EKUATISO VEPATA
Ndomo o Kuatisa Omõlove Oku Kuata Onima Yiwa Kosikola
Omõlove o mõleha ndu okuti ka kapeleke elilongiso liokosikola kuenje o seteka oku yuvula oku lilongisa kuenda oku linga ovopange okonjo. Oima yipi yi yililako? Eye ka kuata onima yiwa kuenda ovituwa viwa kosikola. O kuatisa ndati omõlove oku kuata onima yiwa kosikola?
Ceci o sukila oku kũlĩha
Oku kisika ci vokiya lika ocitangi caco. Oku kisika omõlove ci ko kokela asakalalo kosikola kuenda konjo! Omo liasakalalo aco, eye o pondola oku kemba, oku seleka onima yĩvi yoseteko a kuata, oku soneha ocicapa cokosikola ale oku laña kelilongiso. Ocitangi ci ka livokiya.
Oku feta ka ci kuatisa. Isia umue o tukuiwa Andrew wa popia hati: “ Oco tu vetiye omõletu, tua fetika oku u feta eci a kuata onima yiwa kosikola. Pole eci ca enda oku koka okuti eye o sokolola lika kofeto tu a enda oku u ĩha. Eci ka kuata onima yiwa, eye o sumua calua omo okuti ka tambuile ofeto yaye.”
Oku vetela evelo alongisi, ka ci kuatisa omõlove. Omõlove o pondola oku sima okuti ka sukila oku likolisilako oco a kuate onima yiwa. Eye o pondolavo oku lilongisa oku vetela evelo omo liakulueya aye loku kevelela okuti vakuavo va tetulula ocitangi caye. Oku teta onimbu, citava okuti omõlove o pumba epuluvi lioku kuata ovituwa vimue vi kuate esilivilo vi ko kuatisa eci a kula okuti: Oku kuata ovikele omo liovituwa viaye.
Ceci o sukila ou linga
Yuvula ku tema. Nda o kasi lonyeño, sapela noke lomõlove catiamẽla konima a kuata kosikola. Isia umue o tukuiwa Brett wa popia hati: “Ame lukãi wange tu kuata onima yiwa eci tu yuvula onyeño kuenda tu likapa komangu yomõletu.”
Onumbi Yembimbiliya: Omunu lomunu a kale ukuanjanga koku yevelela, a livale koku popia.—Tiago 1:19.
Sanda esunga liocitangi caco. Ovina vimue vi koka okuti omunu ka kuata onima yiwa kosikola vievi: Oku sanumuiwa, oku yilukila kosikola yikuavo, asakalalo omo lioseteko, ovitangi vepata, ekambo liotulo, ekambo liesokiyo liwa ale ekambo lioku tula utima. Ku ka sime okuti ocitangi comõlove owesi lika a kuete.
Onumbi Yembimbiliya: “U o tava kondaka o sumũlũha.”—Olosapo 16:20.
Sanda ocitumãlo ciwa coku lilongisa. Linga esokiyo li kuatisa omõlove oku lilongiso kuenda oku linga ovopange okonjo. Sanda ocitumãlo cimue a pondola oku lilongisa okuti ka pali cimue ci tateka oku (kongelamo otelevisão ale otelefone.) Sokiya ovipama vielilongiso okuti ka vi ambata otembo yalua oco ci kuatise omõlove oku tiamisila utima kovina a lilongisa. Hector isia umue ko Alemanha wa popia hati: “Nda eye o ka kuata oseteko yimue, tu lilongisapokamue oloneke viosi okuti ka tu kevelela lika keteke
Yembimbiliya: “Momo ovina viosi vi kuete uvo wavio, ovina viosi vemẽhi lilu vi kuete eteke liavio.”—Ukundi 3:1.
Vetiya omõlove oku lilongisa. Nda okuti omõlove o limbuka okuti oku lilongisa ci kuete esilivilo kokuaye cilo, onjongole yaye yoku lilongisa yi ka li livokiya. Ndeci, o Matematika yi pondola oku u kuatisa oku sokiya ciwa ndomo a talavaya lolombongo vo wĩha vosãi.
Onumbi Yembimbiliya: “Kuata olondunge kuenda uloño... Vi kemainya.”—Olosapo 4:5, 8.
Onumbi: Kuatisa omõlove oku linga ovopange okonjo, pole, ku ko lingileko. Andrew wa popia hati: “Omõletu ukãi wa liwekapo oku likolisilako momo tua enda oku u lingilako.” Longisa omõlove oku linga eye muẽle ovopange okonjo.