Chii. Nuuni Yihoowa Markkati Xoossay ubbabaa medhdhidoogaa ammanoos. Shin, ubbabay mexi usuppun gallassatun merettiis giyo qofaa maayokko. Aybissi? Ubbabay mexi usuppun gallassatun merettiis giyageetu qofaappe daroy Geeshsha Maxaafay yootiyobaara maayettenna gishshataassa. Kaallidi deˈiya naaˈˈu leemisota beˈa:

1.   Usuppun gallassati ay keena wodee? Ubbabay mexi usuppun gallassatun merettiis giidi ammaniyageeti, he gallassati 24-saatee deˈiyogeeta giidi ammanoosona. Shin, Geeshsha Maxaafan “gallassaa” geetettida qaalay adussa wodiya bessiyaba.—Doomettaabaa 2:4; Mazamure 90:4.

2.   Saˈay merettoosappe ay keena layttee? Ubbabay mexi usuppun gallassatun merettiis giidi ammaniya issoti issoti saˈay merettoosappe amarida shaˈu laytta giidi tamaarissoosona. Gidoppe attin, usuppun gallassatun merettidabatuppe kase saˈaynne saloy deˈiyogaa Geeshsha Maxaafay yootees. (Doomettaabaa 1:1) Hegaappe gishshawu, Yihoowa Markkati saˈaa layttay daro biiloone gidana danddayiyogaa yootiya, saynisiyan pilggidobaa sirokkona.

 Nuuni Yihoowa Markkati ubbabay merettidoogaa ammanikkonne, saynisee yootiyobay likke gidenna gookko. Tumu sayniseenne Geeshsha Maxaafay yootiyobay maayettiyogaa ammanoos.