ABAMU BAGAMBA NANGWA. Dakitaali omu akalengesaniza kuhondera obuhabuzi bwa Baibuli nk’okukozesa ekitabu kya sayansi eky’omwaka 1920 kwegesa abeegi ab’omu kasumi kanu. Abamu nibasobora kugihakaniza nibagamba ngu n’osobora kukozesa oburagirizi obuli omu kitabu ekya kompyuta eyakara kukukonyera kukozesa kompyuta enyakuli ha mulembe? Kinu nikimanyisa ngu, abamu Baibuli bagirora nk’eyahoire kara ha mulembe.

Habwaki omuntu akozesa obuhabuzi obuli omu kitabu ekyakara omu nsi enu enyakukurakuraine omu bya kalimagezi, kandi kunu haroho emikura nyingi eya intaneti erukuha obuhabuzi bwingi obuli ha mulembe? Puroguraamu eza ha tivi zibamu abakugu abamanyire kwegesa abantu ha bintu eby’obwomeezi hamu n’abahandiiki abarukuha obuhabuzi. Amaduuka agatunda ebitabu gaijwiremu ebitabu bingi ebirumu obuhabuzi oburukwoleka omulingo osobora kumara ebizibu kandi kinu kiretiire bizinesi enu kuba y’amaani muno.

Kusigikirra h’amagezi goona amahyaka agaroho, habwaki omuntu akozesa Baibuli​—ekitabu ekyahandiikirwe emyaka nka 2,000 enyuma? Abarukuhakaniza nibagamba ngu, kukozesa obuhabuzi bwa Baibuli kiri nk’okukozesa oburagirizi obwa kompyuta ez’ahoire ha mulembe rundi ekitabu kya sayansi ekyakara tibahikire. Habwokuba Sayansi n’ebintu bya kalimagezi biikara nibihinduka baitu kandi ebyetaago by’abantu tibikahindukaga. Abantu nibakyaserra obwomeezi oburungi oburumu okusemererwa, obulinzi, kuba n’amaka amarungi agarumu okusemererwa hamu n’enkoragana enungi n’abanywani.

N’obukiraaba ngu Baibuli kitabu kyaira, nikibazaaho ebyataago by’abantu ebikuru n’ebintu ebindi. Kandi n’etusoborra ngu Ruhanga nuwe yagihandikisize. Etuha obuhabuzi oburukukwata ha bwomeezi bwaitu kandi etukonyera kujangurra ebizibu. (2 Timoseo 3:16, 17) Eyongera etugambira ngu obuhabuzi bwayo, tibuhwa ha mulembe​—kandi bwikara buli bw’omugaso! Habwokuba Baibuli yo egamba: “Ekigambo kya Ruhanga kyomezi.”​—Abaheburaniya 4:12.

Baibuli eby’etugambira bihikire? Mali Baibuli ekahwa ha mulembe rundi kitabu ekirukukirrayo kimu kuba ky’omugaso? Magaziini enu ey’embaganiza naija kutukonyera kutunga eby’okugarukamu by’ebikaguzo binu.