“Ti maysa kadagiti karigatan a lablabanak idi dumakdakkelak ket ti pannakaatrakarko kadagiti padak a lallaki. Ti ammok idi no mapukawto met laeng dayta a rikna, ngem saan met.”​—David, 23.

 Maysa a Kristiano ni David, ket kayatna a maragsakan ti Dios kenkuana. Maaramidna ngata dayta uray no adda panaggustona kadagiti padana a lallaki? Ania a talaga ti rikna ti Dios maipapan iti homoseksualidad?

•  Ania ti kuna ti Biblia?

•  Kayatna kadi a sawen . . . ?

•  Ngem kasanon no . . . ?

 Agduduma ti kapanunotan ti adu a kultura maipapan iti homoseksualidad, ken agbaliwbaliw dayta iti panaglabas ti panawen. Ngem saan a sursuroten dagiti Kristiano ti kapanunotan ti kaaduan ken saanda nga agpaimpluensia iti “angin ti sursuro.” (Efeso 4:14) Ti Biblia ti pagibasaranda iti patpatienda maipapan iti homoseksualidad (ken iti dadduma pay nga aramid a konektado iti dayta).

 Nalawag ti prinsipio ti Biblia maipapan kadagiti homoseksual nga aramid. Kuna ti Sao ti Dios:

•  “Dika makikaidda iti maysa a lalaki a kas ti pannakikaiddam iti maysa a babai.”​—Levitico 18:22.

•  ‘Ti Dios, mayannurot kadagiti tarigagay ti puspusoda, . . . inyawatna ida kadagiti nakababain a panaggartem iti sekso, ta agpadpada a dagiti babbai sinukatanda ti nakaisigudan nga usar ti bagbagida iti maysa a maikaniwas iti nakaparsuaan.’​—Roma 1:24, 26.

•  “Dikay payaw-awan. Uray dagiti mannakiabig, wenno dagiti managrukbab iti idolo, wenno dagiti mannakikamalala, wenno dagiti lallaki a maipaay kadagiti di nainkasigudan a panggep, wenno dagiti lallaki a makikaidda kadagiti lallaki, wenno dagiti mannanakaw, wenno dagiti naagum a tattao, wenno dagiti managbarbartek, wenno dagiti manangrabngis, wenno dagiti manangkikil didanto tawiden ti pagarian ti Dios.”—1 Corinto 6:9, 10.

 Kinaagpaysuanna, para iti amin a tao dagiti prinsipio ti Dios, addaanda man iti homoseksual a rikna wenno awan. Maysa pay, masapul a kontrolen ti amin a tao ti riknada nga agaramid iti banag a kagura ti Dios.—Colosas 3:5.

 Kayatna kadi a sawen a supsuportaran ti Biblia ti pananggura kadagiti homoseksual?

 Saan. Kinaagpaysuanna, saan a supsuportaran ti Biblia ti pananggura iti uray asinoman—bakla man, tomboy, wenno saan. Isursuro ti Biblia nga ‘ikagumaantayo ti makikappia iti amin a tattao,’ aniaman ti klase ti kabibiagda. (Hebreo 12:14, Ti Baro a Naimbag a Damag Biblia) Isu a saan a nasayaat ti pananginsulto, pananguyaw, panangdangran, wenno aniaman a klase ti di umiso a panangtrato kadagiti homoseksual.

 Kayatna kadi a sawen a masapul a kontraen dagiti Kristiano dagiti linteg a mangipalubos iti same-sex marriage?

 Ibaga ti Biblia a ti urnos ti Dios para iti panagasawa ket ti panagtipon ti maysa a lalaki ken maysa a babai. (Mateo 19:4-6) Ngem ti panagdedebate kadagiti linteg maipapan iti same-sex marriage, wenno panagasawa ti agpada a lalaki wenno agpada a babai, ket isyu nga adda koneksionna iti politika, saan nga isyu iti no ania ti naimbag wenno dakes. Ibagbaga ti Biblia kadagiti Kristiano nga agtalinaedda a neutral iti politika. (Juan 18:36) Isu a saanda a suportaran wenno kontraen dagiti linteg ti gobierno a konektado iti same-sex marriage wenno kadagiti homoseksual nga aramid.

 Ngem kasanon no homoseksual ti maysa a tao? Makapagbalbaliw pay ngata?

 Wen. Kinapudnona, kasta ti dadduma idi umuna a siglo! Kalpasan ti panangibaga ti Biblia a saan a tawiden dagiti homoseksual ti Pagarian ti Dios, kunana: “Kasta idi ti sumagmamano kadakayo.”—1 Corinto 6:11.

 Kaipapananna kadi a dagidiay nangisardeng iti homoseksual nga aramid ket awan a pulosen ti aniaman a riknada a mangsubli iti dati a panagbiagda? Saan. Kuna ti Biblia: “Kawesanyo ti bagbagiyo iti baro a personalidad, a babaen iti umiso a pannakaammo mapabpabaro.” (Colosas 3:10) Agtultuloy a proseso ti panagbalbaliw.

 Ngem kasanon no ti maysa a mayat a mangaramid iti pagayatan ti Dios ket adda pay laeng homoseksual a riknana?

 Aniaman dayta a riknana, mabalin a baybay-an wenno labananna dayta. Kasano? Kuna ti Biblia: “Itultuloyyo ti magna babaen ti espiritu ket saankayto a pulos makaaramid iti nainlasagan a tarigagay.”—Galacia 5:16.

 Siputam ta saan nga imbaga dayta a bersikulo nga awanen a pulos ti nainlasagan a tarigagay ti maysa a tao. No di ket babaen iti napasnek a panagadalna iti Biblia ken panagkararagna, maaddaan iti pigsa a manglaban iti homoseksual a riknana.

 Napaneknekan dayta ni David, a nadakamat iti rugi ti artikulo. Mas nalabananna ti problemana idi imbagana dayta kadagiti nagannakna. “Nakadagdagsen dayta a problemak,” kunana, “ken siguro, mas na-enjoy-ko koma ti kinatin-edyerko no nasapsapa nga imbagak dayta kadakuada.”

 Talaga a naragragsaktayo no surotentayo dagiti pagannurotan ni Jehova. Kombinsidotayo a dagita ket ‘nalinteg, mamagrag-o iti puso,’ ken ti panangsurot kadagita ket agresulta iti “dakkel a gunggona.”​—Salmo 19:8, 11.