Bbaibbele talyaambi cacigaminina kujatikizya lwaanguluko lwacikwati cabantu bajisi zizo zikozyenye. Pele mubuzyo uuyandika kapati ngwakuti, Ncinzi Bbaibbele ncolyaamba kujatikizya koonana kwabantu bajisi zizo zikozyenye?

Kakunyina akulanga-langa ncolyaamba Bbaibbele cakusitikila, bantu banji bayeeya kuti balibuzyi bwiinguzi, pele bwiinguzi bwabo bulakazyanya! Bamwi baamba kuti cakusalazya Bbaibbele talizumizyi koonana kwabantu bajisi zizo zikozyenye. Bamwi baamba kuti mulawo wamu Bbaibbele wakuti “weelede kuyanda simukobonyoko” ukulwaizya bukkale buli boonse bwakoonana.—Baroma 13:9.

Ino nkaakali kaambo akati katwaambo ootu nkomukonzya kwaamba kuti kaliluzi?

1. Bbaibbele lilakasya koonana kwabantu bajisi zizo zikozyenye.

2. Bbaibbele lilazumizya koonana kwabantu bajisi zizo zikozyenye.

3. Bbaibbele lilakulwaizya kubasulaika bantu boonana ibajisi zizo zikozyenye (naa kubasalulula).

BWIINGUZI:

1. KALILUZI. Bbaibbele lyaamba kuti: “Baalumi boonwa abaaluminyina, baalumi boona baaluminyina . . . tabakanjili mu Bwami bwa Leza.” (1 Bakorinto 6:9, 10) Eeci cilajatikizya abamakaintu.—Baroma 1:26.

2. TAKALUZI. Bbaibbele liyiisya kuti koonana kweelede buyo kucitwa amwaalumi amukaintu ibakwetene.—Matalikilo 1:27, 28; Tusimpi 5:18, 19.

3. TAKALUZI. Nokuba kuti Bbaibbele lilakasya koonana kwabantu bajisi zizo zikozyenye, talikulwaizyi kubasalulula, kubacitila calunya, naa kutabalanganya kabotu kuli koonse.—Baroma 12:18. ^[1]

Bakamboni ba Jehova basyoma kuti zyeelelo zyakulilemeka izili mu Bbaibbele nzyeziinda kubota mubuumi, alimwi basala kupona kweelana azyeelelo eezyo. (Isaya 48:17) ^[2] Eeci caamba kuti Bakamboni ba Jehova balaikaka misyobo yoonse yakutalilemeka, kubikkilizya akoonana kwabantu bajisi zizo zikozyenye. (1 Bakorinto 6:18) ^[3] Oobo mbobuumi mbobasala kupona Bakamboni, alimwi balijisi lwaanguluko lwakusala boobo.

Kulubazu lumwi, Bakamboni ba Jehova balasolekesya “kuyandaula luumuno abantu boonse.” (Bahebrayo 12:14) Nokuba kuti balaikaka micito yakoonana kwabantu bajisi zizo zikozyenye, Bakamboni ba Jehova tabasinikizyi bantu kusyoma nzyobasyoma, tababacitili calunya akaambo kakubasulaika aabo boonana abantu mbobakozyenye limwi zizo, naa kukkomana nobamvwa micito yalunya iicitwa kulimbabo. Bakamboni ba Jehova balasolekesya kutobela Mulawo Wabukkale Bubotu kwiinda mukweendelezya bamwi mbubwenya mbuli mbobayanda kuti abalo kabeendelezyegwa.—Matayo 7:12.

Bantu bamwi balakonzya kwaamba kuti Bbaibbele likulwaizya kubasalulula bantu boonana bajisi zizo zikozyenye, alimwi akuti aabo batobela zyeelelo zyakulilemeka izili mu Bbaibbele tababuzumini bukkale oobu. Baamba kuti, ‘Bbaibbele lyakalembwa ciindi bantu nobatakali kuyanda kuzumina mizeezo yabamwi. Mazuba aano tulabayanda bantu bamisyobo yoonse, bazwa muzisi zyoonse, alimwi abaabo bayanda koonana abantu mbobaindene limwi zizo naa mbobakozyenye limwi zizo.’ Kulimbabo, kutayanda koonana abantu mbobakozyenye limwi zizo, cili mbuli kutayanda bantu bamusyobo uumbi. Sena kweezyanisya ooku kulabeleka? Peepe. Nkaambo nzi?

Akaambo kakuti kuli kwiindana kuliko akati kutayanda bukkale bwakoonana kwabantu bajisi zizo zikozyenye alimwi akutayanda bantu boonana ibajisi zizo zikozyenye. Bbaibbele lyaambila Banakristo kuti kababalemeka bantu bamisyobo yoonse. (1 Petro 2:17) ^[4] Pele eeci tacaambi kuti Banakristo beelede kubuyanda bukkale buli boonse.

Amulange-lange kweezyanisya ooku: Amweezyeezye kuti kufweba mukubona kuti ncintu cinyonganya buumi naa cisesemya. Ino mbuti kuti kamujisi mubelesinyoko uufweba? Sena mulakonzya kubonwa kuti muli muntu uutazumini mizeezo yabamwi akaambo buyo kakuti mbomukubona kufweba kuliindene ambwakubona walo? Sena inga caamba kuti mulamusalulula akaambo buyo kakuti walo ulafweba nywebo tamufwebi? Ikuti mubelesinyoko wamusinikizya kuti mucince mbomukubona kufweba, sena eeci inga tiicamupa kuba muntu uutazumini mizeezo yabamwi alimwi aziyanda beenzinyina?

