Michelle: Padiuxi; yannadxí cayueniáʼ ca xpecínuluʼ diidxaʼ ne cusaananiáʼ laacaʼ tratadu riʼ: Ñuuláʼdxiluʼ ñánnaluʼ xi riníʼ Biblia de cani huanabadiidxaluʼ la? Chigudieeʼ lii tobi.

Sofía: Ñee caniʼni de religión la?

Michelle: Ajaʼ. Biiyaʼ guʼyuʼ neni xhoopaʼ guendarinabadiidxaʼ lu primé yaza stini. Gunáʼ ni ñuulaʼdxuʼ...

Sofía. Maʼ cadi guiniʼrouʼ gastiʼ. Qué racalaʼdxeʼ gunítiluʼ stiémpuluʼ.

Michelle: Xiñee caniʼluʼ zacá pue.

Sofía: Purtiʼ qué gannaʼ pa dxandíʼ nuu Dios.

Michelle: Xquíxepeʼ lii saca cayábiluʼ naa xi riníʼ íqueluʼ. Ñee maʼ xadxí riníʼ íqueluʼ zacá la?

Sofía: Coʼ, dxi gucaʼ nahuiiniʼ la? guyaaʼ yuʼduʼ, peru maʼ xadxí qué huayaaʼ ni.

Michelle: Bia guʼyuʼ. Nin caʼruʼ gabeʼ lii tu laʼyaʼ njaʼ. Naa laʼyaʼ Michelle, lii tu laluʼ pue.

Sofía: Naa la? Sofía.

Michelle: Galanpeʼ binebiaʼyaʼ lii Sofía.

Sofía: Ngaca nga rabeʼ.

Michelle: Pue naa la? cadi zendadiáʼ ra nuuluʼ para gucaaʼ lii guni creluʼ cani caziideʼ, peru ñuuladxeʼ ninabadiidxaʼ lii pa nuu xiixa bicaa lii guiníʼ íqueluʼ gastiʼ Dios.

Sofía: Nuu pue. Raca diecisiete iza guca chocar carru ra zeʼ jñaaʼ.

Michelle: Aque triste nga ni bizaacabe ca xa. Ñee gucanápebe la?

Sofía: Dede dxiqué maʼ qué rizabe.

Michelle: ¡Ñee la? lii! Nanadxiʼcheʼ runiná nga ladxidoʼloʼ.

Sofía: Runiná pue. Ne stale biaje riníʼ iqueʼ: «Pa dxandíʼ nuu Dios, xiñee cudiibe lugar guizaaca ca nga pue. Xiñee rudiibe lugar tiidinu yuubaʼ pue».

Michelle: Nápaluʼ razón para guni sentirluʼ zacá ne guiníʼ íqueluʼ casi naluʼ ca. Ora cayuniná xiixa yuubaʼ binni ruyubi guiene xiñee cazaaca ni. Lu Biblia laaca rieeteʼ de caadxi hombre ne gunaa ni bizaaca casi cazaacaluʼ ca, neca qué nusaana de ñúnicaʼ ni na Dios.

Sofía: Dxandíʼ la?

Michelle: Dxandíʼ. Ñee zanda guluéʼ lii ti ejemplu la?

Sofía: Zanda pue.

Michelle: Guidúʼyanu xi gunabadiidxaʼ profeta Habacuc Dios. Guidúʼndanu Habacuc capítulo 1 versículo 2 ne 3, nani: «Dede padxí nga gucaaʼ ridxi lii Jiobá para gacaneluʼ naa, ne sin gunadiágaluʼ naa yaʼ. Dede padxí nga gucaaʼ ridxi lii para gulaluʼ naa lade ca guendaridinde riʼ pue. Xiñee rucaaluʼ naa guuyaʼ ni cadi jneza». Ñee laaca maʼ huanabadiidxaluʼ ca nga la?

Sofía: Laaca.

Michelle: Ne nannuʼ xi la? qué ñuu ora nidindené Dios Habacuc pur gunabadiidxaʼ ca nga ne laaca qué ñabi diʼ Dios laabe caquiiñeruʼ gápabe fe.

Sofía: Biaa guʼyuʼ.

Michelle: Biblia laaca rusiidiʼ ruuyaʼ Dios guiráʼ yuubaʼ ridídinu ne rizaaláʼdxibe gacachaahuiʼ cani.

Sofía: Cadi cayeneʼdiáʼ lii.

Michelle: Chiguluéʼ lii ti ejemplu zeeda lu Éxodo 3:7. Ñee zanda gúʼndaluʼ ni la?

Sofía: Zanda pue. Sicaríʼ nani: «Ne laaca guníʼ Jiobá: «Maʼ biiyaʼ pabiáʼ naná yuubaʼ ni cadiʼdiʼ xquidxeʼ ndaaniʼ guidxi Egipto, ne maʼ binadiaʼgaʼ  ridxi stícabe pur cani cucaa laacabe gúnicabe dxiiñaʼ, purtiʼ nannaʼ dxicheʼ xi guendananá cadíʼdicabe».

