MAKANI AAYEEME AMUTWE UULI ACIVWUMBYO MULAKONZYA | KUBA MULONGWE WA LEZA
Kunyina Buumi Bubotu Bwiinda Boobu
Ncinzi ncomukonzya kucita kutegwa mube acilongwe a Leza? Nzila zitobela zilakonzya kumugwasya kutegwa mube acilongwe ciyumu anguwe:
Amulizyibe alimwi akulibelesya zina lya Leza, lyakuti Jehova.
Amubandike anguwe lyoonse kwiinda mumupailo alimwi akubala Jwi lyakwe, Bbaibbele.
Lyoonse amucite zimukkomanisya Jehova.
Amuswene kuli Leza kwiinda mukubelesya zina lyakwe, kupaila kulinguwe, kwiiya Jwi lyakwe alimwi akucita zintu zimukkomanisya
Kweelana atwaambo ootu, sena inga mwaamba kuti mulacita zyoonse ziyandika kutegwa mube acilongwe a Leza? Sena kuli mbazu zimwi nzyomuyeeya kuti inga mwabambulula? Masimpe, muyandika kubeleka canguzu, nokuba boobo amubone bubotu buliko.
Ba Jennifer, bakucisi ca United States bakaamba kuti: “Kusolekesya kuli koonse nkomukonzya kucita kutegwa mube acilongwe ciyumu a Leza kulagwasya kapati. Cilongwe eeci ciletela zilongezyo zinji, mbuli: kumusyoma kapati Leza, kumvwisya kapati kujatikizya bube bwakwe, pele kwiinda zyoonse kuba aluyando kapati. Kunyina buumi bubotu bwiinda boobu!”
Kuti kamuyanda kukkomana kuba acilongwe ciyumu a Leza, Bakamboni ba Jehova bayookkomana kumugwasya. Balakonzya kupanga bubambe bwakwiiya Bbaibbele andinywe kakunyina kubbadela. Alimwi mwatambwa kujanika kumiswaangano yabo yakwiiya Bbaibbele ku Ŋanda ya Bwami iili afwaafwi ankomukkala, ooko nkomuyookkomana kuyanzana abaabo babikkila maano kucilongwe cabo a Leza. * Mwacita oobo, andinywe muyoolimvwa mbuli mbwaakalimvwa sintembauzyo walo iwakaamba kuti: “Pele mebo, cilandibotela kuswena kuli Leza”—Intembauzyo. 73:28.
^ par. 9 Kutegwa mube aciiyo ca Bbaibbele naa kuzyiba kuli Ŋanda ya Bwami iili afwaafwi ankomukkala, mwalombwa kuti mukamubuzye muntu iwakamupa magazini eeyi naa amubone webbusaiti yesu ya www.mt711.com, mpoonya mubone aalembedwe kuti AMUTULEMBELE aansi aapeeji.
Andiza Inga Mwaakkomanina Ayaaya
MIBUZYO IIVWULA KUBUZYIGWA
Ino Ndwiiyo Nzi Lwamu Bbaibbele Ndobapa Bakamboni ba Jehova?
Mulakonzya kubelesya Bbaibbele lili lyoonse nomwiiya mupulogilamu iitabbadelelwi ya Bakamboni ba Jehova. Amwaanguluke kutamba bamukwasyi wanu boonse naa balongwe.