Bakamboni ba Jehova basala kupona kweelana azyeelelo zyakulilemeka izili mu Bbaibbele. Tabaizuminizyi micito njolikasya Bbaibbele. Pele tababafwubaazyi naa kutabeendelezya kabotu bantu bacita zintu ziindene ambabo.

Ino mbuti kujatikizya bantu bajisi cilengwa cakuyanda koonana abantu mbobakozyenye limwi zizo? Sena mbobakazyalwa oobo? Ikuti naa mboobo, sena inga tiicaba calunya kubaambila kuti tabeelede kucita zintu nzyobalombozya?

Bbaibbele kunyina ncolyaamba kujatikizya icipa bantu bamwi kuti kabalombozya koonana abantu mbobakozyenye limwi zizo, nokuba kuti lilazumina kuti bantu bamwi balijisi tumpenda tukatazya kuleka. Nokuba boobo, Bbaibbele lyaamba kuti micito imwi—kubikkilizya amicito yakoonana kwabantu bajisi zizo zikozyenye—yeelede kweelebwa kutegwa tumukkomanisye Leza.—2 Bakorinto 10:4, 5.

Bamwi balakonzya kwaamba kuti lulayo lwamu Bbaibbele ndwalunya. Pele kuyeeya kwabo kuyeeme amuzeezo wakuti tweelede kucita nzyotulombozya naa kuti kulombozya koonana kulayandika kapati cakuti takweelede kweendelezyegwa alimwi takukonzyeki buya. Nokuba boobo, Bbaibbele lilabalemeka bantu kwiinda mukwaamba kuti balakonzya kukukazya kulombozya kwabo. Mukwiimpana  abanyama, bantu balakonzya kusala kutatobela kulombozya kwabo.—Bakolose 3:5. ^[5]

Amulange-lange kweezyanisya ooku: Basyaazibwene bamwi baamba kuti tumpenda tumwi, mbuli bukali, inga katuli twamubulowa. Bbaibbele talyaambi cacigaminina kujatikizya icipa bukali, pele lilazumina kuti bantu bamwi ‘mbakali’ alimwi ‘banyema-nyema buyo.’ (Tusimpi 22:24; 29:22) Pele alimwi, Bbaibbele lyaamba kuti: “Koleka kunyema abukali.”—Intembauzyo 37:8; Baefeso 4:31.

Bantu bamwi balakonzya kulukaka lulayo oolu naa kwaamba kuti ndwalunya kuli baabo bajisi kampenda kabukali. Alimwi buya, nobaba basyaazibwene bamwi ibasyoma kuti bukali inga ncizyalwa camuntu, balasoleka canguzu kugwasya bantu kweendelezya bukali bwabo.

Bakamboni ba Jehova balacita mbubwenya oobo kujatikizya bukkale buli boonse buteendelani azyeelelo zyamu Bbaibbele kubikkilizya akoonana kwabantu baindene zizo pele batakwetene mumulawo. Mumbazu zyoonse eezyi, lulayo lwamu Bbaibbele oolu lulabeleka: “Umwi aumwi wanu azyibe kweendelezya mubili wakwe mwini munzila iisalala alimwi mubulemu, ikutali muluunyaunya lwabulyato.”—1 Batesalonika 4:4, 5.

Aabo ibakali kuyanda kuba Banakristo mumwaanda wamyaka wakusaanguna bakali kuzwa mubukkale bwiindene-indene, alimwi bamwi bakapanga kucinca kupati mubukkale bwabo. Mucikozyanyo, Bbaibbele lilaamba kujatikizya “basibwaamu, basikukomba mituni, basimamambe, baalumi boonwa abaaluminyina, baalumi boona baaluminyina,” mpoonya lilayungizya akuti: “Oobo mbobakabede bamwi akati kanu.”—1 Bakorinto 6:9-11.

Kwiinda mukwaamba kuti “oobo mbobakabede bamwi akati kanu,” sena Bbaibbele lyaamba kuti aabo ibakaleka cilengwa cakoonana abantu mbobakozyenye limwi zizo, kunyina nobakali kuba amizeezo iili yoonse yakucita boobo alimwi? Peepe, nkaambo Bbaibbele alimwi likulwaizya kuti: “Amuzumanane kweenda amuuya eelyo kunyina nomuyoocita zisusi zyanyama.”—Bagalatiya 5:16.

Amubone kuti Bbaibbele kunyina nolyaamba kuti Munakristo takonzyi kuba amuzeezo uutali kabotu. Muciindi caboobo, lyaamba kuti ulakonzya kusala kutaucita muzeezo ooyo. Banakristo baiya kweendelezya mizeezo eeyo iitali kabotu, kutali kukakatila kulinjiyo kusikila limwi bacicita cili mumizeezo.—Jakobo 1:14, 15. ^[6]

Aboobo Bbaibbele lilaindanya akati kakulombozya alimwi amicito. (Baroma 7:16-25) Muntu uulombozya koonana abantu mbakozyenye limwi zizo ulakonzya kweendelezya zili mumizeezo yakwe, mbubwenya buyo mbwanga wacita akulombozya kumbi kubi kuli koonse mbuli kunyema, bumambe, alimwi abusyaacivwulemwangu.—1 Bakorinto 9:27; 2 Petro 2:14, 15.

Nokuba kuti Bakamboni ba Jehova batobela zyeelelo zyakulilemeka izili mu Bbaibbele, tabasinikizyi bamwi kuti kabatobela mizeezo yabo. Naa kusola kucinca milawo iikwabilila lwaanguluko lwabaabo bapona munzila iindene ambabo. Mulumbe ngobaambilizya Bakamboni ba Jehova ulagwasya, alimwi caluyandisisyo balabaambila aabo boonse bayanda kuuswiilila.—Milimo 20:20.