Suku yocili eye Ululiki wovina viosi. Eye ka kuete efetikilo ndaño esulilo. (Osamo 90:2) Suku eye Ono yolondaka viwa vi sangiwa Vembimbiliya. (1 Timoteo 1:11) Omo okuti Suku eye wa tu ĩha omuenyo, eye lika tu sukila oku fendela.​—Tanga Esituluilo 4:11.

Lomue omunu wa muile Suku, momo eye Espiritu, ci lekisa okuti, omuenyo waye wa velapo omuenyo woviluvo viosi vi kasi kilu lieve. (Yoano 1:18; 4:24) Pole, ovituwa via Suku tu vi limbukila kovina a lulika. Apako, kuenda eposo liolonelẽho, vi situlula ocisola ca Suku lolondunge viaye. Oku tanda kuoluali, ku eca uvangi wunene waye.​—Tanga Va Roma 1:20.

Poku tanga Embimbiliya, tu lilongisa ovina vialua viatiamẽla kovituwa via Suku. Olio, li tu sapuila ovina Suku a sole levi a nyãle, ndomo a tata omanu vaye kosimbu, kuenda ndomo a enda oku liyeva kovitangi via litepa.​—Tanga Osamo 103:7-10.

Yesu wa popia hati: “A Isietu o kasi kilu. Onduko yove yi sumbiwe.” (Mateo 6:9) Ndaño okuti Suku o kuete olonduko vialua viesumbilo, pole o kuete lika onduko yimosi. Elimi lelimi li kuete ndomo li tukula onduko yaco. Kelimi liumbundu onduko yaco yi tukuiwa hati, “Yehova.” Pole, omanu vamue va yi tukula hati, “Yahweh.”​—Tanga Osamo 83:18.

Vambimbiliya alua onduko ya Suku yopiwamo kuenje ya piñanyiwa lolonduko viesumbilo viokuti, Ñala, ale Suku. Pole eci Embimbiliya lia sonehiwa, onduko ya Suku ya tukuiwa eci ci soka 7.000 kolonjanja. Yesu wa sandeka onduko yaco eci a longisa omanu catiamẽla ku Suku.​—Tanga Yoano 17:26.

Tala ovideo Anga Suku o Kuete Onduko?

Ohali yalua omanu va kasi oku tala, yi lekisa hẽ okuti Suku ka kuete ocikembe letu? Vamue va siata oku popia okuti Suku o kasi oku tu talisa ohali oco a tu seteke, pole eci, haciliko.​—Tanga Tiago 1:13.

Suku wa eca komanu elianjo lioku linõlela eci va yongola oku linga. Anga hẽ ka tua sanjukile omo lielianjo tu kuete lioku nõla oku vumba Suku? (Yehosua 24:15) Pole, omanu valua va siata oku lingila vakuavo ovina vĩvi, kuenje va tala ohali yalua. Yehova o sumua calua poku mola ũvi u kasi oku lingiwa voluali.​—Tanga Efetikilo 6:5, 6.

Yehova o Suku yimue yi kuete ocikembe letu. Eye o yongola okuti tu kuata esanju komuenyo. Ndopo o ka malako ohali yosi kuenda vana va siata oku koka ohali yaco. Pole, o kuete esunga lioku ecelela ohali vokuenda kuotembo yimue yitito. Vocipama 8, tu ka lilongisa esunga liaco.​—Tanga 2 Petulu 2:9; 3:7, 13.

Yehova o tu laleka oco tu kuate ukamba laye poku vangula laye volohutililo. Eye wa kapako omunu lomunu. (Osamo 65:2; 145:18) Yehova ukuakuecela. Eye wa kũlĩha alikolisilo etu oku u sanjuisa, ndaño okuti olonjanja vimue tu lueya. Ndaño okuti ka tua lipuile, tu pondola oku kuata ukamba la Suku.​—Tanga Osamo 103:12-14; Tiago 4:8.

Omo okuti Yehova wa tu ĩha omuenyo, tu sukila oku lekisa ocisola calua kokuaye okuti komunu ukuavo ci sule. (Marko 12:30) Osimbu o lekisa ocisola cove ku Suku poku lilongisa ovina vialua viatiamẽla kokuaye, loku linga ovina a yongola, o ka pamisa ukamba wove laye.​—Tanga 1 Timoteo 2:4; 1 Yoano 5:3.