Delphine, ow’abaziibwehoga ha kubanza, akatandika kunywa muno amarwa habw’okwetuntura okwingi. Baibuli tetanga omuntu kunywa amarwa, baitu n’egamba ngu: “Otaikara hamu [n’abakunywa muno] amarwa.” (Enfumo 23:20) Kunywa muno amarwa kirugiremu ebizibu nk’oburwaire, okuseseka kw’amaka kandi n’abantu baingi kufa buli mwaka batakahikire. Ebizibu binu abantu nibasobora kubyeriinda kakuba bahondera obuhabuzi bwa Baibuli.

Kinu nikyo Delphine y’akozere. Nagamba ngu: “Nkakyetegereza ngu amarwa tigarukutanga kwetuntura. Baitu obu n’ataire omu nkora amagezi agali omu Abafiripi 4:6, 7, agarukugamba ngu: ‘Mutatuntu’ra na kake baitu . . . mumanyisege ebimuserra hali Ruhanga.’ Obwire obw’ekiro obu natungaga ebitekerezo bingi hamu n’okwetuntura, nasabaga Yahwe. Namugambiraga enyehurra zange zoona, nk’ekiniga, obusaalizi, hamu n’omulingo nkaba ntaine kunihira kwona. Namwesengerezaga ankonyere nsobole kutunga emiringo esobora kunkonyera kuleka kwetuntura. Kandi omu bwire bwa nyenkyakara, nalengahoga kwetantara enyehurra zange ezitahikire. Engeso ey’okusaba buli kiro ekankyonyera kuta omutima hali ebi ebi nkaba nyine hatali ebintu ebi nkaba ntaine. Nkacwamu kuleka kunywa amarwa habwokuba nkatunga obusinge omu mutima obwankonyiire kandi nkaba ntarukugonza kubuferwa.”

Obusihani nubwo bukyakizireyo kuletera abantu obusaasi omu mutima hamu n’obujune bwingi. Baitu emisingi ey’omu Baibuli n’esobora kutukonyera kweriinda ebintu ebirugirramu kugwa omu kabi kanu​—nk’ebikorwa eby’orwanju, n’okurora ebisisani eby’orwanju. Omusigazi omu arukwetwa Samuel nagamba ngu: “Kyanguhire omuntu kuba n’orwanju, obwire obumu nabaga ntarukugonza omwisiki, baitu obu nakyetegereza ngu nangonza, eki kyandetera kutandika kwanjuka.” Samuel nagamba ngu abantu baikaraga nibamujunaana habw’orwanju​—n’obuyabaga atakigenderiire kukikora​—kinu kikamuletera kukikora akigenderiire. Baitu omuze gunu gukamuletera kwehurra kubi. Samuel n’ayongera nagamba ati: “Kikaba kiri kibi muno habwokuba kikuletera omutima ogw’okwefaaho wenka.”

Samuel akasoma akatabu k’ensingaanto akali ha mukura ogwa jw.org. Kandi akacumiitirizaaho Enfumo 20:11, orukugamba ngu: “Nomwana omuto amanyirwa ha ngesoze, omulimogwe guraba gusemiire, guraba guli omurungi.” Ekyahandiikirwe eki kikamukonyera kita? Samuel akakyetegereza ngu kuba n’orwanju tikisemiire kandi tikiri kirungi. Kandi akongera yagamba ngu: “Nkakyetegereza ngu omuntu wena anyakwine orwanju n’obwataha obuswere aba n’engeso embi. Nkekaguza nti, mukazi wange ou ndiba nswire alyehurra ata obwalindora ninyanjuka n’omukazi ondi? Kinu kikandetera kwetegereza ngu omuze gunu ogw’orwanju tiguli murungi. Kyanguhire omuntu kukora orwanju, baitu kinu tikirukumanyisa ngu kihikire kukikora.” Samuel akahinduka yaleka orwanju. Kuleka orwanju kimukonyiire kutasihana.

Antonio uwe akaba ali omu kabi k’amaani ak’okugwa omu busihani: Yagonzaaga muno kurora ebisisani eby’orwanju. N’obukiraaba ngu akaba aswire omukazi ou yagonzaaga muno, yaikaraga narora ebisisani binu eby’orwanju. Nagamba ngu obuyacumitiriize ha 1 Petero 5:8 kikamukonyera muno. Ekyahandiikirwe kinu nikigamba ngu: “Mwerindege, murolege, omunyanzigwa wanyu Setani nkentale erukububura nagendagenda naserra owaralya.” Antonio n’agamba ngu: “Ebisisani by’orwanju bitwetoroire buli hamu hoona omu nsi kandi kigumire kubyebwa. Ekyahandiikrwe eki kikankonyera muno kusobora kutekerezaaho ebintu ebisobora kundetera kugwa omu kwohebwa. Kandi nkaba nyine kwikara ninyijuka ngu ebisisani ebi bikaba nibiruga hali Setani. Hati, ninkimanya ngu Yahwe wenka nuwe asobora kunkonyera ‘kwerinda’ nukwo nsobole kurwanisa omuze gunu ogurukugonza kusiisa ebitekerezo byange, omutima gwange hamu n’obuswere bwange.” Antonio akatunga obukonyezi obwakaba nayetaaga kandi kinu kimukonyire kusobora kuleka omuze gunu omubi. Kandi kyongiire n’okumukonyera kweriinda ebizibu eby’amaani.

Amananu gali ngu, Baibuli erumu obuhabuzi obusobora kutukonyera kweriinda kugwa omu bizibu eby’amaani. Kandi nitusobora kukorra ki ebizibu byaitu ebitasobora kuhwaho? Katurole omulingo ekigambo kya Ruhanga kisobora kutukonyera kuraba omu bizibu ebigumire.