“Anamoona ale, yaanaareerela murima atthu ootheene waahela muhina alapwa aka. Nihiku nimosa Namoona a Yehova mmosa aitthaniwa Elaine, eemenle waattamela opuro yaari ekarinyu, aahaavaha ipulaxa alapwa aka. Nto, khula okathi naavira ahu opuro ole, alapwa ale yaanitthimakela vakarinyuni wira ‘yavahiwe ipulaxa’.

“Saahivira miyeeri sinceene. Alapwa aka vaanasivela ovahiwa ipulaxa, nave miyo vaanikisivela ovaanela ni Anamoona a Yehova. Masi nkaaphavela oviriha okathi munceene kivaanelaka naawo. Kaarina iyaakha 70, nave nkaasuwela saana itthu sikina Anamoona anikupali aya. Okhala wira ikerexa sinceene saahikinyoonyiha, kaahoona wira fataari omusomaka Biibiliya mekhaka.

“Okathi mukina kaanaaweha Anamoona Yehova akina yeemenle ene mapuro makina ni ikarinyu saya. Naawo-tho yaari atthu ooreera murima. Yaanaakhula makoho aka otheene amurumeelaka Biibiliya. Eyo yaanikiiriha otepa waaroromela.

“Nihiku nimosa, Elaine aahikikoha wira: ‘Atokweene annikupali wira axinama nivahiwe ni Muluku?’ Kaahaakhula wira: ‘Aayo kinnikupali’. Nuumala-vo aahimusoma Yesaya 11:6-9. Ele yaahikiiriha ophavela wiixutta itthu sinceene sa mBiibiliyani. Hata vari siiso, kaaniikhootta iliivuru saya.

“Okhuma nihiku nle kaanivaanela vanceene ni Elaine ni iyawe aitthaniwa Brent. Nuumala-vo yaahikitumererya omusoma Biibiliya okhuma Matheyo mpakha Miteko, wira kiiwexexe ele entaphulela aya okhala mukristau eekeekhai. Kaahipaka eyo. Nuuvira okathi vakhaani, Elaine ni Brent yaahipacerya okisomiha Biibiliya. Eyo yiiraneyale mwaakha wa 2016.

“Yaanikisivela vanceene yoosoma aka ya Biibiliya ni orowa omuthukumanoni khula esumana. Waanikisivela-tho wiixutta itthu Biibiliya onihimya awe. Nto nuuvira mwaakha mmosa, kaahipatisiwa khukhala Namoona a Yehova. Vano kirina iyaakha 79, kinnixukhurela vanceene mwaha woophwanya etiini yeekeekhai. Yehova ookireeliha okivahaka eparakha yoowiirela mpantta emusi awe ya olumwenku wootheene”.