ФАҸИӘ БАШ ВЕРӘНДӘ: «НИЈӘ АЛЛАҺ БУНА ИЗИН ВЕРДИ?» — ДЕЈӘ ДҮШҮНМҮСҮНҮЗМҮ? БӘЛКӘ ДӘ, БАШЫНЫЗА БӘДБӘХТ ҺАДИСӘ ҜӘЛӘНДӘ «АЛЛАҺ НӘ ЧӘКДИЈИМИ ҜӨРҮРМҮ?» — ДЕЈӘ ФИКИРЛӘШИРСИНИЗ.

Ола билсин, Бирләшмиш Штатларда јашајан вә гаты диндар аиләдә бөјүмүш Шиланын һиссләри сизә јад дејил. О дејир: «Ушаглыгдан Аллаһа инанырдым, чүнки бизи О јарадыб. Амма өзүмү Она јахын һисс етмирдим. Фикирләширдим, О, садәҹә узагдан мәни мүшаһидә едир, вәссалам. Дүшүнмүрдүм ки, мәндән наразыдыр, һеч севдијинә дә әмин дејилдим». Нәјә ҝөрә Шила белә фикирләширди? О дејир: «Аиләмиз ард-арда фаҹиәләрлә үзләшди. Санки Аллаһ әлини үстүмүздән чәкмишди».

Бәлкә, Шила кими сиз дә Күлли-Ихтијар Аллаһын варлығына инанырсыныз. Амма сизи севдијинә әмин дејилсиниз. Јараданын гүдрәтинә вә һикмәтинә шәкк-шүбһә етмәјән Әјјуб пејғәмбәрдә дә бу кими һиссләр јаранмышды (Әјјуб 2:3; 9:4). Ард-арда башына ҝәлән бәлалардан сонра чар-начар галан Әјјуб пејғәмбәр Аллаһдан сорушмушду: «Нијә үзүнү ҝизләдирсән? Нијә мәни дүшмән санырсан?» (Әјјуб 13:24).

Бу мөвзу барәдә Мүгәддәс Китабда нә дејилир? Үзләшдијимиз бәлалар Аллаһдандырмы? Аллаһын бүтүн бәшәри вә ајры-ајрылыгда һәр биримизи севдијинә бизи нә әмин едир? Бизә нәзәр салдығыны, бизи баша дүшдүјүнү, бизә шәфгәт ҝөстәрдијини, көмәк әлини узатдығыны шәхсән неҹә ҝөрә биләрик?

Нөвбәти мәгаләләрдә инсан јарадылышына нәзәр салаҹағыг. Бу мәлуматын сајәсиндә Аллаһын бизи нә гәдәр севдијини вә гајғымыза галдығыны ҝөрәҹәјик (Ромалылара 1:20). Сонра бу мөвзуну Мүгәддәс Китабын ишығында тәһлил едәҹәјик. Бу ики јолла Аллаһы даһа јахындан таныјаҹағыг вә беләҹә, Онун бизи севдијинә, гајғымыза галдығына әминлијимиз артаҹаг (1 Јәһја 2:3; 1 Бутрус 5:7).