Kanayon nga adda dagiti makapadanag a damdamag, a mabuya iti TV, selpon, tablet, ken kompiuter.

 Mabuybuya dagita dagiti ubbing.

 Ania ti mabalin nga aramidenyo tapno saan a maapektaran dagiti annakyo kadagiti nakabutbuteng a damdamag?

•  Kasano a maapektaran dagiti ubbing kadagiti damdamag?

•  Kasano a matulonganyo dagiti annakyo no madandanaganda gapu kadagiti mabuyada a damdamag?

•  Ania ti aramidem no makakita ti anakmo iti nakabutbuteng a pasamak?

•   Adu nga ubbing ti mabuteng kadagiti trahedia a mabuyada kadagiti damdamag. Mabalin a saan a mayebkas ti dadduma nga ubbing ti marikriknada, ngem baka dakkel ti epektona iti emosionda dagiti nakabutbuteng a damdamag. a Lallalo a madanaganda no makitada a sobra ti panagdanag dagiti nagannakda.

•   Mabalin a di umiso ti pannakaawat dagiti ubbing kadagiti mabuyada a damdamag. Kas pagarigan, pampanunoten ti dadduma a mapasamak iti pamiliada dagiti nabuyada. Ken dagiti babassit pay nga ubbing a maulit-ulit a nakabuya kadagiti nakabutbuteng a pasamak ket mabalin a panunotenda a mapasamak manen dayta.

•   Mabalin a marigatan dagiti ubbing a mangkita a nasobraan laeng dagiti damdamag. Baka saanda a maawatan a dakkel ti mapastrek a kuarta ti media no ad-adu ti agbuya. Isu a sobsobraanda dagiti ireportda tapno maala ti atension ti adu nga agbuya.

•   Limitaranyo ti panagbuyada kadagiti nakabutbuteng a damdamag. Ngem dina kayat a sawen a saanen a rumbeng a maammuan dagiti annakyo dagiti mapaspasamak iti lubong. Ken saan a makatulong kadakuada no kanayon nga agbuya wenno makangngegda kadagiti nakabutbuteng a damdamag.

   “No dadduma, pages-estoriaanmi ken lakayko dagiti damdamag, ngem saanmi a madmadlaw a permi gayam ti danag dagiti annakmi a makangngeg iti dayta.”—Maria.

   Prinsipio ti Biblia: “Madagsenan ti puso ti tao gapu iti danag.”—Proverbio 12:25.

•   Anusam ti dumngeg, ken saysayaatem ti pannakisaritam. No marigatan ti anakmo a mangibaga iti marikriknana maipapan iti napasamak, mabalin nga ibagam nga idrowingna lattan dayta. Kasaritam ti anakmo maipapan kadagiti pakadanaganna ken agusarka kadagiti sasao a maawatanna, ken liklikam a dakamaten dagiti detalye a saanna a masapul a maammuan maipapan iti napasamak.

   “Sumayaat ti rikna ti anakmi no dumngegkami kenkuana. Ngem saan a makatulong no ibagami a, ‘Normal dayta itan, isu a masapul a masanaytayon.’”—Sarahi.

   Prinsipio ti Biblia: “Masapul nga alisto a dumngeg ti tunggal maysa, nainayad nga agsao.”—Santiago 1:19.

•   Tulongam ti anakmo tapno agbalin a balanse ti panangkitana kadagiti damdamag. Kas pagarigan, no adda makidnap, agparang nga adu ti makidkidnap gapu iti pamay-an ti pannakaipadamagna. Ilawlawagmo iti annakmo dagiti inaramidmon para iti seguridadda. Tandaanam met a dagiti trahedia ti kaaduanna a maipadpadamag gapu ta manmano a mapaspasamak dagita—saan a gapu ta kanayon a mapaspasamak dagita.

   “Tulongam dagiti annakmo a mangkontrol iti emosionda. Kaaduanna a dagiti marikrikna dagiti annak ket resulta ti mapampanunotda, isu a no tulongantayo ida nga agpokus kadagiti positibo a banag, sumayaat ti riknada.”—Lourdes.

   Prinsipio ti Biblia: “Panunoten nga umuna ti masirib ti sawenna, ket ad-adda ngarud a makaguyugoy ti ibagana.”—Proverbio 16:23, Ti Baro a Naimbag a Damag Biblia.