MAKANI AAYEEME AMUTWE UULI ACIVWUMBYO
Nkaambo Nzi Ncotweelede Kuzumanana Kupona
IKUTI mwamubona Diana, * inga mwajana kuti mukaintu uucili mwana-mwana imusongo alimwi uuyanda kumvwana abantu. Nokuba kuti Diana ulibonya kukkomana alimwi akuti ulasikika, pele ziindi zinji ulatyompwa kapati ambweni kwaciindi cili mbocibede. Aboobo waamba kuti, “buzuba abuzuba ndiyeeya buyo kufwa. Alimwi ndili masimpe kuti inga cainda kugwasya kuti ndafwa.”
“Buvwuntauzi bumwi bwakatondezya kuti bantu boonse ibakafwa akaambo kakulijaya, ibali 200 bakali kusola kulijaya alimwi ibali 400 bakali kuyeeya kujatikizya kulijaya.”—Oobu mbowaamba muteende waku CANADA wiitwa kuti THE GAZETTE, MONTREAL.
Diana waamba kuti kunyina nakonzya kulijaya pe. Nokuba boobo, zimwi ziindi ulimvwa kuti kunyina kaambo keelede kumupa kuzumanana kupona. Waamba kuti, “Inga cainda kugwasya kuti ndafwa muntenda, alimwi lino, lufwu ndilubona kuba mulongwe kutali sinkondoma pe.”
Bantu banji balalimvwa mbubwenya mbwalimvwa Diana, alimwi bunji bwabo bali kuyeeya naa kusoleka kulijaya. Nokuba boobo, basyaazibwene baamba kuti bunji bwabantu ibakanza kulijaya, mubwini inga tabayandi kulijaya buya pe, pele ncobayanda buyo nkuti mapenzi ngobajisi amane. Mubufwaafwi, inga twaamba kuti bayeeya kuti tabacizyi cini ncobaponena, aboobo ncobayanda buyo nkufwa.
Nkaambo nzi ncotweelede kuzumanana kupona? Amulange-lange twaambo totatwe itutupa kuzumanana kupona.
^ par. 3 Izina lyacincwa.
