Dumma dummabay etawu siyettido attuma asatunne macca asatu taarikiyaa Geeshsha Maxaafay yootees. Nuuni eta deˈuwan hanidabaa nabbabiyo wode, nuugaara issi malabay siyettido ura taarikiyaa akeekana danddayoos.

Harati nuussi siyettiyaabaa akeekanaadan koyoos. Ubba qassi nuuni guuggiyaa sahuwan waayettiyo wode, hegee keehi koshshiyaaba. Nuuni Geeshsha Maxaafaa nabbabiyo wode, nuugaadan qoppidanne nuugaa malabay siyettido haratubaa tamaaroos. Yaatiyoogan, hegaadan siyettiyoynne unˈˈettiyay nu xalla gidennaagaa akeekoos.

• Maaddiyaabi baynnabadan qoppidanne yibbaatida asati yootido daro qofay Geeshsha Maxaafan deˈees. Neeni, ‘Taani hagaadan deˈana danddayikke’ gaada qoppa eray? Muusessikka, Eelasaagaadaaninne Daawitaagaadan siyettiis.—Qoodaabaa 11:14; 1 Kawotu Maxaafaa 19:4; Mazamure 55:4.

• Iyyo naˈi baynna gishshawu I dawuttiyaa yiilloyin ‘keehi mishettida’ Haanno giyo maccaaseebaa Geeshsha Maxaafay yootees.—1 Sameela 1:6, 10.

• Geeshsha Maxaafay nuugaadan awu siyettido Iyyooba giyo bitaniyaabaa yootees. I Yihoowa mintti ammaniya asa gidikkonne, issi wode keehi unˈˈettidi hagaadan giis: “Taani ta de7uwaa karaas; taani merinau de7anau koyikke.”—Iyyooba 7:16.

Qohiya qofaa aggida, Geeshsha Maxaafay yootiyo hageetubaa nabbabiyoogan, nuunikka unˈˈettiyoogaa genccanawu maaddiya minotettaa demmana danddayoos.