Embimbiliya poku lekisa etepiso li kasi pokati ka vana va tiamẽla ketavo liocili kuenda vana ka va tiamẽleleko, li popia hati: “Vu va limbukila kapako avo. Omanu va yunga hẽ ayuva kolosongo, ale akuyu kocambanda?” (Mateo 7:16) Omo liaco, ndeci tu tepisa ayuva lolosongo kapako avio, tu pondola oku tepisavo etavo liocili, letavo liesanda kovilinga, ale kovituwa vi kuãimo ndeci:

1.   Etavo liocili li longisa ocili ca kunamẽla Vembimbiliya, okuti, koviholo viomanu hakoko. (Yoano 4:24; 17:17) Valongiso aco mua kongela ocili Cembimbiliya catiamẽla komunu kuenda kelavoko liomuenyo ko pui vocumbo celau palo posi. (Olosamo 37:29; Isaya 35:5, 6; Esekiele 18:4) Olio li sitululavo uhembi wetavo liesanda.—Mateo 15:9; 23:27, 28.

2.   Etavo liocili li kuatisa omanu oku kũlĩha Suku kuenda li va longisavo onduko yaye okuti, Yehova. (Olosamo 83:18; Isaya 42:8; Yoano 17:3, 6) Olio ka li longisa okuti Suku elumbu limue, ale omunu umue ka tu kapeleko. Pole, olio li longisa okuti Suku o yongola okuti, tu kuata ukamba laye.—Tiago 4:8.

3.   Etavo liocili li longisa okuti Suku eca epopelo pocakati ca Yesu Kristu. (Ovilinga 4:10, 12) Vana va tiamẽla ketavo liocili va pokola kolonumbi via Yesu kuenda va li kolisilako oku kuama ongangu yaye.—Yoano 13:15; 15:14.

4.   Etavo liocili li tava okuti Usoma wa Suku owo lika u ka potolola ovitangi viomanu. Vana va tiamẽla ketavo liocili va lekisa ombili yalua poku kunda catiamẽla Kusoma waco.—Mateo 10:7; 24:14.

5.   Etavo liocili li vetiya oku li sola pokati. (Yoano 13:35) Olio li longisa oku sumbila omanu vakuakuova osi, ovituwa, alimi kuenda vakuakalo osi. (Ovilinga 10:34, 35) Omo lioku vetiyiwa locisola, vana va tiamẽla ketavo liocili ka va pangi onepa kovoyaki.—Mika 4:3; 1 Yoano 3:11, 12.

6.   Vetavo liocili ka muli ulongisi umue o fetiwa kuenda ka ku lukiwa olonduko via velapo kasongui vavo.—Mateo 23:8-12; 1 Petulu 5:2, 3.

7.   Omanu va panga onepa ketavo liocili, ka va pangi onepa kopulitika. (Yoano 17:16; 18:36) Pole, va sumbila kuenda va pokola kombiali yokofeka va kasi ndomo ci likuata locihandeleko Cembimbiliya cokuti: “Eci ku Kaisare ovina via Kaisare, [okuti olombiali violuali,] ovina via Suku, ku Suku.”—Marko 12:17; Va Roma 13:1, 2.

8.   Etavo liocili onjila yomuenyo okuti, haciholoko, ale ocituwa cimue ño. Omanu vana va tiamẽla ketavo liaco, va kapako olonumbi Viembimbiliya volonepa viosi viomuenyo wavo. (Va Efeso 5:3-5; 1 Yoano 3:18) Ovo ka va kuete omuenyo umue wesumuo, pole, va kuete esanju poku fendela “Suku ukuesanju.”—1 Timoteo 1:11.

9.   Vana va tiamẽla ketavo liocili vañami ñami. (Mateo 7:13, 14) Ovo olonjanja vialua va popiwa lãvi, va pembuiwa kuenda va lambalaliwa omo lioku linga ocipango ca Suku.—Mateo 5:10-12.

Etavo liocili ka li lomboloka lika ‘etavo lia sunguluka kokuange’

 Kuli ohele yimue poku nõla etavo limue lia kunamela lika konjila ndomo tu liyeva. Embimbiliya lia popele ale okuti ku ka kala otembo yimue okuti omanu “va ka liongoluila alongisi [atavo] oco va yeve eci ovatũi avo a sanjukila oku yevelela.” (2 Timoteo 4:3) Pole, embimbiliya li tu vetiya oku kuama “onjila yoku fendela ya lipua haiyo ya pua evĩho kovaso a Suku yetu haeye Isia,” ndaño okuti ka va luile omanu va tiamẽla ketavo liaco.—Tiago 1:27, etosi; Yoano 15:18, 19.