Ni tsumbule swaku Timboni ta Yehovha a ti ngo kombisa lirhandzu ka vanhu ntsena, kambe ti tlhele ti kombisa lirhandzu ka timbyana ta mina. Elaine, wansati lweyi a a nyime tlhelweni ka xikarinyana a ti nyike mabixkoyitu. Ku sukela kolanu, loko hi fambela ka matlhelo lawayani, timbyana ta mina a ti tolovela ku ya kusuhi ni lani a ku ni xikarinyana leswaku ti nyikiwa mabixkoyitu.

Loko tiwheti ti ye ti hundze, timbyana ta mina ti ye ti tikhorisa hi ku tidlela mabixkoyitu lawa a ti nyikiwa wona. Naswona mina a ni tolovela ku bula ni Timboni ta Yehovha hi nkama wolowo, kambe a ni nga swi lavi ku heta nkama wa wunyingi na ni bula na tona. A ni ni 70 wa malembe naswona a ni nga swi twisisi kahle leswi Timboni ta Yehovha a ti kholwa ka swona, funtshi a ni karhalile hi mavunhwa lawa wukhongeli la linyingi a li ma djondzisa. Se, ni yentxe xiboho xa ku tidjondzela Bibele na ni li noxe.

Hi nkama wolowo a ni tolovela ku vona Timboni ta Yehovha ka tindhawu ta ku hambanahambana ta doropa, na ti nyime ni swikarinyana swa mabuku. Na tona a ti talisa ku bula kahle ni vanhu van’wana. Minkama hinkwayu a ti tirhisa Bibele swaku ti hlamula swivutiso swa mina, funtshi leswo swi yentxe swaku ni ya ni ti tshemba hintamu Timboni.

Siku lin’wana Elaine a ni vutise leswi: ‘Wa kholwa swaku swiharhi i nyiko leyi taka hi ka Xikwembu?’ Ni mu hlamule ni ku: ‘Ina, na kholwa.’ A game a ni lerhela buku la Esaya 11:6-9. Hambileswi a ni swi rhandza ku djondza hi Bibele, a ni nge se swi lava ku teka mabuku ya Timboni.

Loko masiku ma ye ma famba ni tame ni bula na Elaine ni nuna wa yena Brent. Va ni kombele swaku ni lerha buku la Matewu ku ya ka Mintirho, leswaku ni twisisa leswi ku va Mukreste wa ntiyiso swi vulaka swona. Naswona ni yentxe leswi va nga ni byela swona, funtshi hi 2016 ni pfumele ku djondza Bibele na vona.

A ni swi rhandza hintamu ku djondza Bibele ni ku ya mintlhanganwini vhiki ni vhiki. Phela Yehovha a ni katekisile naswona ni tsaka hintamu hileswi ni nga djondza hi leswi Bibele li swi vulaka. Na ku nge se hundze nkama wa wunyingi, ni tsakamisiwile swaku ni va Mboni ya Yehovha. Swoswi ni ni 79 wa malembe naswona na tiyiseka swaku ni wu kumile ntiyiso. Ni mu khensa hintamu Yehovha hileswi a nga ni pfuna swaku ni lumba ndjangu wa yena lowu nga kona amisaveni hinkwayu.”