LAʼGA goyoʼ Jesús ló Gudxlio bunybu xomod rony Bixiosbu ni noʼ lainy guibá. Goniʼbu ndeʼ: «Diti rony xitcal por ni násini naʼ xalagary ngú raniya guirá ndeʼ mod bisuidy bixiosa naʼ». Láaca goni’bu: «Guirá ór roni cós ni rioladxbu» (Juan 8:28, 29; Colosenses 1:15). Por ngú, pal nainy ganno ximod rony pensary Dios de buñgonaʼ né ximod raniiny cobioo buñ layibu, non guisuidyno ejemplo xtuny Jesús.

Xidal buñ ni ma bisuidy Evangelios ma bidudyibu cuent que diti ma goyoʼ toib buñ ni godabioo buñgonaʼ xomod Jesús. ¿Ximod bunybu láani? Né ni máspa la, ¿guirá ni bisuidybu labúu gacnéni guirá buñgonaʼ ni noʼ ló naareʼ la?

Jesús diti godabioo buñgonaʼ par ñony cós yox né layibu. Par guirá líderes religiosos buñgonaʼ gocyibu toib tentación par ñaibyibu ló cós yox. Por ngú, diti goninéyibu buñguieeu nisló xidal buñ né pal nareʼyibu non ñeeg guicyibu. Jesús diti goniʼ que non cueʼ buñ layibu tiplad. Xalagary ngú Jesús bisuidy que guirá buñguieeucu non nachocyibu xcaan ni napyibu né ñapyibu respet buñgonaʼ (Mateo 5:28).

Toibtica buelt goniʼbu: «Guirá buñ ni rachíl xcaltzeel né rotzñabu né stoib buñgonaʼ, buñguieeu cayony galyoxh né primer buñgonaʼ ni bitzñanébu» (Marcos 10:11, 12). Jesús diti goyoʼbu de acuerdo mod buny buñ rabínico xpensary que buñguieeu labúu nachíl xcaltzeel «por nitisi cós» (Mateo 19:3, 9). Casi guirá buñ judíos gadzé mod bunyibu pensary de galyoxh. Diti bunyibu crer que toib buñguieeu ma cayony galyoxh pal ñatnébu toib buñgonaʼ ni diti nac tzeʼel. Buñ rabinos buñ pensary que nosi buñgonaʼ rascúyibu né buñguieeu yaca. Toib comentario bíblico rasetlaa, «órni Jesús goni’ de buñguieeu, bisetlabu que toibsi midid rasacyibu ne buñgonaʼ».

Mod racaʼ buñgonaʼ galrracné ló naareʼ: Lainy congregación de testigos xtuny Jehová, buñgonaʼ radzakyibu buñguieeu portín nandxichyibu que diti sabiʼyibu «buñgonaʼ de stoib mod né sabiʼyibu buñgonaʼ né respet» (1 Timoteo 5:2).

Jesús goleʼ tiemp par bisuidybu buñgonaʼ. Buñ rabinos biyopyibu mod par diti nasuidy buñgonaʼ. Per Jesús diti bunybu scú, goleʼbu tiemp par bisuidybu buñgonaʼ ni nigolú, né buny animarbu par naniʼ buñgonaʼ xi ronyibu pensary. Láaca diti goniʼbu que buñgonaʼ nosi lainy cocin gony dxiin. Bislooyibu láani órni bisuidybu María (Lucas 10:38-42). Né mod cuapy Marta a Jesús órni goity Lázaro raslooyni que láaca gocnéni láabu guirá galrrasuidy cú (Juan 11:21-27).

Jesús goyoʼ galrrasaʼ bisuidybu buñgonaʼ. Casi guirá buñgonaʼ judías más goniiny layibu nasannyibu toib buñguieeu portín ndeʼ labúu nadxin ñac toib profeta. Por ngú, órni toib buñgonaʼ góoch a Jesús «naquit bidza’n ni gop looy», ór cú cuapybu que más rasac guisob buñ Dios (Lucas 11:27, 28). Modcu bislooy Jesús que buñgonaʼ nap dxiin ni más rasac que guirá costumbres xtunyibu (Juan 8:32).

Mod racaʼ buñgonaʼ galrracné ló naareʼ: Lainy congregación cristiana, guirá comentarios ni radudy buñgonaʼ ló reunión nigolú rasacni. Herman rapyibu respet buñgonaʼ tanli órni noʼ xidal buñ né órni noʼyibu toibyibu né nacyibu «mextra de cós tzay» (Tito 2:3). Láaca rasuidyibu diitz sacró de Gobierno xtuny Dios (Salmo 68:11; bibiʼ cuadriyen ni laa,  «¿Diti bidudy apóstol Pablo lagary naniʼ buñgonaʼ la?», ni sieed ló página 9).

Gosac buñgonaʼ par Jesús. Ló dzú ni see más gosac mbioxguieuyen. Talmud bisetlaa: «Más nakit buñgonaʼ ni noʼ xiin buñguieeu né ni nap xiin buñgonaʼ nacni toib castig». Par tipnés buñ ni gop xiin buñgonaʼ gocni toib dxiin rodann par layibu né non nayopyibu toib buñguieeu ni naca’ xiinyibu né non naguiixyibu né ma diti labúu ñanyibu bixiosbu o xinaʼbu órni ma nacyibu buñgol.

