kulitondezya caantangalala kulindiswe pele ikutali kunyika?”
23 Jesu wakamwiingula kuti: “Ikuti muntu kandiyanda, unoobamba majwi aangu,+ eelyo Taata uyoomuyanda alimwi tuyooboola kulinguwe akukkala anguwe.+
24 Kufwumbwa ooyo uutandiyandi tabambi majwi aangu. Majwi aaya ngomumvwa taali majwi aangu, pele nga Taata iwakandituma.+
25 “Ndamwaambila zintu eezyi nendicili andinywe.
26 Pele mugwasyi, nkokuti muuya uusalala, ooyo ngwayootuma Taata muzina lyangu, uyoomuyiisya zintu zyoonse alimwi akumwiibalusya zintu zyoonse nzindakamwaambila.+
27 Ndamusiila luumuno; ndamupa luumuno lwangu.+ Tandimupi luumuno oolu kweelana amboipa nyika. Myoyo yanu itapengi alimwi itayoowi pe.
28 Mwalimvwide nindamwaambila kuti, ‘ndilaunka pele ndiyoopiluka alimwi kulindinywe.’ Ikuti nimwali kundiyanda, nimwakondwa kuti nduunka kuli Taata, nkaambo Taata mupati kwiinda ndime.+
29 Aboobo lino ndamwaambila kacitanacitika eeci, ikutegwa cacitika musyome.+
30 Tandikokwaamba zinji kulindinywe, nkaambo mweendelezi wanyika+ ulaboola, lino tajisi nguzu zyakundizunda.*+
31 Pele ikutegwa nyika izyibe kuti ndilamuyanda Taata, ndilacita mbubonya Taata mbwaakandilailila kuti ndicite.+ Amunyamuke, tuzwe aano.
Bupanduluzi buyungizyidwe
^ Naa “masena aakukkala.”
^ Naa “sikuumbulizya.”
^ Naa “mbuli bamucaala.”
^ Naa “takwe nguzu zyakundeendelezya.”
