Xoossay Waaye Ubbaa Mata Wode Xayssana
“Abeet GODAU, neeni tana maaddanaadan taani xeesiyo wode, aude gakkanaashin siyennan ixxuutee? Qassi taani naaqettada neeyyo waassiyo wode, aude gakkanaashin ashshennan ixxuutee?” (Imbbaaqooma 1:2, 3) Xoossan nashettida loˈˈo bitanee Imbbaaqoomi hegaadan giis. A woosay A ammanoy shuggidoogaa bessii? CHii, bessenna! Xoossay ba keerido wodiyan waayiyaa xayssanaagaa Imbbaaqoomawu yootiis.—Imbbaaqooma 2:2, 3.
Neeni woy ne dabboy waayettiyo wode, Xoossay kelttiyaa gelana koshshishin eesuwan maaddibeenna gaada qoppiyoogee metenna. SHin, Geeshsha Maxaafay hagaadan minttettees: “Issooti issooti qoppiyoogaadan, Godai ba oottana giidoogaa oottanau takkenna; shin ooninne ba nagaraappe simmanaadan koyeesippe attin, ooninne xayana mala koyenna gishshau, inttebaa genccees.”—2 PHeexiroosa 3:9.
XOOSSAY AWUDE XAYSSANEE?
He wodee keehi matiis! Issi yeletay ha alamiyaa wurssetta gallassaa malaata gidida dumma dummabaa beˈanaagaa Yesuusi qonccissiis. (Maatiyoosa 24:3-42) Yesuusi yootido hiraagay ha wodiyan polettiyoogee Xoossay asaa allaalliyan kelttiyaa geliyo wodee keehi matattidoogaa bessiyaaba. *
SHin Xoossay waaye ubbaa waati xayssanee? Yesuusi saˈan deˈiyo wode, asaa waayiyaappe shemppissanawu Xoossawu wolqqay deˈiyoogaa bessiis. Hegawu amarida leemisota beˈa.
Meretay Gattiyo Daafabaa: Yesuusinne I kiittidoogeeti Galiila Abban wolwoluwan biishin, wolqqaama gotee denddidi eta wolwoluwaa muukkana haniis. SHin Yesuusi inne A Aaway carkkuwaa seerana danddayiyoogaa bessiis. (Qolasiyaasa 1:15, 16) Yesuusi, ‘Coˈˈu ga; woppu ga’ giis. Yaagin aybi hanidee? “Goteekka co77u gin, ubbabaikka woppu giis.”—Marqqoosa 4:35-39.
Sahuwaa: Qooqetanne bollay silidoogeeta, qassi kaarettay, inchchirichchay, woy hara ayba sahoynne oyqqidoogeeta pattiyoogan Yesuusi keehi erettiis. I “harggida asa ubbaakka pattiis.”—Maatiyoosa 4:23, 24; 8:16; 11:2-5.
Kattay Qaxuhatiyoogaa: Yesuusi ba Aaway immido wolqqan guutta qumaa keehi daro oottiis. I saˈan haggaaziyo wode, shaˈan qoodettiya asaa naaˈˈutoo mizidoogaa Geeshsha Maxaafay yootees.—Maatiyoosa 14:14-21; 15:32-38.
Hayquwaa: Yesuusi heezzu asata hayquwaappe denttidoogaa Geeshsha Maxaafay yootiyoobay hayquwaa xayssanawu Yihoowawu wolqqay deˈiyoogaa qonccissees. I hayquwaappe denttidoogeetuppe issoy hayqqoosappe oyddu gallassa gididoogaa.—Marqqoosa 5:35-42; Luqaasa 7:11-16; Yohaannisa 11:3-44.
^ Wurssetta gallassabaa gujjada eranawu, Yihoowa Markkati attamissido, Merinawu Ufayttada Deˈa! giyo maxaafaa timirtte 32 xeella; qassi www.mt711.com saytiyaappe miishshaa qanxxennan dawunlode oottana danddayaasa.