ತಪ್ಪಭಿಪ್ರಾಯ: ಯೆಹೋವನ ಸಾಕ್ಷಿಗಳು ಯೇಸುವನ್ನು ನಂಬದ ಕಾರಣ ಕ್ರಿಸ್ಮಸ್‌ ಆಚರಿಸುವುದಿಲ್ಲ.

 ವಾಸ್ತವಾಂಶ: ನಾವು ಕ್ರೈಸ್ತರು. ನಮ್ಮ ರಕ್ಷಣೆ ಯೇಸು ಕ್ರಿಸ್ತನ ಮೂಲಕ ಮಾತ್ರ ಸಾಧ್ಯ ಎಂದು ನಂಬುತ್ತೇವೆ.​—ಅಪೊಸ್ತಲ ಕಾರ್ಯಗಳು 4:12.

 ತಪ್ಪಭಿಪ್ರಾಯ: ಕ್ರಿಸ್ಮಸ್‌ ಆಚರಿಸಬಾರದು ಎಂದು ಜನರಿಗೆ ಕಲಿಸುವ ಮೂಲಕ ನೀವು ಕುಟುಂಬಗಳನ್ನು ಒಡೆಯುತ್ತೀರಿ.

 ವಾಸ್ತವಾಂಶ: ಕುಟುಂಬಗಳು ಪ್ರೀತಿ, ಐಕ್ಯತೆಯಲ್ಲಿ ಇರಬೇಕೆಂದು ನಾವು ಬಯಸುತ್ತೇವೆ. ಹಾಗಾಗಿ ಕುಟುಂಬ ಬಂಧವನ್ನು ಬಲಪಡಿಸಲು ಬೈಬಲ್‌ನಿಂದ ಸಹಾಯ ಮಾಡುತ್ತೇವೆ.

 ತಪ್ಪಭಿಪ್ರಾಯ: ಶಾಂತಿ ಮತ್ತು ಔದಾರ್ಯತೆ ತೋರಿಸುವ, ಇತರರಿಗೆ ಸಹಾಯಮಾಡುವ ಮುಂತಾದ ಅವಕಾಶಗಳು ಕ್ರಿಸ್ಮಸ್‌ ಆಚರಣೆಯ ಸಮಯದಲ್ಲಿ ಸಿಗುತ್ತವೆ. ಇಂಥ ಅವಕಾಶಗಳನ್ನು ನೀವು ಕಳೆದುಕೊಳ್ಳುತ್ತಿದ್ದೀರಿ.

 ವಾಸ್ತವಾಂಶ: ನಾವು ಪ್ರತಿದಿನ ಔದಾರ್ಯ ತೋರಿಸಲು, ಜನರೊಂದಿಗೆ ಶಾಂತಿಯಿಂದಿರಲು ನಮ್ಮಿಂದಾದ ಸಕಲ ಪ್ರಯತ್ನಮಾಡುತ್ತೇವೆ. (ಜ್ಞಾನೋಕ್ತಿ 11:25; ರೋಮನ್ನರಿಗೆ 12:18) ಉದಾಹರಣೆಗೆ, ಯೇಸು ಮಾರ್ಗದರ್ಶಿಸಿದಂತೆ ನಾವು ನಮ್ಮ ಕೂಟಗಳನ್ನು ನಡೆಸುತ್ತೇವೆ ಮತ್ತು ಸುವಾರ್ತೆ ಸಾರುತ್ತೇವೆ. ಅವನಂದದ್ದು: “ನೀವು ಉಚಿತವಾಗಿ ಹೊಂದಿದ್ದೀರಿ, ಉಚಿತವಾಗಿ ಕೊಡಿರಿ.” (ಮತ್ತಾಯ 10:8) ಅಲ್ಲದೆ, ಭೂಮಿಯ ಮೇಲೆ ನಿಜ ಶಾಂತಿಯನ್ನು ತರಲು ದೇವರ ರಾಜ್ಯದಿಂದ ಮಾತ್ರ ಸಾಧ್ಯ ಎಂದು ಜನರಿಗೆ ತಿಳಿಸುತ್ತೇವೆ.​—ಮತ್ತಾಯ 10:7.

•   ತನ್ನ ಮರಣ ದಿನವನ್ನು ಜ್ಞಾಪಿಸಿಕೊಳ್ಳುವಂತೆ ಯೇಸು ಕ್ರಿಸ್ತ ಹೇಳಿದನೇ ಹೊರತು ಜನನ ದಿನವನ್ನಲ್ಲ.​—ಲೂಕ 22:​19, 20.