Michelle: Xquíxepeʼ lii. Ximodo ruuyaluʼ ni bidúʼndanu lu versículo riʼ, ñee raʼbuʼ ruuyaʼ Dios guiráʼ yuubaʼ ridiʼdiʼ binni la?

Sofía: Rabeʼ naa ruuyabe xa.

Michelle: Ne cadi xalágasibe ruuyabe cani. Biiyaʼ xiná últimu ndaa stiʼ versículo ca sti biaje. Dios guníʼ: «Nannaʼ dxicheʼ xi guendananá cadíʼdicabe». Pa ñaca naguidxi ladxidóʼ Dios ne qué rizaalaʼdxiʼ binni, ñee raʼbuʼ niniʼbe zacá la?

Sofía: Coʼ xa.

Michelle: Cadi dxandíʼ, gadxé nga guʼyaʼ binni cayacaná tuuxa ne gadxé nga guiuubaʼ ladxidóʼ ora guʼyaʼ cayacanabe.

Sofía: Dxandíʼ pue.

Michelle: Cadi guiaandaʼ lii ni maʼ guninu ca. Yanna guidúʼyanu sti ejemplu ni rusihuinni pabiáʼ naná ra gudiʼdiʼ xquidxi Dios. Zeeda ni lu Isaías 63:9. Primé ndaa stiʼ versículo ca na: «Biaʼ tiempu bindaa yuubaʼ stícabe, biáʼqueca bindaa yuubaʼ stibe». Ñee raʼbuʼ gucaná ladxidóʼ Dios ora biʼyaʼ cayacaná xquidxi la?

Sofía: Pue, ruluíʼ dxandíʼ biuubaʼ ladxidoʼbe.

Michelle: Dxandipeʼ la? nabé rizaalaʼdxiʼ Dios laanu ne qué riuuláʼdxibe gúʼyabe gacananu. Ora gúʼyabe cusiuubaʼ xiixa ladxidoʼno la? laabe laaca riuuba ladxidoʼbe.

Michelle: Ante chaaʼ ñuuladxeʼ nusieneʼ lii sti cosa.

Sofía: Biaʼsi.

Michelle: Biaa xi riníʼ Biblia de poder ni napa Dios. Ñee zanda gúʼndaluʼ Jeremías 10:12 la?

Sofía: Zanda, nani: «Laabe nga bizaʼbe guidxilayú né poder stibe, ne pur nuu xpiaanibe gunda bizaʼbe guidxilayú ni rudii ni gó binni, ne laaca pur nuu xpiaanibe bizaʼbe guibáʼ».

Michelle: Xquíxepeʼ lii. Yanna guiene chaahuinu ni bidúʼndanu lu versículo ca. Pabiáʼ poder raʼbuʼ biquiiñeʼ Dios para bizáʼ guiráʼ ni nuu guibáʼ ne guiráʼ ni nuu lu Guidxilayú.

Sofía: Stale xa.

Michelle: Pa napa Dios poder para gunda bizáʼ guiráʼ ni nuu guibáʼ ne ni nuu lu Guidxilayú, ñee raʼbuʼ qué gápabe poder para cueebe guiráʼ ni runiná laanu la?

Sofía: Nápabe pue.

Michelle: Yanna guzéʼtenu de jñoouʼ que sti biaje. Xiñee riuubaʼ ladxidoʼloʼ gúʼyaluʼ nuube zacá yaʼ.

Sofía: Purtiʼ jñaaʼ laabe ne nadxieeʼ laabe.

Michelle: Pa ñaca ñápaluʼ poder para nusiándaluʼ laabe. Ñúniluʼ ni la?

Sofía: Ñuneʼ pue.

Michelle: Ngaca nga ni ñuni Dios. Maʼ bidúʼyanu rusiidiʼ Biblia riuubaʼ ladxidóʼ Dios guʼyaʼ gacananu, ne nápabe poder para gunduuxebe guiráʼ ni cayuniná laanu ti ratuhuiiniʼ si. Yanna, ñee riníʼ íqueluʼ pabiáʼ naroʼbaʼ stipa runi Dios para gucueeza laa ne cadi gunduuxecaʼ guiráʼ guendananá ni cadídinu riʼ la?

Sofía: Qué huayuu dxi guiníʼ iqueʼ nga.

Michelle: Yanna, nouʼ xiñee rucueeza Dios laa de guni ni yaʼ. Nouʼ nuu xi pur caʼruʼ cueebe ca guendanagana ni cadídinu riʼ la? *

Sofía: Qué ganna diáʼ, zándaca nuu xi pur caʼruʼ gúnibe ni.

Michelle: ¡Ay! Caxidxi teléfono stiuʼ. Ñee zanda guibiguetaʼ sti dxi para güinu jma de laani la?

Sofía: Zanda, xquíxepeʼ lii. *