O Bavulono Yinene ya tukuiwa Vembimbiliya kelivulu Liesituluilo yi lomboloka atavo osi esanda a sangiwa voluali. Atavo aco ka a taviwa la Suku. a (Esituluilo 14:8; 17:5; 18:21) Ndaño okuti a litepa kovina vialua, pole, avato aco osi esanda a tindula omanu kefendelo liocili lia Suku yocili Yehova.—Esinumuĩlo 4:35.

Ndomo ku Limbukiwa o Bavulono Yinene

1.   O Bavulono Yinene ondimbukiso yimue. Embimbiliya li tukula o Bavulono Yinene “ndukãi” umue kuenda “ocipuepue.” (Esituluilo 17:1, 3, 5) Elivulu Liesituluilo lia sonehiwa “lovindekaise.” Omo liaco, tu pondola oku popia okuti o Bavulono Yinene ocindekaise cimue kuenda ka yi lomboloka ukãi umue. (Esituluilo 1:1) Handi vali, eye wa “tumãla kovava alua” a lomboloka “omanu lowiñi, lolofeka kuenda alimi.” (Esituluilo 17:1, 15) Ukãi umue okuti hawocindekaiseko, nda ka tẽlele oku ci linga.

2.   O Bavulono Yinene yi lomboloka ocisoko cimue coluali luosi. Oyo, yi tukuiwa okuti, “olupale lunene lu kuete usoma umue u viala olosoma vio kilu lieve.” (Esituluilo 17:18) Omo liaco, ocisoko cimue ci tumĩla oluali luosi.

3.   O Bavulono Yinene ocisoko cimue catavo okuti, hacisokoko co pulitika ale colomĩlu. O Bavulono kosimbu ya kala olupale lumue okuti, omanu vaco va litumbikile calua ketavo, halio lia kũlĩhĩwile omo lioku “lova” kuenda “umbanda.” (Isaya 47:1, 12, 13; Yeremiya 50:1, 2, 38) Volupale luaco, omanu va enda oku fendela o suku yesanda okuti, Suku yocili Yehova, hayeko. (Efetikilo 10:8, 9; 11:2-4, 8) Olombiali vo ko Bavulono va kala vakuepela kuenda va livelisilepo okuti, Yehova kuenda etavo liocili ci sule. (Isaya 14:4, 13, 14; Daniele 5:2-4, 23) Cimuamue haico okuti, o Bavulono Yinene ya kũlĩhĩwa omo “liumbanda wayo.” Eci ci lekisa okuti, ocisoko cimue cetavo.—Esituluilo 18:23.

    O Bavulono Yinene, ka citava okuti ocisoko cimue copulitika omo okuti, “olosoma vio kilu lieve” vi lila omo lioku kunduiwa kuayo. (Esituluilo 17:1, 2; 18:9) Oyo hacisokoko colomĩlu omo okuti, Embimbiliya yu tepisa ku “vakualomĩlu vo kilu lieve.”—Esituluilo 18:11, 15.

4.   O Bavulono Yinene yi lomboloka etavo liesanda. Etavo liesanda ka li longisa omanu ndomo va kuata ukamba la Suku yocili, Yehova, pole, li va vetiya oku fendela olosuku vikuavo. Embimbiliya li ci tukula okuti, “upuepue konepa yespiritu.” (Ovisila 20:6; Etundilo 34:15, 16) Oviholo kuenda ovituwa via kala ko Bavulono yosimbu, toke cilo via siata katavo esanda, ndeci elongiso lia suku umosi muvatatu, elongiso liokuti vetimba liomunu muli cimue ci amamako lomuenyo noke yoku fa kuenda efendelo lioviteka. Atavo aco poku fendela, va lekisavo ocisola koluali. Embimbiliya li ci tukula okuti, ukahokolo konepa yespiritu.—Tiago 4:4.

    Ovokuasi kuenda ovina vikuavo viatavo esanda, a likuata ciwa leci Embimbiliya li popia catiamẽla ko Bavulono yinene, yina ya “wala uwalo wohusu lowu u kusuka” kuenda ya “liposuisa lulu, lovawe a tĩla, lomota yondongo.” (Esituluilo 17:4) O Bavulono yinene, oyo ono ‘yovina vi lingisa onyanya vio kilu lieve’ ale yalongiso kuenda ovituwa vi sumuisa Suku. (Esituluilo 17:5) Vana va kasi vatavo esanda ‘owiñi, olofeka kuenda alimi,’ va kuatisa o Bavulono Yinene.—Esituluilo 17:15.

 O Bavulono yinene, yi kuete eko omo liolofa “yomanu vosi va pondiwa kilu lieve.” (Esituluilo 18:24) Vokuenda kuanyamo, etavo liesanda lia vetiya ovoyaki kuenda ungangala. Handi vali ka yi longisa omanu ocili catiamẽla ku Yehova Suku ukuacisola. (1 Yoano 4:8) Kuenje ovina viaco via siata oku kuatisa koku pesiwa kuosonde. Omo liaco, vana va yongola oku sanjuisa Suku, va sukila oku ‘tundamo’ ale oku litepa latavo esanda.—Esituluilo 18:4; 2 Va Korindo 6:14-17.