•   ಯೇಸುವಿನ ಅಪೊಸ್ತಲರು ಮತ್ತು ಆರಂಭದ ಶಿಷ್ಯರು ಕ್ರಿಸ್ಮಸ್‌ ಆಚರಿಸಲಿಲ್ಲ. ನ್ಯೂ ಕ್ಯಾಥೋಲಿಕ್‌ಎನ್‌ಸೈಕ್ಲೋಪಿಡಿಯ ಹೇಳುವುದು “ಯೇಸುವಿನ ಜನನವನ್ನು ಆಚರಿಸಲು ಆರಂಭಿಸಿದ್ದು ಕ್ರಿ.ಶ. 243 ನಂತರವೇ.” ಇದರ ಅರ್ಥ ಕೊನೆಯ ಅಪೊಸ್ತಲನು ಸತ್ತ ನಂತರವೇ ಈ ಆಚರಣೆ ಆರಂಭವಾಯಿತು.

•   ಯೇಸು ಡಿಸಂಬರ್‌ 25ಕ್ಕೆ ಜನಿಸಿದ್ದೆಂದು ಯಾವುದೇ ಪುರಾವೆಯಿಲ್ಲ; ಬೈಬಲಿನಲ್ಲಿ ಎಲ್ಲೂ ಆತನ ಜನ್ಮ ದಿನಾಂಕವನ್ನು ತಿಳಿಸಿಲ್ಲ.

•   ಕ್ರಿಸ್ಮಸ್‌ ಬೇರೆ ಧರ್ಮದಿಂದ ಬಂದ ವಿಚಾರವಾಗಿರುವ ಕಾರಣ ಅದನ್ನು ದೇವರು ಅಂಗೀಕರಿಸುವುದಿಲ್ಲ ಎಂದು ನಾವು ನಂಬುತ್ತೇವೆ.

 ಕ್ರಿಸ್ಮಸ್‌ ವಿಧರ್ಮಿ ಮೂಲದಿಂದ ಬಂದಿದೆ, ಅದಕ್ಕೆ ಯಾವುದೇ ಬೈಬಲ್‌ ಆಧಾರವಿಲ್ಲ ಎಂದು ತಿಳಿದರೂ ಅನೇಕರು ಅದನ್ನು ಆಚರಿಸುತ್ತಾರೆ. ಅಂಥ ಜನರು ಹೀಗೆ ಪ್ರಶ್ನಿಸುತ್ತಾರೆ: ನೀವ್ಯಾಕೆ ಇಂಥ ಜನಪ್ರಿಯವಲ್ಲದ ನಿಲುವನ್ನು ತೆಗೆದುಕೊಳ್ಳುತ್ತೀರಿ? ಅದನ್ನೇಕೆ ಅಷ್ಟು ದೊಡ್ಡ ವಿಷಯ ಮಾಡುತ್ತೀರಿ?

 ನಮ್ಮ ಯೋಚಾನಶಕ್ತಿಯನ್ನು ಬಳಸುವಂತೆ ಅಥವಾ, “ವಿವೇಚನಾಶಕ್ತಿ” ಉಪಯೋಗಿಸುವಂತೆ ಬೈಬಲ್‌ ಪ್ರೋತ್ಸಾಹಿಸುತ್ತದೆ. (ರೋಮನ್ನರಿಗೆ 12:​1, 2) ಹೀಗೆ ಮಾಡಿದರೆ ಬೈಬಲ್‌ ಸತ್ಯದ ಮೌಲ್ಯವನ್ನು ನಾವು ಅರಿತುಕೊಳ್ಳುತ್ತೇವೆ. (ಯೋಹಾನ 4:​23, 24) ಇತರರು ನಮ್ಮ ಬಗ್ಗೆ ಏನು ತಿಳಿಯುತ್ತಾರೆ, ಅವರು ನಮ್ಮನ್ನು ಇಷ್ಟಪಡುತ್ತಾರೋ ಇಲ್ಲವೋ ಎನ್ನುವುದಕ್ಕಿಂತ ಬೈಬಲ್‌ ಮೂಲತತ್ವಗಳನ್ನು ಎತ್ತಿಹಿಡಿಯುವುದೇ ನಮ್ಮ ಹೃದಯಾಳದ ಇಚ್ಛೆ.

 ನಾವು ಕ್ರಿಸ್ಮಸ್‌ ಆಚರಿಸದಿದ್ದರೂ ಈ ವಿಚಾರದಲ್ಲಿ ಬೇರೆಯವರ ಆಯ್ಕೆಯನ್ನು ನಾವು ಗೌರವಿಸುತ್ತೇವೆ. ಹಾಗಾಗಿ ಬೇರೆಯವರು ಕ್ರಿಸ್ಮಸ್‌ ಆಚರಿಸುವಾಗ ನಾವದನ್ನು ತಡೆಯುವುದಿಲ್ಲ.