NJIISYO YAMU BBAIBBELE: “Cikwati acilemekwe abantu boonse, alimwi bulo bwacikwati butasofwaazyigwi pe.”—Bahebrayo 13:4.

IBUBOTU BULIKO: Bantu bamwi bayeeya kuti majwi aaya akaleka kubeleka. Pele aayo taali masimpe pe! Kutasyomeka kulacisa kapati mbubwenya mbokwakabede ciindi Bbaibbele nolyakalembwa.—Tusimpi 6:34, 35.

Ba Jessie, ibakwete alimwi ibajisi bana bakaamba kuti: “Kusyomeka mucikwati kwagwasya kapati kuti tube acilongwe ciyumu abakaintu bangu alimwi akupa kuti tube alukkomano. Masimpe, kusyomeka kulayandika kapati mucikwati. Kutasyomeka mucikwati kupa kuti banabukwetene kabatasyomani”—alimwi kulabajatikizya bana kumbele!

Ba Ligaya * bakabikka cikwati cabo muntenda. Baamba kuti: “Ndakatalika kuyanzana abantu babyaabi. Eeci cakapa kuti nditalike kujanika mumasena aanywidwa bukoko masiku alimwi akutalika kutasyomeka kumulumaangu.” Sena kupona buumi buli boobu kwakapa kuti bajane lukkomano? Eeci cakapa kuti kabakazyanya abalumi babo lyoonse alimwi cakapa kuusa. Bakayungizya kuti: “Nondakalanga buumi bwangu mbobwakanyongene, ndakayeeya mbwaakaluzi majwi aabazyali bangu aakuti, ‘Kuyanzana abantu babyaabi kunyonganya zilengwa zibotu.’”—1 Bakorinto 15:33.

Ba Ligaya bazumanana kwaamba kuti: “Zintu kazitanaindila kubija, ndakasala kuleka ziyanza zyangu zibi akutalika kwiiya Bbaibbele, nkokuti ikutalika kubelesya nzyondakali kwiiya.” Akaambo kaceeci, bakafwutula cikwati cabo, alimwi balumi babo bakatalika kubeendelezya caluzyalo alimwi abulemu. Baamba kuti: “Bbaibbele lyakacinca buumi bwangu, alimwi tanduuside kuti ndakabuleka bukkale bwangu bwakaindi alimwi abalongwe babyaabi mbondakajisi.”