Hara ura gakkidabay A gakkin hanotay ay mala gidanaakko qoppiyoogan, he urawu siyettiyaagaadan qarettiya urawu siyettees woy I A hanotaadan hanees. Rik Hansena giyo, guuggiyaa payyatettaa eranchcha gidida dottoree “nuuni yelettoosappekka doommidi qarettana danddayiyoogaa” yootiis.

HAGAA QOPPA: Qarettana danddayiyoogan nuuni saˈan deˈiya meretatuppe dumma gidiyoy aybissee? Asay Xoossaa leemisuwan merettidoogaa Geeshsha Maxaafay yootees. (Doomettaabaa 1:26) Nuuni Xoossaa leemisuwan merettido gishshawu, A loˈˈo eeshshata amarida hanotan bessana danddayoos. Hegaa gishshawu, siiqiya asay qaretay denttettin harata maaddiyo wode, nuna medhdhida siiqiya Xoossaa Yihoowagaadan eti qarettoosona.—Leemiso 14:31.

Xoossay nuussi qarettees; qassi nuuni waayettiyoogaa beˈanawu koyenna. Aylle gididi Gibxxen metuwan genccidi, guyyeppe 40 layttawu bazzuwan metootida beni Israaˈeela asaa xeelliyaagan Geeshsha Maxaafay hagaadan gees: ‘Eta waaye ubban I waayettiis.’ (Isiyaasa 63:9) Xoossay eta waayiyaa eriyoogaa xalla gidennan, he hanotan seelettidoogaa akeeka. Xoossay, “Inttena bochchiyaagee ta aifiyaa buluwaa bochchees” yaagees. (Zakkaariyaasa 2:8) Harati nuna qohiyo wode, nu wozanay seelettiyo wode aageekka seelettees.

Nuuni Xoossay nuuyyo qarettana bessenna giidi nu bolli pirddana danddayoos; shin Geeshsha Maxaafay, “Xoossai nu wozanaappe gita; qassi i ubbabaa erees” giidi nuna minttettees. (1 Yohaannisa 3:19, 20) Nuuni nuna eriyoogaappe aaruwan Xoossay nuna erees. I nu hanotaa, nu qofaanne nuuyyo siyettiyaabaa ubbaa loytti erees. I nuuyyo qarettees.

Geeshsha Maxaafay nuna minttettiyoobaa

• “Intte xeesana; xeesin GODAI intteyyo koyana. Intte maaduwaa ekkanau waassana; waassin GODAI, ‘Hekko, taani hagan de7ais!’ yaagana.”—ISIYAASA 58:9.

• “Aissi giikko, taani intteyyo halchchiyo halchchuwaa taani GODAI erais; hegeenne, intteyyo sintta wodiyaanne ufaissaa immana mala, saro halchchoppe attin, iita halchcho gidenna. Hegaappe guyyiyan, intte tana xeegana; taakko yaananne tana woossana; taanikka intteyyo siyana.”—ERMMAASA 29:11, 12.

• “Taani woisu afuttaa tigidaakko, neeni eraasa. Eti ne mazggafan de7okkonaa?”—MAZAMURE 56:8.

Xoossay nuuyyo qarettiyoogaa eriyoogee nuuni metuwan genccanaadan maaddana danddayii? Maari hanotaa qoppa:

“Layttay 18 gidido ta naˈaa kansseree naaˈˈu layttawu sakkin I hayqqidoogan taani keehi azzanin, deˈoy tawu iitiisinne deexxiis. Yihooway kelttiyaa gelidi ta naˈaa pattibeenna gishshawu taani A bolli hanqqettaas!

“Usuppun layttappe guyyiyan, ta gubaaˈiyan deˈiya siiqiyaanne qarettiya issi laggiyaa taani Yihooway tana siiqenna gaada yootiyo wode loytta ezggaasu. A kelttiyaa gelennan daro saatiyawu ta yootiyoobaa ezgga simmada, tana keehi minttettida xiqisiyaa yootaasu. He xiqisee 1 Yohaannisa 3:19, 20n deˈiya, ‘Xoossai nu wozanaappe gita; qassi i ubbabaa erees’ giyaagaa. Yihooway nu waayiyaa akeekiyoogaa A yootaasu.

“Yaanikkonne, hanqquwaa agganawu taani keehi metootaas! He wode Mazamure 94:19n deˈiya, ‘Tana hirggai woriyo wode, neeni tana woppu oottada ufaissaasa’ giya xiqisiyaa nabbabaas. He xiqiseti tawu xaafettidabadan taassi siyettiis! Wurssettan, Yihooway siyiyoogaanne akeekiyoogaa erada ta waayiyaabaa ayyo yootidoogee tana keehi minttettiis.”

Xoossay nubaa akeekiyoogaanne nuuyyo qarettiyoogaa eriyoogee keehi minttettiyaaba! SHin, waayee keehi daridoy aybissee? Nuuni mooridobaa gaasuwan Xoossay qaxxayiyo gishshataassee? Xoossay waaye ubbaa xayssanawu oottanabi deˈii? He allaalleta kaalliya huuphe yohotun beˈana.