Scú, noʼ xidalguixo ló guidopynac Gudxlio. Layibu raniʼyibu diitz sacró de Gobierno xtuny Dios ni ritlaa ló Salmo 68:11, Jehová rasetlaa ndeʼ: «Buñgonaʼ ni raniʼ diitz sacró nacyibu xidal guixo».

Dxiin ni rony hermanas ni nac testigos xtuny Jehová nigolú gadzé mod nacni de dxiin ni rony ministras de stipnés religión. ¿Xigony nacni gadzé mod?

Diti toibsi clas buñ raninéyibu. Buñgonaʼ ni radxin rac sacerdote, máspa la lainy iglesia xtuny cristiandad, rasaniryibu ló xireligionyibu. Guirá buñ ni racadiag layibu nacyibu de xi religioncayibu. Per guirá ministras religiosas de testigos xtuny Jehová rony predicaryibu a guirá buñ ni radzelyibu, laʼga caniʼyibu xtiitz Dios yoʼ por yoʼ o rotísi lagary.

Hermanas ni nac Testigos diti ronyibu tipnés cós ni rony tipnés ministras ni noʼ lad toib religión. Ministras xtuny cristiandad né stipnés religión rasaniryibu nisló congregación né rasuidyibu tipnés doctrinas. Hermanas ni nac Testigo dipa rasuidyibu lainy congregación órni noʼ tipnés buñguieeu ni ma goyonis. Nosi superintendentes ni nac buñguieeu rony láani né nac mextra (1 Timoteo 3:2; Santiago 3:1).

Ló la Biblia ritlaa, que nosi buñguieeu non guisanir lainy congregación. Né instrucciones ni bidudy apóstol Pablo a toib superintendente cristiano ni góc laa Tito ngúca rasetlaa: «Bisiana looy lainy gudx Creta par [...] nayopylo chú ñac anciano lainy tigaaga gudx» (Tito 1:5). Después goniʼbu que superintendente non gac toib buñguieeu que diti non guiniʼ buñ mal de láabu, nosi toib buñgonaʼ non gac tzeelbu» (Tito 1:6). Apóstol láaca bidudybu instrucciones reʼca ló toib guiich ni bixelbu a Timoteo. «Pal toib buñguieeu cayony xtem gac superintendente, xinésni ngú caa guicbu gonybu. Por ngú ni nac anciano, non gacbu buñ ni diti tzoʼ ni guigotz dool láabu, toibsi tzeelbu tzoʼ, ni nan rasuidytzay» (1 Timoteo 3:1, 2).

Per ¿xigony nosi buñguieeu labúu gac superintendente lainy congregación? Pablo goniʼ: «Diti radudi lagary que buñgonaʼ guisuidy né gony mandary a toib buñguieeu, xalagary ngú tzoʼ dzúbu. Portín Adán goyaʼ primer né después Eva» (1 Timoteo 2:12, 13). Ndeʼ radudy diitz, mod bisaʼ Dios Adán né Eva bislooyni que buñguieeu non guisuidy né gap superintendencia.

Jesucristo rasanir nisló Testigos xtuny Jehová, por ngú guiráyibu racanalyibu ejemplo xtuny Jesucristo. Mod ná Lucas, Jesús «gosaabu de gudx en gudx né de ranch en ranch, casuidybu né caniʼbu de Gobierno xtuny Dios». ¿Né xí buny xpiin Jesús órni láabu bixelbu xpiimbu gony ndeʼ? «Layibu gosaayibu de ranch en ranch bisuidybu de Gobierno xtuny Dios» (Lucas 8:1; 9:2-6).

Né scúca, guirá ministros xtuny Jehová ni noʼ ló naareʼ tanli buñguieeu né tanli buñgonaʼ, rony cumpliryibu né gan ni ná Mateo 24:14. Jesús goniʼ: «Buñ sani’ diitz sacró xtuny Gobierno ló guidopynac gudxlio par guicadiag guirá gudx láani; né órcu sadxin fin».