An kabaraka tungod han masamok hinduro nga kalibotan mahimo makaapekto ha mga tawo ha pisikal ngan ha emosyon. Damu han mga naaapektohan han mga panhitabo yana an nawawad-an na hin paglaom. Ano an ira reaksyon?

• An iba nadiri na ngani paghunahuna parte ha kabubuwason.

• An iba nainom hin makahurubog nga irimnon o nagdudroga basi diri na maghinunahuna han ira mga problema.

• An pipira nakakagsiring nga mas maopay na la mamatay. “Ano pa an pulos nga mabuhi?” nagpapakiana hira.

• An pipira mo nga problema yana bangin temporaryo la ngan bangin magbag-o an imo kahimtang nga diri mo ginlalaoman.

• Bisan kon an imo sitwasyon diri nagbabag-o, may mahihimo ka nga makakabulig basi makaya ito.

• An Biblia naghahatag hin tinuod nga paglaom—usa nga permanente nga solusyon ha mga problema han mga tawo.

An Biblia nasiring: “Ayaw gud kamo kabaraka mahitungod han sunod nga adlaw, kay an sunod nga adlaw may kalugaringon nga mga kabaraka. An tagsa nga adlaw may kalugaringon nga mga problema.”—Mateo 6:34.

Hunahunaa an yana la nga adlaw. Ayaw tuguti an imo mga kabaraka para ha sunod nga adlaw nga makaulang ha pagtuman han imo mga responsabilidad yana.

An pagkinabaraka mahitungod ha magraot nga butang nga bangin mahitabo makakadugang la han imo istres ngan magpapaluya han imo paglaom para ha mas maopay nga kabubuwason.

Usa nga salmista ha kadaan nga panahon an nagsiring ha iya pag-ampo ha Dios: “An imo pulong lampara ha akon tiil, ngan lamrag ha akon dalan.” (Salmo 119:105) Pansina kon paonan-o pariho gud hito an Biblia, an Pulong han Dios.

Ha masirom nga gab-i, an lampara nabulig ha aton ha pagdesisyon kon diin kita maglalakat. Ha pariho nga paagi, an Biblia may praktikal nga kinaadman nga maggigiya ha aton kon kinahanglan naton maghimo hin makuri nga desisyon.

An lamrag naghahatag hin kapawa ha aton dalan basi makita naton kon ano an aada ha unhan. Ha pariho nga paagi, an Biblia naghahatag hin kapawa basi makita naton nga may-ada paglaom para ha mas maopay nga kabubuwason.