Maʼatech. Le Bibliaoʼ maʼatech u yaʼalik wa kʼaas u yantal taakʼin tiʼ máak yéetel maʼ tu yaʼalik wa letiʼ beetik xan u yúuchul tuláakal baʼax kʼaas. Yaan junpʼéel refrán ku yaʼalikeʼ «tuláakal baʼax kʼaas ku yúuchleʼ letiʼe taakʼin beetik u yúuchloʼ». Yaʼab máakeʼ ku tuklikeʼ le tʼaanoʼobaʼ tiʼ u taaloʼob teʼ Bibliaoʼ, pero ¿jach wa jaaj leloʼ? Le Bibliaoʼ maʼ jach bey u yaʼalikoʼ. Baʼaxeʼ ku yaʼalik: «Tumen u yaakuntaʼal le taakʼinoʼ u moots tuláakal u jejeláasil kʼaas» (1 Timoteo 6:10, El Nuevo Testamento de Nuestro Señor Jesucristo ich Maya, toʼon tsʼaamil u negritasil). a

•  ¿Baʼax ku yaʼalik le Biblia yoʼolal le taakʼinoʼ?

•  ¿Baʼaxten maʼ uts ka yaabiltaʼak le taakʼinoʼ?

•  Utsiloʼob ku taasik k-beetik baʼax ku yaʼalik le Bibliaoʼ

•  Le Bibliaoʼ ku yaʼalik yoʼolal le taakʼinoʼ

 Le Bibliaoʼ ku yaʼalikeʼ wa ku meyajtoʼon tubeel le taakʼinoʼ jeʼel u yáantkoʼoneʼ yéetel jeʼel tak u kanáantkoʼoneʼ (Eclesiastés 7:12). Tsʼoʼoleʼ ku yaʼalikeʼ jeʼel xan u bin utsil tiʼ le máaxoʼob ku yáantkoʼob u yéet máakiloʼob yéetel le taakʼin yaantiʼoboʼ (Proverbios 11:25).

 Chéen baʼaleʼ le Bibliaoʼ ku kʼaʼajsiktoʼoneʼ le taakʼinoʼ maʼ letiʼe baʼax maas kʼaʼanaʼan ichil k-kuxtaloʼ. Hebreos 13:5, ku yaʼalik: «Le bix a kuxtaleʼexoʼ ka u yeʼes maʼ a yaabiltmeʼex le taakʼinoʼ, yéetel kiʼimakchajak a wóoleʼex yéetel le baʼaxoʼob yaanteʼexoʼ». ¿Baʼax ku kaʼansiktoʼon le tekstoaʼ? Ku kaʼansiktoʼoneʼ le taakʼinoʼ jach jeʼel u yáantkoʼoneʼ pero maʼ letiʼe baʼax maas kʼaʼanaʼanoʼ. Mientras ka yanak baʼal k-jaante, ka yanak k-nookʼ yéetel tuʼux k-kajtaleʼ kʼaʼabéet u kiʼimaktal k-óol (1 Timoteo 6:8).

 Le máaxoʼob ku tsʼíiboltkoʼob u yantal yaʼab baʼal tiʼobeʼ maʼ ken u kʼamoʼob le kuxtal minaʼan u xuuloʼ (Efesios 5:5). ¿Baʼaxten? Yáaxeʼ tumen u tsʼíiboltik máak u ayikʼaltaleʼ bey ka u adorart imagenoʼobeʼ (Colosenses 3:5). U kaʼapʼéeleʼ tumen utiaʼal u yantal tiʼ máak le baʼax ku tsʼíiboltikoʼ jeʼel tak u beetik baʼaloʼob maʼ maʼaloʼobeʼ. Proverbios 28:20, ku yaʼalik: «Le máax ku yilik u séeb ayikʼaltaleʼ yaan u lúubul tiʼ baʼax kʼaas». Jeʼel tak u kʼuchul u yokolt wa baʼaxeʼ, u secuestrart u yéet máakil wa u kíimsik chéen tumen ku tsʼíiboltik u yantal taakʼin tiʼeʼ.

 Tsʼoʼoleʼ kex maʼ k-beetik baʼaloʼob kʼaastakeʼ pero wa k-yaabiltik le taakʼinoʼ jeʼel u yantaltoʼon problemaseʼ. Le Bibliaoʼ ku yaʼalik: «Le máaxoʼob u chʼaʼtukultmaj u ayikʼaltaloʼoboʼ ku túuntaʼal u yóoloʼob yéetel ku lúubloʼob tiʼ junpʼéel léech bey xan tiʼ kʼaakʼas tsʼíibolaloʼob» (1 Timoteo 6:9).

 Wa mantatsʼ k-beetik baʼax ku yaʼaliktoʼon Dios yéetel maʼ t-chʼíikil k-kaxt ayikʼalileʼ yaan u bintoʼon maʼalobil yéetel letiʼeʼ yaan u kiʼimaktal u yóol t-éetel. Wa k-tsʼáaik k-óol k-beet xan baʼax uts tu tʼaaneʼ letiʼeʼ ku yaʼaliktoʼon: «Mix bikʼin ken in pʼatech yéetel mix bikʼin ken in xúumpʼattech» (Hebreos 13:5, 6). Tsʼoʼoleʼ ku yaʼalik xaneʼ yaan u bendecirtik «juntúul máax chúukaʼan u yóol» (Proverbios 28:20).