Bbaibbele nolipa cikozyanyo icigwasya kuzyiba kwiindana kuliko akati kabakombi bakasimpe abakubeja, lyaamba kuti: “Kwiinda mumicelo yabo muyoobazyiba. Sena bantu kuli nobacela misaansa kuzwa kumamvwa naa nkuyu kumitubetube?” (Matayo 7:16) Mbubwenya mbomukonzya kwiindanya akati kacisamu camisaansa alimwi acamamvwa kwiinda mukulanga micelo yanzizyo, mulakonzya kwiindanya cikombelo cakasimpe kucikombelo cakubeja kwiinda mumicelo yanzizyo, naa kwiinda muzintu eezyi zitobela.

1.   Cikombelo cakasimpe ciyiisya kasimpe ikajanika mu Bbaibbele, ikutali njiisyo zyabantu. (Johane 4:24; 17:17) Eeci cijatikizya kuyiisya kasimpe kujatikizya soul alimwi abulangizi bwabuumi butamani muparadaiso anyika. (Intembauzyo 37:29; Isaya 35:5, 6; Ezekieli 18:4) Alimwi cilaamba cakutasisa njiisyo zyakubeja izijanika mubukombi bwakubeja.—Matayo 15:9; 23:27, 28.

2.   Cikombelo cakasimpe cigwasya bantu kumuzyiba Leza, kubikkilizya akubayiisya kuti zina lyakwe ngu Jehova. (Intembauzyo 83:18; Isaya 42:8; Johane 17:3, 6) Taciyiisyi kuti bantu tabakonzyi kumumvwisya Leza naa kuba mulongwe wakwe, muciindi caboobo ciyiisya kuti Leza uyanda kuti tube acilongwe anguwe.—Jakobo 4:8.

3.   Cikombelo cakasimpe cisumpula njiisyo yakuti Leza uyoofwutula bantu kwiinda muli Jesu Kristo. (Milimo 4:10, 12) Aabo ibazulilwa kucikombelo cakasimpe balaitobela milawo ya Jesu akusolekesya kutobela cikozyanyo cakwe.—Johane 13:15; 15:14.

4.   Cikombelo cakasimpe cibikkila kapati maano ku Bwami bwa Leza kuti mbobulangizi bulikke bwabantu. Basicikombelo baco mbasungu mukwaambila bamwi kujatikizya Bwami oobu.—Matayo 10:7; 24:14.

5.   Cikombelo cakasimpe cikulwaizya kuba aluyando lwini-lwini. (Johane 13:35) Ciyiisya kulemeka bantu bamisyobo yoonse alimwi cilabakkomanina bantu bazilengwa zyoonse, bamyaambo yoonse alimwi abukkale bwiindene-indene. (Milimo 10:34, 35) Akaambo kaluyando, basicikombelo baco tabatoli lubazu munkondo.—Mika 4:3; 1 Johane 3:11, 12.

6.   Cikombelo cakasimpe tacijisi bafwundisi ibabbadelwa mali, alimwi tacipi mazina aasumpukide kuli bamwi mucikombelo.—Matayo 23:8-12; 1 Petro 5:2, 3.

7.   Cikombelo cakasimpe kunyina nocitola lubazu mutwaambo twacisi. (Johane 17:16; 18:36) Nokuba boobo, basicikombelo baco balailemeka akwiitobela milawo yamfwulumende nkobakkala kweelana amulawo wamu Bbaibbele wakuti: “Amupe Kaisara zintu zya Kaisara [nkokuti bweendelezi bwamfwulumende], pele zintu zya Leza amupe Leza.”—Marko 12:17; Baroma 13:1, 2.

8.   Kukomba munzila yakasimpe mbobuumi, takuli buyo kwiinzya mulawo. Bamucikombelo cakasimpe balaitobela milawo yamu Bbaibbele yabukkale bubotu mubuumi bwabo boonse. (Baefeso 5:3-5; 1 Johane 3:18) Muciindi cakuusa, balajana lukkomano nobakomba “Leza uukkomene.”—1 Timoteyo 1:11.

9.   Aabo ibamucikombelo cakasimpe banooli basyoonto. (Matayo 7:13, 14) Kanji-kanji ibamucikombelo cakasimpe inga balanyansyigwa, kusampaulwa, alimwi akupenzyegwa akaambo kakubelekela Leza.—Matayo 5:10-12.

Kusala cikombelo cakasimpe taciyeeme amuntu mbwalimvwa mumoyo kujatikizya ncico

 Kuli ntenda mukusala cikombelo akaambo buyo kakuti kuli mbocitupa kulimvwa. Bbaibbele lyakasinsima kujatikizya ciindi bantu ‘nobayooliyobolweda bamayi [bazikombelo] ibakubatekunya kumatwi.’ (2 Timoteyo 4:3) Mukwiimpana, Bbaibbele litukulwaizya kusala bukombi “busalala alimwi butasofweede mumeso aa Leza wesu alimwi Taata,” nokuba kuti bantu banji tababuyandi.—Jakobo 1:27, Johane 15:18, 19.