Бот-боттарынга бердинген ашак-кадай улус бүгү назынында кады чурттаар деп шиитпирлеп алыр. Өг-бүле чуртталгазынга олар боттарын айыыл чок, камгалал адаанда кылдыр миннир. «Чуртталгага бергелер турза-даа, бот-боттарывыска бердинген болур бис» деп аазаан сөзүнге шынчы артарынга олар бүзүрээрлер.

Чамдык ашак-кадай улус төрелдериниң азы долгандыр улустуң ээ көрүүшкүнүн чидирип алырындан сезингеш, чарылбайн кады чурттап чоруур. Ынчалза-даа өг-бүлени ынакшыл болгаш хүндүткелге үндезилеттинген бердинген чорук быжыглаар болза эки.

БИБЛЕЙЖИ ДҮРҮМ: «Ашаа, бодунуң ээлчээнде, кадайындан чарылбас ужурлуг» (1 Коринфичилерге 7:11).

«Кады чурттаан эжиңге бердинген болзуңза, хомудаарынче далашпас сен. Өршээринге база бурууң минниринге кезээде белен болур сен. Бергелер сеңээ баш муңгаш байдал эвес, а ажып эртип болур моондак боор» (Майк).

Бердинген чоруун бот-боттарынга чедир илеретпейн турар ашак-кадай улус бергелерге таварышкаш, мынча деп бодаар: «Бот-боттарывыска таарышпас-тыр бис, ынчангаш чарлыр болзувусса эки».

«Хөй-ле улус мындыг сагыштыг өгленип турар: „Болдунмас болза, чарлып алыр мен“. Чаа-ла өгленир деп турар улус чарлырының дугайында боданып турар болза, олар эгезинден тура бот-боттарынга бердинген чорукту чедир илеретпейн турар-дыр» (Джен).

БОДУҢАРНЫ ХЫНАҢАР

Маргыжып турар үеңерде:

• Ол кижи-биле өгленип алганыңарга хараадаар-дыр силер бе?

• Өске кижи дугайында бодай бербес-тир силер бе?

• «Мен сенден чоруурум ол!» азы «Мени үнелеп билир кижиден тып алыр мен» дээн хевирлиг сөстер чугаалаар-дыр силер бе?

Бир эвес бо айтырыгларның чамдыызынга азы чаңгызынга «ийе» деп харыылаан болзуңарза, кады чурттаан эжиңерге бердинген чорукту быжыглаар үе бо-дур.

КАДЫ САЙГАРЫҢАР

• Бот-боттарыңарга бердинген чорууңар кошкай берген деп миннир-дир силер бе? Ийе болза, чүге?

• Бердинген чорукту канчаар быжыктырып болур силер?

СҮМЕЛЕР

• Бот-боттарыңарга ынакшылдыг чараш сөстер бижээн чагаажыгаштардан бижиңер.

• Ажылдап орар чериңерге эжиңерниң чуруун салып алыңар.

• Эжиңерден аңгы тургаш долгажып, бижижиңер.

БИБЛЕЙЖИ ДҮРҮМ: «Бурганның каттыштырган чүвезин кижи чарып болбас ужурлуг» (Матфей 19:6).