Ego. Yesu obw’akaba ali mu nsi, akahikiriza obunabbi bwingi obukaba nibubazaaho “Arukuseswaho Amagita,” rundi Masiya ow’akaba naija “Omujuni owensi.” (Danieri 9:25; 1 Yohana 4:14) Nahanyuma y’okufa, Yesu akagumizaamu nahikiriza obunabbi oburukukwata hali Masiya.—Zabuli 110:1; Engeso Ezabakwenda 2:34-36.

•  “Masiya” nikimanyisa ki?

•  Abantu abarukuhingura hali omu bakaba nibasobora kuhikiriza obunabbi oburukukwata hali Masiya?

•  Masiya naija kuzooka omu kasumi ak’omu maiso?

•  Bunabbi bwingaha oburukukwata hali Masiya oburukusangwa omu Baibuli?

•  Obunabbi obumu oburukukwata hali Masiya, Yesu obuyahikiriize

 Ekigambo eky’Oruheburaniya Ma·shiʹach (Masiya) hamu n’ekirukusisana nakyo eky’Oruyonaani Khri·stos (Kristo) byona bimanyisa “Anyakuseeserweho Amagita.” Nahabweki, “Yesu Kristo” nikimanyisa “Yesu Anyakuseeserweho Amagita,” rundi “Yesu Masiya.”

 Omu busumi bwa Baibuli omuntu yakiraga kuseswa amagita ha mutwe obuyabaga n’akomwa kuba omu kiikaro eky’obusobozi eky’embaganiza. (Ebyabalevi 8:12; 1 Samuiri 16:13) Ruhanga akakoma Yesu kuba Masiya, kandi eki kiikaro eky’embaganiza eky’obusobozi bwingi. (Engeso Ezabakwenda 2:36) Baitu, omu kiikaro ky’okuseesaho Yesu amagita ha mutwe, Ruhanga akamuseesaho omwoyo ogurukwera.—Matayo 3:16.

 Nangwa. Nk’oku buli muntu aine ekinkumu kye wenka ekitarukusisana n’eky’abandi, n’obunabbi bwa Baibuli bukahikirra kuraba omu muntu omu wenka ayabaire Masiya rundi Kristo. Baitu Baibuli egamba ngu “haliija Bakristo abebisuba, nabanabi abebisuba, nabo balikora obwokurorraho obukuru nebyamahano; bahabise nabakome kuba nikisoboka.”—Matayo 24:24.

 Nangwa. Baibuli ekaranga ngu Masiya akaba naija kuba mwijukuru w’Omukama Daudi owa Isaleri. (Zabuli 89:3, 4) Baitu ebihandiiko eby’Ekiyudaaya ebirukwoleka ebwijukuru kurugira kimu hali Daudi bikabura, obundi nikisobora kuba ngu bikahwerekerezebwa Abarooma obubaatahiriire Yerusalemu omu mwaka gwa 70 C.E. * Kuruga kasumi ako, tikisobokere omuntu kuba n’obwakaiso oburukugumya ngu ali omu ha baijukuru ba Daudi abasemeriire kufooka abakama. Baitu n’obukiraaba ngu omu kasumi ka Yesu ebihandiiko ebi eby’obuzaale bikaba biroho, busaho n’omu h’abanyanzigwa be ayalengereho kumuhakaniza ngu akaba atali mwijukuru wa Daudi.—Matayo 22:41-46.

 Tikirukusoboka kumanya omuhendo gwonyini ogw’obunabbi oburukukwata hali Masiya. Eky’okurorraho, omulingo gw’okubaramu obunabbi nigusobora kwahukana, n’obukirukuhika ha byahandiikirwe ebirukwoleka kurungi obunabbi oburukukwata hali Masiya. Omu Isaya 53:2-7 nihabazaaho ebintu bingi ebirukukwata hali Masiya. Abamu nibasobora kurora ebibaziibweho omu nkarra zinu nk’obunabbi bumu, baitu abandi nibasobora kubirora nk’obunabbi oburukwahukana.