Jesús tanli gosac par láabu mbioxgonaʼyen né mbioxguieuyen. Xomodca golís Jesús xiingaʼn toib viod de gudx Naín, scúca golísbu xiindzap Jairo lad gueʼet (Marcos 5:35, 41, 42; Lucas 7:11-15). Toibtica buelt bisialbu toib buñgonaʼ «ni bixoʼ diecioch íz xtol demony». Dada góoch Jesús láabu «xiindzap Abrahán», diitzreʼ diti sieedni ló guiich judaicos (Lucas 13:10-16). Diitz nadaʼa ni goni’ Jesús bislooyni que rasac buñgonaʼ né gopbu respet fe ni gop buñgonaʼ (Lucas 19:9; Gálatas 3:7).

Mod racaʼ buñgonaʼ galrracné ló naareʼ: Toib asiático rasetlaa, guisniʼs buñ toib buñgonaʼ nacni suusi naseʼ buñ xquieʼ toib vecin. Per toib buñ ni cayony adorar a Jehová diti ronybu pensary modreʼ. Xalagary ngú rantzayibu guirá xiinyibu ná nacbu mbioxguieuyen o mbioxgonaʼyen né ronyibu que tzee xiinyibu scuel né gacyibu remeidy.

Jesús gop confianz ló buñgonaʼ. Nisló tribunal judío, ni goni’ toib buñgonaʼ gosacni xomod xtiitz toib mós. Né historiador ni goyoʼ ló siglo primero ni góc laa Josefo goni’: «Ni naniʼ buñgonaʼ nisló tribunal diti noʼ pu nasacni portín nacyibu buñgonaʼ».

¡Jesús diti góc scú! Golúbu buñgonaʼ par naniʼ que ma biásbu lad gueʼet (Mateo 28:1, 8-10). Ná guirá buñgonaʼ reʼ bibiʼyibu órni goity né órni bigach Jesús, dada apóstoles diti tampa bunyibu crer ni goniʼ guirá buñgonaʼ reʼ (Mateo 27:55, 56, 61; Lucas 24:10, 11). Né órni golú Jesús buñgonaʼ par naniʼ que ma biásbu lad gueʼet toibsi midid bibiʼbu tanli buñguieeu né buñgonaʼ (Hechos 1:8, 14).

Mod racaʼ buñgonaʼ galrracné ló naareʼ: Guirá buñguieeu ni nap privilegio lainy congregación raslooyibu que napyibu respet buñgonaʼ órni raniʼyibu ni ronyibu pensary. Buñguieeu láaca rapyibu respet tzeʼelyibu órni racadiagtzayibu tzeʼelyibu (1 Pedro 3:7; Génesis 21:12).

Buñguieeu ni rasuʼ Cristo radudybu libertad né respet buñgonaʼ ni goniiny Dios guicaʼyibu (Génesis 1:27, 28). Buñguieeu ni rasuidy la Biblia diti ni náapayibu rac, né diti raniʼyibu que más rasacyibu que tzeʼelyibu. Xalagary ngú rasobyibu ni ná la Biblia, né ndeʼ racné tzeʼelyibu par tzoʼ nakit (Efesios 5:28, 29).

Órni Yelena gosaló bisuidy la Biblia, godudybu ló galrrioʼob por mod buny tzeelbu láabu. Tzeelbu goniʼs toib lagary ro radíil buñ, né ro rabanyibu buñgonaʼ né láaca ro raguinyibu buñgonaʼ. Láabu nábu: «La Biblia bidudy fuers naʼ par bisudi que noʼ toib Dios ni ronladx naʼ, né que rasaca nislóbu né rioʼbu galrrasaʼ por naʼ. Bidudi cuent que tzeʼela labúu natzaʼ mod nac pal láaca rasuidybu ni ná la Biblia». Mod bunybu pensary labúu gocni scú, portín diti xidzú después tzeelbu láaca goyonis né góc toib testigo xtuny Jehová. Yelena ná: «Ma labúu buny mandarybu láacabu né guiropcado bisuidydo gony perdonardo saʼdo, consej ni sieed ló la Biblia gocnéni naʼ par guidudi cuent que noʼ ni ronladx né ran naʼ lainy xcaltzeela» (Colosenses 3:13, 18, 19).

Xidal buñ rasaclóo xomod Yelena. Noʼ xidal cristianas ni nac xomod Yelena, ni láaca noʼ nakit portín guiropyibu ronyibu xtem par guisobyibu ni ná la Biblia lainy xcaltzeelyibu, láaca rialdó xcalnabanyibu né rasacyibu que stipnés herman rap respet layibu lainy congregación (Juan 13:34, 35).

Guirá cristianos tanli buñguieeu né buñgonaʼ radudyibu cuent que nacyibu buñ galkié né que diti «rarebuʼ ni ronyibu». Per napyibu confianz que pal rabigaxyibu Jehová, ni nac Bixiosyibu, ma diti sioʼyibu «xan xomandary galkié né galgoity né sapni libertad ni nap xiin Dios». ¡Galán galnasác racaʼ buñguieeu né buñgonaʼ ni noʼ ladxña Dios! (Romanos 8:20, 21).