Par guioladxlo goʼolo la Biblia ma riaʼni en looy. Guibiʼno tipnés mod par guioladxlo goʼolo la Biblia.

Biyopy toib Biblia ni naplo confianz né ni labúu rienlo. Pal órni cayoʼolo la Biblia noʼ tipnés diitz ni diti rienlo o napni tipnés diitz ni ma diti raquiin buñ ló naareʼ sasac naganlo guioladxlo goʼolo láani. Por ngú biyopy toib Biblia ni labúu rienlo par labúu guidxinni lainy xcalnabanylo. Láaca non gacni toib Biblia ni gaplo confianz né ni diti raché. *

Biquiin tecnologías copy ni noʼ. Ló naareʼ Biblia diti nosi ma bireʼni ló guiich, láaca ma noʼni ló formato electrónico. Labúu goʼolo láani ló Internet o labúu guilitlo láani ló toib computadora, tableta o teléfono. Noʼ tipnés versiones ni nap herramientas ni labúu gacné looy guibiʼlo tipnés traducciones de versículo reʼ o gony o compararlo láani né stipnés textos ni sieed ló la Biblia. Né pal diti nainy looy goʼolo labúu guicadiaglo láani. Xidal buñ rioladx guicadiag láani laʼga seʼyibu xchiinyibu laʼga caguipyibu lairy o cayonyibu stoib dxiinien per diti tampa raquiin tzodieʼyibu ló dxiincu. ¿Xí más rioladxlo gonylo? ¿Xigony diti ronylo por gonylo láani?

Biyopy más información. Noʼ tipnés cós ni labúu gacné looy par guienlo ni cayoʼolo. Xomod, noʼ tipnés mapas de lagary ni rasetlaa la Biblia ni labúu gacné looy guidudylo cuent pu nís riaʼan lagary ni rasetlaa historia ni cayoʼolo né par gonylo pensary mod gocni. Láaca tipnés artículos ni bireʼ ló revista reʼ né ló sección ni laa, «Ni rasuidy la Biblia» ni sieed ló Internet jw.org sacnéni looy par guienlo xidal historia ni sieed ló la Biblia.

Bitzaʼ mod goʼolo la Biblia. Pal rasacnaganlo salólo de Génesis a Apocalipsis labúu salólo goʼolo toib libro ni más rioladxlo. Pal nainy looy ganlo más de toib buñ ni rasetlaa la Biblia. Labúu goʼolo tipnés textos ro nosi ritlaa de láabu. Bibiʼ cuadriyen ni laa, « Bisuidy de buñ ni ritlaa ló la Biblia», labúu sacnéni looy par guienlo más de buñ ni rasetlaa la Biblia. Láaca labúu goʼolo láani por temas o dzú ni gocni. Rony animardo looy par gonylo mod ritlaa ló artículo reʼ.