Ŵalume ni ŵakongwe ŵali ŵakulipeleka mu ulombela mwawo akusawuwona ulombela kuŵa mkamulano wangamala. Jwalijose akusalipikana kuŵa jwakuteteyeka. Jwalijose akusaŵa jwakusimichisya kuchimbichisya mkamulano welewu atamose pasimene ni yakusawusya mu ulombelamo.

Ŵandu ŵane akusalikanganichisya kutama mu ulombela ligongo lyakogopa kuti naga akusagula kumasya ulombelawo, ŵane mpaka ŵawoneje mwangaŵajilwa. Nambope kulipeleka kukusayika ligongo lyakunonyelana soni kuchimbichisyana.

MFUNDO JA M’BAIBULO: “Jwamlume akalekangana ni ŵamkwakwe.”—1 Akolinto 7:11.

Micah jwatite, “Naga mli ŵakulipeleka mu ulombela ngamkusatumbila chitema, ŵamkwenu pamlemwechesye. Mkusaŵa ŵakwanguya kululuchila soni kupepesya. Pamsimene ni yakusawusya mu ulombela mkusapata matala gakuyimachisya m’malo mwakwamba kuwutuchila kumasya ulombelawo.”

Ŵalume ni ŵakongwe ŵakusaŵa ŵangalipeleka mu ulombela mwawo, pasimene ni yakusawusya akusawutuchila kuŵecheta kuti, ‘Ngatukuŵajilana.’ Kaneko akusatanda kupata matala gakumachisya ulombelawo.

Jean jwatite, “Ŵandu ŵajinji akusalombela ali mkumanyilila kuti naga yikasawusyeje chachigamba kumasya ulombelawo. Ŵandu ŵakwinjila mu ulombela ali akwete nganisyo syelesi, ngakusaŵa ŵakulipeleka.”

ALIWUNGUNYE

Patandite kangana . . .

• Ana akusalijimba magambo kuti ŵalombene ni mundu jwangaŵajilwa?

• Ana akusaganisya kuti bola akalombene ni mundu jwine?

• Ana akusanonyela kuŵecheta kuti “Chinamleche” kapena “Chimbate jwine jwakuŵajilwa”?

Naga kwanga kwawo kuli elo pa yiwusyo yine mwa yeleyi, sambano jili ndaŵi jakuti alimbisye chinonyelo mu ulombela wawo.

AKAMBILANE NI ŴAMKWAWO

• Ana chinonyelo chitandite kumala mu ulombela mwawo? Naga yili myoyo, ligongo chichi?

• Ana mpaka tutende chichi kuti tulimbisye chinonyelo chetu?

ALINJE KUTENDA AYI

• Ŵalembele ŵamkwawo chikalata chakusala chindu chaŵachinonyele chachatendekwe munyumamu

• Pali kumasengo aŵicheje yiwulili ya ŵamkwawo pamalo gakuwonechela

• Alinjeje kuŵechetana ni ŵamkwawo lisiku lililyose pali kumasengo kapena kwine kulikose

MFUNDO JA M’BAIBULO: “Yayilumbikenye Mlungu pampepe, mundu jwine akayilekanganya.”—Mateyu 19:6.