ŴACHINYAMATA
10: Aŵeje Ŵakulupichika
ANA YELEYI YIKUGOPOLELA CHICHI?
Ŵandu ŵakulupichika akusaŵa ŵakudalilichika kwa achinangolo ŵawo, achimjawo soni kwa mabwana gawo. Akusapikanila malamusi, kusunga yilanga yawo, soni ndaŵi syosope akusaŵecheta yisyesyene.
LIGONGO LYAKWE KULI KWAKUSOSEKWA
Ndaŵi syejinji, mundu jwangakulupichika jwangapochela ufulu wejinji.
Msikana jwine jwa yaka 16 lina lyakwe Sarahi jwatite, “Kuti achinangolo ŵenu amkulupilileje mkusosekwa mtendeje yindu mpela mundu jwamkomangale nganisyo, soni mlidalileje. Mtendeje yeleyi atamose pali pangali achinangolo ŵenu.”
MFUNDO JA M’BAIBULO: “Mpitilisye kulilinga kuti mmanyilile kuti mli mundu jwamtuli.”—2 Akolinto 13:5.
YAKUSOSEKWA KUTENDA
Naga akusaka kuti ŵandu ŵakulupilileje kapena kuti atandilesoni kwakulupilila, yindu yakuyichisyayi mpaka yakamuchisye.
Aŵeje ŵakuwona mtima. Ŵandu mpaka aleche kwakulupilila naga ndaŵi sine akusalambusyaga. Nambo naga akusatenda yindu mwakuwona mtima soni ngakusasisa yakulemwa yawo, ŵandu mpaka ŵakulupilileje.
Caiman jwaŵechete kuti, “Yikusaŵa yangasawusya kuŵa jwakuwona mtima yindu payikwenda chenene. Nambo naga ukuŵa jwakuwona mtima atamose pa yindu yakuti chiyikujonanjile mbili, ŵandu akusakukulupilila.”
MFUNDO JA M’BAIBULO: “Tusimichisye kutenda yosope mwakuwona mtima.”—Ahebeli 13:18.
Aŵeje ŵakulupichika. Kuwungunya kukwatendekwe ku U.S. ŵapatile kuti chindu chakusosekwa mnope kuti mundu alembedwe masengo, chili kuŵa jwakulupichika. Naga akuŵa ŵakulupichika apano, yichakamuchisya pachachikulapo.
Sarah jwa yaka 19 jwatite, “Achinangolo ŵangu akusamanyilila ndaŵi jangusosekwa kutenda masengo ganegakwe mwangajembecheya kuti asalile yakutenda. Pangupitilisya kutenda yeleyi achinangolo akusangulupilila mnope.”
MFUNDO JA M’BAIBULO: ‘Ngukulupilila kuti chimtende yeleyi. Ngumanyilila kuti chimtende atamosesoni yakupunda yimbecheteyi.’—Filimoni 21.
Awusimaneje mtima. Kukula kwa mundu kuli kwangasawusya kukuwona ŵane. Nambo yikusajigala ndaŵi kuti umanyilile kuti sambano akomangele nganisyo.
Mnyamata jwine jwa yaka 21 lina lakwe Brandon jwaŵechete kuti, “Kulupichika kamo nganikuŵa kutendekasisye kuti achinangolo ŵenu soni achimjenu amkulupilileje. Nambo naga kulupichika kwenu kuli kwangachengachenga, mwapanandipanandi mpaka atande kumkulupilila.”
MFUNDO JA M’BAIBULO: “M’wale . . . kuwusimana mtima.”—Akolose 3:12.
